ރާއްޖޭގެ 50 އަހަރުގެ ފަތުރުވެރިކަން ދައްކުވައިދޭ ސްޓޭމްޕްސެޓެއް ނެރެފި

ރާއްޖޭގެ ފަތުރުވެރިކަމަށް 50 އަހަރު ފުރުމާ ގުޅިގެން ޚާއްސަ ސްޓޭމްޕް ސެޓެއް ނެރެފިއެވެ.

މި ސްޓޭމްޕް ސެޓް ނެރުމަށް ބުދަ ދުވަހު ބޭއްވި ޚާއްސަ ރަސްމިއްޔާތުގައި މި ސްޓޭމްޕް ތައް ނެރެދެއްވީ ފަތުރުވެރިކަމުގެ ބާނީންކަމުގައިވާ އެމްޔޫ މަނިކު، ހުސެއިން އަފީފް، އަހުމަދު ނަސީމް، ޖޯޖް ކޯބިން އަދި ރާއްޖެ ފުރަތަމަ ޓޫރިޒަމް މިނިސްޓަރ އަހުމަދު މުޖުތަބާއެވެ.

މި ރަސްމިއްޔާތުގައި 6 ސްޓޭމްޕެއް ނެރެފައިވާއިރު މިއިން ކޮންމެ ސްޓޭމްޕަކުންވެސް ޚާއްސަ ކަމެއް ރަމްޒުކޮށްދެއެވެ. މިގޮތުން އެންމެ ފުރަތަމ ލޯންޗުކޮށްފައިވާ 5 ރުފިޔާގެ ސްޓޭމްޕުން ރަމްޒުކޮށްދެނީ 3 އޮކްޓޫބަރު 1972 ގައި ރާއްޖޭގައި ފަތުރުވެރިކަން ލޯންޗުކުރިކަމެވެ. އަދި ރާއްޖޭގެ ފުރަތަމަ ރިޒޯޓު ކަމުގައިވާ ކުރުނބާ ވިލެޖު ހުޅުވުނު ދުވަހަކީވެސް މިއީއެވެ. ދެވަނައަށް ލޯޯންޗުކުރި 10 ރުފިޔާގެ ސްޓޭމްޕުން ރަމްޒުކޮށްދެނީ 1980ގެ ފަހު އަހަރުތަކުގައި ރާއްޖެއަށް ވޯޓަރ ބަންގަލޯ ތައާރަފުކުރެވުނު ކަމެވެ. މިގޮތުން ރާއްޖޭގެ ރިސޯޓެއްގައި އެންމެ ފުރަތަމަ ވޯޓަރ ބަންގަލޯއެއް ގާއިމްކޮށްފައިވަނީ 1986 ވަނަ އަހަރު ވާދޫ ޑައިވިންގ ޕެރެޑައިސް ރިސޯޓުގައެވެ. 3 ވަނައަށް ލޯންޗުކޮށްފައިވާ 20 ރުފިޔާގެ ސްޓޭމްޕުން ރަމްޒުކޮށްދެނީ 1987 ވަނަ އަހަރު ރާއްޖޭގައި ފުރަތަމަ ފަހަރަށް ހޮސްޕިޓާލިޓީ ޓްރެއިނިންގ އިންސްޓިޓިއުޓެއް ގާއިމްކުރެވުނު ކަމެވެ. ހަތަރުވަނައަށް ލޯންޗުކޮށްފައިވާ 30 ރުފިޔާގެ ސްޓޭމްޕުން ރަމްޒުކޮށްދެނީ 1993 ވަނަ އަހަރު ރާއްޖެއަށް ސީޕްލޭންގެ ޚިދުމަތް ތައާރަފުކުރެވުނު ކަމެވެ. 40 ރުފިޔާގެ ސްޓޭމްޕުން ރަމްޒުކޮށްދެނީ 2010 ވަނަ އަހަރު ރާއްޖޭގައި ގެސްޓްހައުސް ޓޫރިޒަމް ފަށައިގަނެވުނު ކަމެވެ. އަދި 50 ރުފިޔާގެ ސްޓޭމްޕަކީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމާ ގުޅެގޮތުން ނެރެފައިވާ ސްޓޭމްޕެކެވެ.

މި ސްޓޭމްޕް ސެޓް ލޯންޗުކުރުމާ ގުޅިގެން މޯލްޑިވްސް ޕޯސްޓް ލިމިޓެޑްގެ މެނޭޖިންގ ޑިރެކްޓަރ އަހުމަދު ޝަފީގު ވިދާޅުވީ މި ސްޓޭމްޕް ސެޓް ފަރުމާކޮށްފައިވާނީ ރާއްޖޭގެ ފަތުރުވެރިކަމުގެ 50 އަހަރު ވަރަށް ރަނގަޅަށް ރަމްޒުކޮށްދޭނެ ފަދަ ގޮތަކަށް ކަމަށެވެ. އަދި މިއީ މިހާތަނަށް ގާއިމްކޮށްފައިވާ މިފަދަ ފުރަތަމަ ސްޓޭމްޕް ސެޓް ކަމަށާއި، މި ސްޓޭމްތައް މޯލްޑިވްސް ޕޯސްޓް ލިމިޓެޑްގެ އީޓުކުރި އޮންލައިން ޕްލެޓްފޯމުން ގަންނަން ލިބެން ހުންނާނެ ކަމަށް ޝަފީގު ވިދާޅުވިއެވެ.

މީގެ އިތުރުން މި ރަސްމިއްޔާތުގައި ވާހަކަދައްކަވަމުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ 16 ފެބްރުއަރީއަކީ ރާއްޖެއަށް ތާރީޚީ ދުވަހެއް ކަމަށެވެ. އެއީ ރާއްޖެއަށް އެންމެ ފުރަތަމަ ފަތުރުވެރިން ޒިޔާރަތްކުރި ދުވަސް ކަމަށް މިނިސްޓަރ ވިދާޅުވިއެވެ. 2022 ވަނަ އަހަރަކީ ރާއްޖޭގެ ފަތުރުވެރިކަމުގެ ރަންޔޫބީލް އަހަރު ކަމަށާއި، މިކަން ކުލަގަދަކޮށް ފާހަގަކުރެވިގެންދާނީ ރާއްޖޭގެ ފަތުރުވެރިކަމުގެ ދުވަހުގެ ގޮތުގައި ކަނޑައަޅާފައިވާ 3 އޮކްޓޯބަރުގައި ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ މިކަމާ ގުޅިގެން ގިނަ ހަރަކާތްތަކެއް ކުރިއަށްގެންދިއުމަށް މިހާރުވެސް ރާވާފައިވާކަމަށެވެ. އެގޮތުން ޓޯކް ޝޯވްތަކާއި، މިފަދަ އެކި އެކި ކަންކަން ކުރިއަށްދާނެ ކަމަށް މިނިސްޓަރ ވިދާޅުވިއެވެ.