ސަވާދީއްތަ ދަތުރު: ފަތުރުވެރިންނަށް ތަފާތު އުފާވެރި ދަތުރެއް

ރާއްޖޭގެ ޤައުމީ ބަތަލް އައްސުލްތާން މުހައްމަދު ތަކުރުފާނުލް އައުޒަމްގެ ދިރިއުޅުއްވުން ތީމެއްގެ ގޮތުގައި ބަލައިގެން ފަށާފައިވާ ސަވާދީއްތަ ދަތުރު ނިމެން ކައިރިވެފައިވާއިރު އެދަތުރަކީ ބައިވެރީންނަށް ވަރަށް ކަމުދިޔަ ދަތުރެކެވެ. އެގޮތުން މި ދަތުރުގެ ތެރޭގައި ތަފާތު އެކި ކަންކަންކަން ފަތުރުވެރިން ތަޖުރިބާ ކޮށްފައިވާއިރު، އެމީހުން ބުނާ ގޮތުގައި ރާއްޖެ މިއީ ފަތުރުވެރީންނަށް ތަފާތު އުފާވެރި މަންޒިލެކެވެ.

ރާއްޖެޓީވީގެ ފަސްދޮޅަސް މިނެޓުގައި ވާހަކަދައްކަމުން މި ދަތުރުގައި ބައިވެރިވި އެމެރިކާގެ ކީތު ނަމަކަށްކިޔާ ފަތުރުވެރިއަކު ބުނި ގޮތުގައި ފާއިތުވި ހަ އަހަރު އޭނާ ވަނި ދުނިޔޭގެ އެކި ސަރަހައްދުތަކުގައި ދަތުރުކޮށްފައެވެ. ނަމަވެސް ދަތުރުކުރި ހުރިހާ ތަނަކުންވެސް އެންމެ ހިތްގައިމު މަންޒިލަކަށް ފނުނީ ދިވެހިރާއްޖެ ކަމަށެވެ. ރާއްޖޭގެ ރަށްތަކުގެ ރައްޔިތުންގެ ފަރާތުން ލިބުނު މެހެމާންދާރީއެވެ. ސަގާފީ އެކު އާސާރުތަކާއި ކުޅިވަރުތަކެވެ. މީރު ކެއުންތަކެވެ.

ކީތު ފާހަގަކުރި ގޮތުގައި ރާއްޖެއަކީ ގެއްލިފައިވާ މުތެކެވެ. ކުރިން ރާއްޖޭގެ ވާހަކަ އަޑުއިވިފައި ނެތްނަމަވެސް މި ދަތުރާއެކު ރާއްޖެއަށް އޭނާގެ ހިތުގައި ޚާއްސަ ޖާގައެއް ދެވިފައިވާކަަމަށް އޭނާ ބުންޏެވެ. އަދި މުޅި ދުނިޔޭގެ ޔޮޓް ޑެސްޓިނޭޝަންތަކަށް ބެލި ނަމަވެސް އެ ލިސްޓުގެ އެންމެ ކުރީ ތިނެއްގައި ރާއްޖެ ހިމެނޭނެކަމަށް ކީތު ބުންޏެވެ.

މީގެ ކުރިން އަޑު އިވިފައިވާ ގޮތުގައި ރާއްޖޭގައި ޔޮޓުތައް އެންކަރު ކުރާނެ ރަނގަޅު ބަނދަރުތައް ނެތްކަން ފާހަގަކުރަމުން ކީތު ބުނީ ރާއްޖެ އައިސް މިކުރި ތަޖުރިބާއާއެކު ޔޮޓުތައް އެންކަރުކުރަން ރަނގަޅު ބަނދަރުތަކެއް ފެނިފައިވާ ކަމަށެވެ. އަދި ޔޮޓުތައް އެންކަރުކުރާނެ ރަނގަޅު ސްޕޮޓުތައް އެހެން ސެއިލަރުންނާއި ހަމައަށް ގެންގޮސްދީ ރާއްޖޭގެ ފަތުރުވެރިކަން އިތުރަށް ފުޅާކޮށްދިނުމުގައި އެހީތެރިވާނެކަމަށް ކީތު ބުންޏެވެ.

ރާއްޖޭގެ އުތުރުގެ ސަރަހައްދުތަކުގައި ފަތުރުވެރިކަން އެހާ ބޮޑަށް ކުރިއަރާފައި ނުވާއިރު، މި ދަތުރާއެކު އެސަރަހައްދުގެ ފަތުރުވެރިކަމަށް ވަރަށް ބޮޑު ކުރިއެރުމެއް ލިބިގެންދާނެކަމަށް ސަވާދީއްތަ ދަތުރު އިންތިޒާމްކުރާ އެމްއައިޓީޑީސީގެ މެނޭޖިންގ ޑިރެކްޓަރ މުހައްމަދު ރާއިދު ވިދާޅުވިއެވެ. އަދި ސެއިލިންގ ޓޫރިޒަމް ކުރިއެރުވުމަށްޓަކައި ގިނަ މަސައްކަތްތަކެއް ކުރަން އެބަހުރިކަން ފާހަގަކޮށް ރާއިދު ވިދާޅުވީ ބަނދަރުތަކުން ލިބޭ ޚިދުމަތްތައް އިތުރަށް ފުޅާކޮށް ފަހިކުރުން މުހިންމު ކަމަށެވެ. ވަރަށް އާދައިގެކޮށް ފަށައިގަތް ރާއްޖޭގެ ފަތުރުވެރިކަމަށް 50 އަހަރު އަދި ލޯކަލް ޓޫރިޒަމަށް ހުޅުވާލިތާ 11 އަހަރުވެފައިވާއިރު މިއީ ފަތުރުވެރިކަމަށް އިތުރު ކަންތައްތަކެއް ގެންނަންވީ ވަގުުކަން ރާއިދު ފާހަގަކުރިއެވެ.

ފަތުރުވެރިކަމަށް އައު ކަންތައްތަކެއް ތައާރަފުކޮށް ރާއްޖޭގެ މުއްސަނދިކަން އިޝްތިހާރު ކުރުމަށް ރާއްޖޭގައި މި ބާއްވާ ފުރަތަމަ ޔޮޓް ރެލީ "ސަވާދީއްތަ ދަތުރު" ރާވާ އިންތިޒާމު ކުރަނީ މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްއައިޓީޑީސީ) އިންނެވެ. މުލިއާގެއަށް 100 އަހަރު ފުރުމުގެ މުނާސަބަތުގައި ރައީސް ސާލިހު ދެއްކެވި ވާހަކަފުޅުން ޚިޔާލު ހޯދައިގެން އެމްއައިޓީޑީސީން މި ހަރަކާތް ކުރިއަށް ގެންދަނީ, މިނިސްޓްރީ އޮފް އަރޓްސް ކަލްޗަރ އެންޑް ހެރިޓޭޖް އަދި އެމްއެންޑީއެފްގެ ސިވެކް ކުންފުންޏާ ގުޅިގެންނެވެ. އެމްޓީޑީސީގެ އަމާޒަކީ މި ރިލޭ ކޮންމެ އަހަރަކު ވެސް ސިލްސިލާކޮށް ކުރިއަށް ގެންދިއުމެވެ.