ސީޝެލްސް އާއި ދެކޮޅަށް ރާއްޖެއިން ކުޅުނު އެކުވެރިކަމުގެ ފުރަތަމަ މެޗުން މޮޅުވެއްޖެއެވެ.
ގައުމީ ފުޓުބޯޅަ ދަނޑުގައި އަންގާރަ ދުވަހުގެރޭ ކުޅުނު މެޗު ރާއްޖެއިން ކާމިޔާބުކުރީ 1-0 ގެ ނަތީޖާއަކުންނެވެ. މިއީ މިދިޔަ ނުވަ އަހަރުގެ ތެރޭ ގައުމީ އަންހެން ފުޓުބޯޅަ ޓީމުން ގައުމީ ފުޓުބޯޅަ ދަނޑުގައި ކުޅުނު ބައިނަލްއަގްވާމީ އެކުވެރިކަމުގެ ފުރަތަމަ މެޗެވެ.
މި މެޗު ފަށައިގެން ސީޝެލްސް ޓީމުން ކުރިޔަށް ޖެހި ރާއްޖޭގެ ހާފަށް ބާރުބޮޑުކުރި ނަމަވެސް އެ ޓީމަށް ގޯލަށް ނުރައްކާކޮށް އެދެވޭ ހަމަލާއެއް ފޮނުވާލެވިފައެއް ނުވެއެވެ. އެކަމަކު މެޗުގެ 10 ވަނަ މިނެޓުގައި ރާއްޖެއިން ވަނީ ސީޝެލްސް ކޮޅަށް ލަނޑު ޖަހާ ލީޑު ނަގައިފައެވެ. ސީޝެލްސްގެ ޑިފެންޑަރުންނަށް ހެދުނު ގޯހެއްގެ ފައިދާ ނަގާ މި ލަނޑު ރާއްޖެއަށް ކާމިޔާބު ކޮށްދިނީ މަރިޔަމް ނޫރާއެވެ.
މި ލަނޑަށްފަހު ރާއްޖެއިން ކުރިޔަށް ޖެހި ސީޝެލްސްގެ ހާފަށް ބާރުބޮޑުކުރިއެވެ. ރާއްޖެއިން ލީޑު ފުޅާކުރަން އެންމެ ހުސްފުރުސަތެއް ލިބުނީ ފާތިމަތު ޝާލިޔާއަށެވެ. ހުސްކޮށްހުރެ ޝާލިޔާ ފޮނުވާލި ހަމަލާގެ ހުރަހަކަށްވީ ގޯލުގެ ހުރަސް ދަނޑިއެވެ.
ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފު ފަށައިގެން ޝާލިޔާ ފޮނުވާލި ހިލޭ ޖެހުން ސީޝެލްސްގެ ކީޕަރު މެންޑީ ވަނީ ހުށިޔާރުކަމާއެކު ދިފާއުކޮށްފައެވެ.
މެޗުގައި ޝީޝެލްސްއަށް ލަނޑު ޖަހަން އެންމެ ހުސް ފުރުސަތެއް ލިބުނީ އެ ޓީމުގެ ފޯވާޑް ނަތާޝާ ބީބީ އަށެވެ. އޭރިއާ ތެރެއިން މުޅިން ހުހަށްހުރެ އޭނާ ފޮނުވާލި ހަމަލާގެ ހުރަހަަކަށްވީ ރާއްޖޭގެ ކީޕަރު އާމިނަތު ލީޒާއެވެ.
މިރޭގެ މެޗުން ރާއްޖެ މޮޅުވިއިރު، މިއީ 2019 ވަނަ އަހަރުގެ ޑިސެމްބަރު މަހު ކުރިއަށްދިޔަ ސައުތު އޭޝިއަން ގޭމްސްގައި ސްރީ ލަންކާ ބަލިކޮށް ތިން ވަނަ ހޯދި ފަހުން ލިބުނު ފުރަތަމަ މޮޅެވެ. ރާއްޖޭން ކުރިއަށް އޮތް ދުވަސްތަކުގައި އިތުރު ދެ މެޗެއް ކުޅޭނެއެވެ.
ރާއްޖޭގެ އަންހެން ޓީމުން އަންނަ ބުރާސްފަތި ދުވަހުގެރޭ ނުކުންނާނީ ވެސް ސީޝެލްސްއާ ދެކޮޅަށެވެ. އަދި ފަހު މެޗުގައި އަންނަ ހަފްތާގެ ބުރާސްފަތި ދުވަހު ނުކުންނާނީ ސައުދީ އަރަބިއްޔާއާ ދެކޮޅަށެވެ.
