އަނިޔާގެ ސަބަބުން ސްޕޯޓިން ލިސްބަންއާ ދެކޮޅަށް ގްރީލިޝްއަށް ނުކުޅެވޭނެ

ޗެމްޕިއަންސް ލީގުގެ ދެވަނަ ބުރުގައި މެންޗެސްޓާ ސިޓީން ޕޯޗުގަލްގެ ސްޕޯޓިން ލިސްބަންއާ ދެކޮޅަށް ނުކުންނަ މެޗުގައި މިޑްފިލްޑަރު ޖެކް ގްރީލިޝްއަށް އަނިޔާގެ ސަބަބުން ނުކުޅެވޭނެ ކަމަށް ރިޕޯޓްތައް ބުނެފިއެވެ.

އިނގިރޭސި ޕްރިމިއާ ލީގުގައި މި ހަފްތާ ނޯވިޗް އަތުން 4-0 ގެ ނަތީޖާއަކުން ސިޓީ މޮޅުވި މެޗުގައި ވެސް ގްރީލިޝް ކުޅެފައެއް ނުވެއެވެ.

އެކަމަކު ގްރީލިޝްގެ އަނިޔާއާ ގުޅިގެން ސިޓީގެ ކޯޗު ޕެޕް ގާޑިއޯލާ ބުނީ އޭނާއަށް ލިބިފައިވަނީ ސީރިއަސް އަނިޔާއެއް ނޫން ކަމަށެވެ.

ގާޑިއޯލާ ބުނީ ގްރީލިޝްގެ އަނިޔާ މިހާރު ރަނގަޅުކަމަށެވެ. އެކަމަކު އަންގާރަ ދުވަހުގެރޭ ސިޓީން ކުޅޭ މެޗުގައި ގްރީލިޝް ނުފެންނާނެ ކަމަށެވެ. ގްރީލިޝްގެ އިތުރުން ކޯލް ޕަލްމާ އާއި ގެބްރިއަލް ޖެސުސް އަށް ވެސް ސްޕޯޓިން ލިސްބަންއާ ދެކޮޅަށް ކުޅޭ މެޗުގައި ނުކުޅެވޭނެ ކަމަށް ގާޑިއޯލާ ބުނެފައިވެއެވެ.

ޖެސުސްއަށް އަނިޔާވީ ބްރެޒިލްގެ ގައުމީ ޓީމަށް ކުޅެނިކޮށް މިދިޔަ މަހުއެވެ. އަދި 19 އަހަރުގެ ކޯލް ޕާލްމާ ވެސް ހުރީ އަނިޔާގައެވެ.

މިދިޔަ އަހަރުގެ ޗެމްޕިއަންސް ލީގުގެ ފައިނަލުގައި ސިޓީން ވާދަކުރިއިރު، ސިޓީ ބަލިކޮށް ޗެމްޕިއަންސް ލީގު ކާމިޔާބުކުރީ ޗެލްސީންނެވެ.

ސްޕޯޓިން މެޗުގެ ކުރިން މީޑިއާއާއި ވާހަކަ ދައްކަމުން ގާޑިއޯލާ ބުނީ ޗެމްޕިއަންސް ލީގުގެ ދެވަނަ ބުރުގައި އޮތުމަކީވެސް ލިބޭ ހިތްހަމަ ޖެހުމެއް ކަމަށެވެ. އަދި ޗެމްޕިއަންސް ލީގާއި އެއްވަރަށް ސިޓީއަށް އިނގިރޭސި ޕްރެމިއަރ ލީގުވެސް މުހިންމު ކަމަށް ގާޑިއޯލާ ބުނެފައިވެއެވެ.

ޗެމްޕިއަންސް ލީގުގެ ދެވަނަ ބުރުގައި ޕޯޗުގަލްގައި ސިޓީ އާއި ސްޕޯޓިން ބައްދަލުކުރާ މެޗު ފަށާނީ އަންގާރަ ދުވަހުގެރޭ ރާއްޖެ ގަޑިން 01:00 ގައެވެ.