މީހާއަކީ ތެދުވެރިއެކޭ ނުވަތަ ރަނގަޅު މީހަކު ކަމަށް އެކެއްގެ ވެސް ނިއްކުރީގައި ޖަހާފައެއް ނުވޭ -  ނަޝީދު

މީހާއަކީ ތެދުވެރިއެކޭ ނުވަތަ ރަނގަޅު މީހަކު ކަމަށް އެވެސް މީހެއްގެ ނިއްކުރީގައި ޖަހާފަ ނުވާ ކަމަށާއި، އަބަދު ވެސް މީހަކު ކަނޑައެޅެނީ ރައްޔިތުންގެ ތެރެއިން ރުހުން ލިބޭ މީހުންގެ ތެރެއިން ކަމަށާއި، އެކަން ކުރެވެން އޮންނަ އެންމެ ރަނގަޅު ގޮތް ކަމަށް ފެނިފައި އޮތީ ވޯޓުނެގުން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ޖޭއެސްސީގެ މެމްބަރުންގެ 5 އަހަރުގެ މުއްދަތު 3 އަހަރަށް ބަދަލު ކުރެއްވުމަށް މަހިބަދޫ ދާއިރާގެ ޕީޕީއެމް މެމްބަރު އަހުމަދު ތޯރިގް ރައްޔިތުންގެ މަޖީލަށް ހުށަހެޅުއްވި ބިލަށް ބަހުސް އަށް ހުޅުވާލެއްވުމުގެ ކުރިން ވާހަކަ ދައްކަވަމުން ރައީސް ނަޝީދު ވިދާޅުވީ ޖުޑީޝަލް ސަރވިސަސް ކޮމިޝަނުން ކުރާންޖެހޭ މަސަކަތަކީ، ފަނޑިޔާރުންގެ ސުލޫކީ މަސައްކަތްތައް ބެލުމާއި، އެ މަސައްކަތުގެ ތެރެއިން ފަނޑިޔާރުގޭގެ ކަންކަން އިންސާފުވެރި ގޮތުގައި ކުރިއަށް ގެންދިއުމަށް ހިތްވަރުކުރުން ކަމަށެވެ. އަދި ފަނޑިޔާރުންނާ ބެހޭ ގޮތުން އުފުލާ ޝަކުވާތައް ބެލުމާއި، އެ ފަރާތްތަކާ މެދު އަޅަންޖެހޭ ފިޔަވަޅުތައް އެޅުމާއި، މަޤާމުން ވަކިކުރާންޖެހޭ މީހުން ވަކިކުރާން ހުށަހަޅަންޖެހޭ ފަރާތްތަކަށް ށަހެޅުމާއި، ޢަދުލުއިންޞާފު ގާއިމުކުރުމުގެ ކަންތައްތައް ހިންގުމުގައްޔާއި، ކޯޓުތަކާ ގުޅޭ އެހެނިހެން ކަންތައްތަކުގައި ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށް ލަފާދިނުމަކީ މިއަދު ޢަމަލުކުރަމުން މި ދާ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 150 ވަނަ މާއްދާގެ ދަށުން ޖޭ.އެސް.ސީއާ މަތިކޮށްފައިވާ މަސްއޫލިއްޔަތެއް ކަމަށެވެ.

ރައީސް ނަޝީދު ވިދާޅުވީ މިއީ މި ޤާނޫނުއަސާސީ އެކުލަވައިލެވުނުއިރުގައި ޢަމަލުކުރަމުން ގެންދިޔަ "ނޫ ޤާނޫނުއަސާސީ"ގައި ޝަރީޢަތް ހިންގުމާ ގުޅޭ ގޮތުން ކަނޑައަޅާފައި އޮތް ގޮތް ކަމަށެވެ. ޖޭ.އެސް.ސީގައި ސިޔާސީ މީހުނާއި އަދި ފަނޑިޔާރުން ވެސް މި ވަގުތު ހިމެނޭ ކަމަށާއި، މިއަދު މި ދެކެނީ، ޖޭ.އެސް.ސީގައި ސިޔާސީ މީހުންނާއި އަދި ފަނޑިޔާރުން ތިބެގެންނުވާނެ ކަމަށާއި، އެ ކޮމިޝަންގައި ދެ ބައިމީހުން ވެސް ހިމެނެނީ އެއް މިންވަރަކަށް ކަމަށެވެ.

