އޮރެންޖް ހިޔާގެ މަސައްކަތް ނިންމައި މާޗް މަހުގެ 15 ގައި ސަރުކާރާ ހަވާލުކުރާނެ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.
އޮރެންޖް ހިޔާގެ މަސައްކަތްތަކާއި ގުޅޭގޮތުން އެޗްޑީސީގެ މެނޭޖިންގ ޑިރެކްޓަރު ސުހައިލް އަހުމަދު ވިދާޅުވީ އޮރެންޖް ހިޔާގެ މަސައްކަތްތައް ކުރިއަށްދާ ކަމަށާއި، މިހާރު ކުރިއަށް ދަނީ ލިފްޓްގެ މަސައްކަތް އެކަނި ކަމަށެވެ. އެހުރިހާ މަސައްކަތްތައްކޮށް ނިންމާ މާޗް މަހުގެ 15 ގައި ސަރުކާރާއި އޮރެންޖް ހިޔާ ހަވާލުކުރެވޭނެ ކަމަށް ސުހައިލް ވިދާޅުވިއެވެ.
އެސްޓިމޭޓަކަށް އިންނާނީ މާޗް 15، އެންމެފަހުން ލާން ޖެހުނީ ލިފްޓެއް. ކުރިން އެތާގައި ހުރި ލިފްޓް އައިސީޔޫ ޕޭޝަންޓުންނަށް ގެންދިއުމަށް ތަންކޮޅެއް ދަތިވަނީ. އެ ލިފްޓް ކުޑަ. އެމަސައްކަތް އެދަނީ ކުރިއަށް.އެޗްޑީސީގެ މެނޭޖިންގ ޑިރެކްޓަރު ސުހައިލް އަހުމަދު
މާޗް މަހުގެ ތެރޭގައި އޮރެންޖް ހިޔާ ބޭނުންކުރަން ފަށާނެ ކަަމަށް ހުޅުމާލެ ހޮސްޕިޓަލުން ވެސް ބުނެފައިވެއެވެ.
މިހާރު ކޮވިޑް ފެސިލިޓީ ގާއިމު ކުރަމުންދާ އޮރެންޖް ހިޔާއަކީ ކުރީގެ ޑިސްޓްރިބިއުޝަން ސެންޓަރެކެވެ. މީގެ ކުރިން އެތަން ބޭނުންކޮށްފައިވަނީ ބިދޭސީން ކަރަންޓީން ކުރުމަށެވެ. ކޮވިޑް ފެސިލިޓީއެއްގެ ގޮތުގައި އެތަން ބޭނުންކުރަން ކުރަން ނިންމާފައިވަނީ ރާއްޖެއަށް ކުރިމަތިވި ކޮވިޑް-19ގެ ހަތަރު ވަނަ ރާޅާ ގުޅިގެންނެއެވެ. އެއީ ކޮވިޑަށް ޕޮޒިޓިވްވާ މީހުންނަށް ފަރުވާދެވޭނެ ރަނގަޅު ނިޒާމެއް ގާއިމުކޮށް ބެޑް ކެޕޭސިޓީ އިތުރުކުރުމުގެ ގޮތުން ކަމަށް ސަރުކާރުން ބުނެފައިވެއެވެ.
މިއީ 270 އެނދުގެ ޖާގައިގެ ފެސިލިޓީއެކެވެ.
