ޅ. ކުރެންދޫ ގޮނޑުދޮށް ހިމާޔަތްކުރުމުގެ އަމަލީ މަސައްކަތް, އެންވަރަޔަމެންޓް އިމްޕެކްޓް އެސެސްމެންޓް (އީއައިއޭ) ނިމުމާއެކު ފަށާނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގާއި އެމްޓީސީސީގެ ސީއީއޯ އާދަމް އާޒިމް ވިދާޅުވީ, ކުރެންދޫ ގޮނޑުދޮށް ހިމާޔަތްކުރުމުގެ މަސައްކަތް އެމްޓީސީސީއާ ހަވާލުކޮށްފައި އޮންނަތާ ދުވަސްތަކެއް ވެފައިވާ ކަމަށާއި، އެ މަޝްރޫއުގެ އީއައިއޭގެ މަސައްކަތް ކުރަމުންދަނީ އެހެން ކުންފުންޏަކުން ކަމަށެވެ. އީއައިއޭގެ މަސައްކަތަކީ ވަގުތު ނަގާ މަސައްކަތަކަަށްވާއިރު، ބައެއް ހާލަތުގައި ތިން މަސް ނުވަތަ ހަމަސް ވެސް ނަގާ ކަމަށް އާޒިމް ވިދާޅުވިއެވެ. އަދި އީއައިއޭގެ މަސައްކަތް ނިމުނުހާ އަވަހަކަށް ގޮނޑުދޮށް ހިމާޔަތް ކުރުމުގެ އަމަލީ މަސައްކަތް ފަށާނެ ކަމަށާއި، 14 ދުވަސް ތެރޭގައި ފުރިހަމައަށް ތައްޔާރުވެގެން ޓީމް އެރަށަށް ދާނެ ކަމަށެވެ. އެހެންކަމުން އާޒިމް ވަނީ ވީހާ ވެސް އަވަހަށް އީއައިއޭގެ މަސައްކަތް ނިންމައި ރިޕޯޓު ހުށަހެޅުމަށް އެދިވަޑައިގެންފައެވެ.

ކުރެންދޫއަކީ ވަރަށް ބޮޑަށް އުދައަރާ ރަށެއްކަން ފާހަގަކުރައްވައި އާޒިމް ވިދާޅުވީ, ދާދިފަހުން ވެސް އެރަށަށް ބޮޑެތި ގެއްލުންތަކެއް ލިބިފައިވާ ކަމަށެވެ. މިއަދުގެ ސަރުކާރުން މަސައްކަތް ކުރަނީ މިފަދަ ގެއްލުންތައް ކުޑަކޮށް, ރައްޔިތުން އެދޭ ފަދަ ތަރައްގީ ގެނެސްދިނުމަށްކަމަށް އާޒިމް ވިދާޅުވިއެވެ.

ކުރެންދޫ ގޮނޑުދޮށް ހިމާޔަތްކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ 8 ނޮވެންބަރު 2021ގައެވެ.

ކުރެންދޫގައި ހިންގާ މަޝްރޫގެ ދަށުން އެ ރަށުގެ އިރުއުތުރުން 525 މީޓަރުގެ ސަރަހައްދެއްގައި ބޮޑު ހިލައިގެ ރިވެޓްމަންޓް ޖެހުމާއި, ދެކުނު ފަރާތުގައި 155 މީޓަރުގެ ބޮޑު ހިލައިގެ ރިވެޓްމަންޓެއް ޖެހުން ހިމެނެއެވެ. މީގެ އިތުރުން އެރަށުގެ އިރުދެކުނު ފަރާތުގައި 183 މީޓަރުގެ ބްރޭކްވޯޓަރއެއްގެ އިތުރުން, ހުޅަނގުދެކުނު ފަރާތުގައި 108 މީޓަރުގެ ބްރޭކް ވޯޓަރއަކާއި 35 މީޓަރުގެ ބްރޭކްވޯޓަރއެއް ގާއިމުކުރުން ހިމެނެއެވެ.

ކުރެންދޫ ގޮނޑުދޮށް ހިމާޔަތްކުރުމުގެ މަޝްރޫއު އަހަރެއްގެ ތެރޭގައި ނިންމަން ޖެހެއެވެ. އަދި މި މަސައްކަތަށް 44.9 މިލިއަން ރުފިޔާ ޚަރަދުވާނެއެވެ.