ހުރިހާ ރަށެއްގައި ތާރު އެޅުން އެއީ ބުއްދިވެރި ގޮތެއް ނޫން - އަސްލަމް
16 ފެބުރުއަރީ 2022 | ބުދަ 05:44ކުދި ރަަށްރަށުގައި ލައިމް ބޭސްޑް ސްޓެބިލައިޒް ރޯޑް މެތަޑް ބޭނުން ކުރެވިދާނެ
މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މުޙައްމަދު އަސްލަމްއާ ސުވާލުކުރެއްވުން
ހުރިހާ ރަށެއްގައި ތާރު އެޅުން އެއީ ބުއްދިވެރި ގޮތެއް ނޫން ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މުޙައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ގއ.ކޮލަމާފުށީ މަގުތައް ތާރުއަޅައިގެން ޒަމާނީ ފެންވަރަށް ހެދުމުގެ މަސައްކަތާ ގުޅޭ ގޮތުން ވިލިނގިލި ދާއިރ ގެ މެންބަރު ސަޢުދު ޙުސައިން ކުރެއްވި ސުވާލަށް ޖަވާބު ދެއްވަމުން މިނިސްޓަރ އަސްލަމް ވިދާޅުވީ، ކޮލަމާފުށީގެ މަގުތައް ހެދުމަށް އާރްޑީސީއާ ހަވާލު ކުރެވިފައިވަނީ، ޑިޒައިން އެންޑް ބިލްޑް އުސޫލުން ކަމަށާއި، އަމަލީ މަސައްކަތް އަދި އެންމެ ފުރިހަމައަށް ފަށައިގަނެވިފައި ނެތް ނަމަވެސް މަސައްކަތް ކުރިއަށްދާ ކަމަށެވެ.
އަސްލަމް ވިދާޅުވީ، ރާއްޖޭގެ ރަށްރަށުގެ މަގުތައް ހެދުމަކީ، މިހާރު އެންމެ ޑިމާންޑް ބޮޑު މަސައްކަތް ކަމަށެވެ. މިހާރުވެސް 22 ރަށެއްގެ މަގު ހެދުމަށް ހަވާލުކުރެވި 19 ރަށެއްގެ މަގު ހެދުމުގެ މަސައްކަތް ޕްލޭން ކުރެވިފައި އެބައޮތް ކަމަށެވެ. ބަނދަރުތައް ހެދި ގޮތަށް މަގުތަކުގައި ތާރު އެޅުން ޓްރެންޑް ވަމުން އަންނަކަން އަސްލަމް ފާހަގަކުރެއްވިއެވެ.
ސަރުކާރުގެ ވިސްނުމަކީ ހުރިހާ ރަށެއްގެ މަގުތަކުގައި ތާރު އެޅުމެއް ނޫން ކަމަށާއި، ޓްރެފިކް ބޮޑު ރަށްރަށުގައި ތާރު އެޅައިގެން މަގު ހެދުން ކަމުގައެވެ.
މަގުތައް ހެދުން ބިނާވެފައި އޮންނަނީ މަގުތައް ބޭނުން ކުރެވޭ ގޮތަށް ކަމަށާއި، އެފަދަ ރަށްރަށަށް އެރުވޭނެ ވެހިކަލްތައްވެސް ކަނޑައެޅެން ޖެހޭ ކަމަށް މިނިސްޓަރ އަސްލަމް ވިދާޅުވިއެވެ. ތާރު ނާޅާ މަގުތައް ހެދިދާނެ ގޮތެއްވެސް އެބައޮތްކަން މިނިސްޓަރ ފާހަގަކުރެއްވިއެވެ. ކުދި ރަަށްރަށުގައި ލައިމް ބޭސްޑް ސްޓެބިލައިޒް ރޯޑް މެތަޑް ބޭނުން ކުރެވިދާނެ ކަމަށާއި، މި ގޮތަށް ހެދުމުން ވެހޭ ފެން ރަށުގެ ފަސްގަނޑަށް ހިނދިގެންދާނެ ކަމަށެވެ. ތާރު އެޅުމުން ވެހޭ ހުރިހާ ފެނެށް ރަށުން ބޭރު ކޮށްލާނެ ކަމަށާއި، އޭގެ އަސަރު އެރަށުގެ ފެން ފަށަލައަށް ކުރާނެ ކަމަށް ވިދާޅުވިއެވެ.
އެމަނިކުފާނުގެ ވިސްނުންފުޅާ ދެބަސްވާ މީހުން ތިބޭނެކަންވެސް ގަބޫލް ކުރައްވާ ކަމަށާއި، އެހެން ނަމަވެސް މަގުދެއްކުން އެއީ އޮތްކަމެއް ކަމަށް ވިދާޅުވިއެވެ. އަދި އެއީ ރަނގަޅުވެރިންގެ ސިފައެއް ކަމަށް ވިދާޅުވިއެވެ. އުމްރާނީ ތަރައްގީ ގެންނައިރު ޖަޒީރާވަންތަކަމެއްވެސް ރަށްރަށުގައި ހުންނަން ޖެހޭ ކަމަށް އަސްލަމް ވިދާޅުވިއެވެ.
