ރައީސް ޔާމީންގެ ޝަރީއަތް ލައިވް ނުކުރެވޭ ސަބަބު ކޯޓުން އޮޅުން ފިލުވާނަން - ރައީސް ނަޝީދު
ކޯޓުތަކުގައި މަންޒަރު ލައިވްކުރުމުގެ ގަވާއިދު އޮޅުންފިލުއްވާނެ ކަމަށް ރައީސް ނަޝީދު ވިދާޅުވި
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
އާރަށުގެ ޚިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ދެ ދައުވާގެ އަޑުއެހުން ލައިވް ކުރުމަށް ރައީސް ޔާމީންގެ ފަރާތުން ކޯޓުގައި އެދިފައިވާއިރު އެ ޝަރީއަތް ލައިވް ނުކުރެވިގެން އުޅެނީ ކީއްވެގެންތޯ ކޯޓުން އޮޅުން ފިލުއްވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާގައި ރައީސް ނަޝީދު ވިދާޅުވީ، އެމަނިކުފާނު ކޯޓުގައި އެވާހަކަ އައްސަވާނެ ކަމަށާއި، ކޯޓުތަކުގައި މަންޒަރު ލައިވްކުރުމުގެ ގަވާއިދު އެމަނިކުފާނަށް އެހާ ސާފުވެވަޑައިގެންފައި ނުވާ ކަމަށާއި، އެކަން ސާފު ކުރައްވާނެ ކަމަށެވެ.
މަގާމުގެ ނުފޫޒް ބޭނުންކޮށް ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފާއިވާ ދައުވާގެ ޝަރީއަތްތައް ލައިވްކޮށްގެން ކުރިއަށް ގެންދިއުމަށް ރައީސް ޔާމީންގެ ވަކީލުން ގެންދަނީ ތަކުރާރުކޮށް ކޯޓުގައި އެދެމުންނެވެ. އެހެންނަމަވެސް، އެކަމަށް ގޮތެއް ނިންމަވައި 27 ޖެނުއަރީގައި ބޭއްވި އަޑުއެހުމުގައި ގާޒީ ޝަކީލު ވަނީ, ޝަރީއަތް ލައިވް ނުކުރެވެނީ މިވަގުތު ކޯޓުގެ އިދާރީ އިންތިޒާމުތައް ހުރި ގޮތުން އެކަމުގައި ދަތިތަކެއް ހުރުމުންކަމަށް ވިދާޅުވެފައެވެ.
އެކަމާއި ގުޅިގެން ރާއްޖެއެމްވީން މައުލޫމާތު ސާފުކޮށްލުމުން އެނގިފައިވާ ގޮތުގައި, ކްރިމިނަލް ކޯޓުގައި ޝަރީއަތްތައް ލައިވް ނުކުރެވެނީ އެކަމަށް ބޭނުންވާ އިންސާނީ ވަސީލަތްތައް އެކަށީގެންވާ ގޮތެއްގައި ނެތުމުންކަން ވަނީ އެނގިފައެވެ. އެގޮތުން ކޯޓުގައި އައިޓީ އޮފިސަރެއް ނެތި 4 މަހަށްވުރެ ގިނަ ދުވަސްވެފައިވާކަން ރާއްޖެއެމްވީއަށް ވަނީ އެނގިފައެވެ.
ރައީސް ޔާމީނާއި އެމަނިކުފާނުގެ ގާނޫނީ ވަކީލުންގެ ޓީމުން ވަނީ ކޯޓުގެ ވަސީލަތްތައް ހަމަވުމުން ޝަރީއަތް ކުރިއަށް ގެންދިއުމަށް އެދިފައެވެ.
މި އަޑުއެހުމުގައި ދައުލަތުންވެސް ވަނީ ދިފާއުން އެދޭގޮތަށް ޝަރީއަތް ލައިވް ކުރުމަކީ ދައުލަތުގެވެސް އެދުންކަމަށް ފާހަގަ ކުރައްވާފައެވެ. އެގޮތުން ދައުލަތުގެ ސްޓޭންޑަކީ ކޮރަޕްޝަންގެ ހުރިހާ މައްސަަލައެއްވެސް އާންމުކޮށް ހުޅުވާލައިގެން ކުރިއަށް ގެންދިއުންކަމަށް ދައުލަތުން ވަނީ ބުނެފައެވެ.
ކޯޓުގައި ވަސީލަތް ނެތްނަމަ ރައީސް ޔާމީނުގެ މައްޗަށް މީގެ ކުރިން ކުރިއަށްދިޔަ ޝަރީއަތުގައި އަމަލުކުރިގޮތަށް، އަމިއްލަ ބަޔަކާ ނުވަތަ މީޑިއާއަކާ ހަވާލުކޮށްގެން ޝަރީއަތް ލައިވްކޮށް ބްރޮޑްކާސްޓް ކުރެވޭގޮތް ހަމަޖައްސައިދިނުމަށް ދިފާއީ ވަކީލުންގެ އިތުރުން ދައުލަތުގެ ވަކީލުންވެސް އެދިލެއްވިއެވެ.
އެ މައުޟޫއަށް ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ ވިދާޅުވީ، ކޯޓުގެ ވަސީލަތްތައް މިވަގުތު ހުރި ގޮތުން ޝަރީއަތްތައް ލައިވް ކޮށްގެން ކުރިއަށް ގެންދެވެން ނެތް ނަމަވެސް، އެއީ އަޑުއެހުންތައް މަޑުޖައްސާލަން ޖެހޭ ސަބަބެއް ނޫން ކަމަށެވެ. އެހެންނަމަވެސް، އަމިއްލަ ބަޔަކާ ހަވާލުކޮށްގެން އެ ކަން ކުރިއަށް ގެންދިއުމާމެދު ކޯޓުގެ ގާޒީންގެ މަޖިލީހުގައި މަޝްވަރާ ކުރެއްވިދާނެކަމަށް ގާޒީ ޝަކީލު ވިދާޅުވިއެވެ.
