ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)އިން ކުރިއަށްގެންދާ ރަށްފެހި ޕްރޮގްރާމްގެ ދަށުން މިއަހަރު 6،000 ގަސް އިންދުމަށް އަމާޒު ހިފައިފިއެވެ.
"ސްޓެލްކޯ ރަށްފެހި" ޕްރޮގްރާމްގެ ދަށުން, ސްޓެލްކޯއިން ޚިދުމަތްދޭ ހުރިހާ ރަށެއްގައި ގަސްއިންދާތާ މިއީ 4 ވަނަ އަހަރެވެ. މިއަހަރު ސްޓެލްކޯ ރަށްފެހި ހަރަކާތް ފަށާފައިވަނީ ހުޅުމާލޭގައި ހުންނަ ސްޓެލްކޯގެ އިންޖީނުގޭގައެވެ.
މި އަހަރުގެ ރަށްފެހި ޕްރޮގްރާމް ޝަރަފްވެރިކޮށްދެއްވީ، ރައްޔިތުންގެ މަޖިލީހުގެ ހޯރަފުށީ ދާއިރާގެ މެމްބަރު، އަދި މަޖިލީހުގެ އެންވަޔަރމަންޓް އެންޑް ކްލައިމެޓް ޗޭންޖް ކޮމިޓީގެ ޗެއަރ އަހުމަދު ސަލީމްއެވެ. މި ޕްރޮގްރާމް ފެއްޓެވުމުގެ ގޮތުން މެމްބަރު ސަލީމާއި، ސްޓެލްކޯގެ އެމްޑީ ހަސަން މުޣުނީ އަދި އެކުންފުނީގެ ޑީއެމްޑީ ޑރ. އަލީ އަޒުވަރު ވަނީ އެ ސަރަހައްދުގައި ދިވެހި ރުއް އިންދަވާފައެވެ. އަދި ކުރިއަށް އޮތް ރަމަޟާން މަހަށް ޚާއްސަކޮށްގެން ކަރާ ގަސްވެސް އިންދަވާފައިވެއެވެ.
މި ރަސްމިއްޔާތުގައި ސްޓެލްކޯގެ މެނޭޖިންގ ޑިރެކްޓަރ ހަސަން މުޣުނީ ވިދާޅުވީ، މިއީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ފެއްޓެވި ވަރަށް މުހިންމު ޕްރޮގްރާމެއް ކަމަށެވެ. އަދި އަމާޒަކީ ސްޓެލްކޯގެ ހުރިހާ މުވައްޒަފުން، ހުރިހާ އައުޓްލެޓެއްގައި 6000 ގަސް އިންދުން ކަމަށްް މުޣުނީ ވިދާޅުވިއެވެ. އަދި ގަސް އިންދުމުން ކުންފުނީގެ މުޅި މަސައްކަތްތައް ރަމްޒުކޮށްދޭކަމަށް މުޣުނީ ވިދާޅުވިއެވެ.
ހަމަ އެކަނި އަހަރެމެން ކުރާ ކަމަކީ ގަސްއިންދުމެއް ނޫން. ގަސް އިންދުމުން ރަމްޒުމިކޮށްދެނީ ކުންފުނީގެ މުޅި މަސައްކަތްތައް. ކުޑަކޮށް ފެށޭ ކަންކަން ރަނގަޅަށް ބެލެހެއްޓޭނަމަ އެކަމުގެ ފަސޭހަ ކުންފުނީގެ މުވައްޒަފުންނާ ޚިދުމަތް ހޯދާ ފަރާތްތަކަށް ލިބިގެންދާނެ. މިދިޔަ އަހަރު 5000ގަސް އިންދާފަ ވާއިރު، މިއަހަރުގެ ގޯލަކީ 6000 ގަސް އިންދުން.ސްޓެލްކޯގެ މެނޭޖިންގ ޑިރެކްޓަރ ހަސަން މުޣުނީ
މި ރަސްމިއްޔާތު ޝަރަފުވެރި ކޮށްދެއްވައި ވާހަކަފުޅުދައްކަވަމުން ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވީ, ސްޓެލްކޯ ފަދަ ކުންފުންޏަކުން ގަސްއިންދުމުގެ ޕްރޮގްރާމް ކުރިއަށް ގެންދިއުމަކީ ވަރަށް މުހިންމު ކަމެއް ކަމަށެވެ. އަދި ކުރިއަށްއޮތްތަނުގައި ވަކި ޕްރޮގްރާމެއްގެ ތެރެއިން ވަކި ދުވަހެއްގައި މިކަން ނުކުރި ނަމަވެސް އަބަދުވެސް ގަސްއިންދުން ކުރިއަށް ގެންދެވުމަށް ސަލީމް ވަނީ އެދިވަޑައިގެންފައެވެ. އަދި 2030 ވަނަ އަހަރުގެ ކުރިން ރާއްޖެއަކީ ކާރބަން ނިއުޓްރަލް ގައުމަކަށް ހެދުމަށް ކުރާ މަސައްކަތަށްވެސް ގަސް އިންދުން މުހިންމު ކަމަށް ސަލީމް ވިދާޅުވިއެވެ.
ރަށްފެހި ޕްރޮގްރާމަކީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ ރިޔާސީ ދައުރުގެ ފުރަތަމަ 100 ދުވަހުގެ ތެރޭގައި ފެއްޓެވި ޕްރޮގްރާމެކެވެ. 2019 ވަނަ އަހަރު ސްޓެލްކޯއިން ފެށި ރަށްފެހި ޕްރޮގްރާމްގެ ދަށުން މިހާތަނަށް ވަނީ 10،000އަށްވުރެ ގިނަ ގަސް އިންދާފައެވެ. އެގޮތުން 2019 ވަނަ އަހަރު ސްޓެލްކޯ ރަށްފެހި ޕްރޮގްރާމުގައި 2،000 ގަސް އިންދާފައިވާއިރު، ޖެހިގެން އައި 2020 ވަނަ އަހަރު 3،000 ގަސް, އަދި ކޮވިޑްގެ ދަތިހާލަތުގައި ފުރަބަންދުވެ ތިބެވެސް މި ޕްރޮގްރާމް އޭގެ އެންމެ ފުރިހަމަ ގޮތުގައި ކުރިޔަށްގެންގޮސް 2021 ވަނަ އަހަރު ވަނީ 5،000 ގަސް އިންދާފައެވެ.