އަދި ޤާނޫނުއަސާސީގެ 158 ވަނަ މާއްދާގައިވާ ގޮތުގެ މަތީން، ސުޕްރީމް ކޯޓާއި، ހައި ކޯޓާއި، ދަށު ކޯޓުތަކުގެ ފަނޑިޔާރުންގެ ތެރެއިން ޖުމުލަ ތިން ފަނޑިޔާރުން އެ ކޮމިޝަންގައި ތިއްބަވާ. ސިޔާސީ މީހުންގެ ތެރެއިން ތިން ބޭފުޅުން ނާ މިހަމީހުންގެ އިތުރުން އެ ކޮމިޝަންގައި ދެން ތިބޭ ހަތަރު މީހުންގެ ތެރެއިން ތިން މީހުންނަކީ ވެސް މަޖިލީހުން ކަނޑައަޅާ މީހުން ނުވަތަ ރައީސުލްޖުމްހޫރިއްޔާ ކަނޑައަޅުއްވާ މީހުން ކަމަށެވެ. އެ ނޫން ފަރާތަކަށް އެ ކޮމިޝަންގައި ހިމެނެނީ، ދިވެހިރާއްޖޭގެ ގާނޫނީ ވަކީލުކަން ކުރުމުގެ ހުއްދަ ލިބިފައިވާ ވަކީލުންގެ ތެރެއިން އެބައިމީހުން އިންތިޚާބުކުރާ ގާނޫނީ ވަކީލެއް ކަމަށެވެ. މަޖިލީހުގެ ރައީސް އެއީ ދައުލަތުގެ އެއް ބާރު ކަމަށާއި، އޭނާ ވެސް ޖޭ.އެސް.ސީގައި އިންނަންޖެހޭ ކަމަކީ އުނިކަމެއް ކަމަށެވެ.

އެހެންނަމަވެސް، މަޖިލީހުގެ މެންބަރުންގެ ތެރެއިން މެންބަރަކު ޖޭ.އެސް.ސީގައި އިނުމަކީ އެ ތަނަށް ސިޔާސީ ބާރުވެރިކަން ފޯރަންޖެހޭ މިންވަރަށް ފޯރުމަށް ބޭނުންތެރި ކަމެއް ކަމަށެވެ. ސިޔާސީ މީހުންނަކީ، ސީދާ ރައްޔިތުން އިންތިޚާބުކުރާ ބައެއް ކަމަށާއި، އެއިރެއްގައި ރައްޔިތުންގެ ވިންދު ހުރި ގޮތް ތަމްސީލުކުރުމަށް މަޖިލީހުގެ މެންބަރުން ނޫން ބައެއް ހަމަ އަދިވެސް ނެތް ކަމަށް ނަޝީދު ވިދާޅުވިއެވެ. އަދި ޖޭ.އެސް.ސީގެ މައިގަނޑު މަސައްކަތުގެ ތެރޭގައި ފަނޑިޔާރުންގެ ކަންކަން ބަލައި، ފަނޑިޔާރުންނާ ބެހޭ ގޮތުން އުފުލާ ޝަކުވާތައް ބަލައި، އެ ފަރާތްތަކާ މެދު އަޅަންޖެހޭ ފިޔަވަޅުތައް އެޅުން ހިމެނޭ ކަމަށާއި، އެ ހިމެނޭއިރު، ޖޭ.އެސް.ސީއަކީ ޤާނޫނުއަސާސީން އުފައްދާފައިވާ ވަކި ފަރާތަކަށް ބުރަނުވެ، މިނިވަން މުސްތަޤިއްލު މުއައްސަސާއެއް ކަމަށް ވާއިރު، އެ ތަނުގައި ގިނަ އަދަދެއްގެ ފަނޑިޔާރުން ތަމްސީލުވުމަކީ މަޞްލަޙަތު ފުށުއެރުން އެކަށީގެންވާ ކަމެއް ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވިއެވެ.

ރައީސް ނަޝީދު ވިދާޅުވީ މެންބަރު ގޮތްތަކެއް ހުށަހަޅުއްވާ ކަމަށާއި، މީހާއަކީ ތެދުވެރިއެކޭ ނުވަތަ ރަނގަޅު މީހަކު ކަމަށް އެކެއްގެ ވެސް ނިއްކުރީގައި ޖަހާފައެއް ނުވާ ކަމަށެވެ. އަދި އެއްވެސް މީހަކު ކަނޑައެޅެނީ ރައްޔިތުންގެ ތެރެއިން ރުހުން ލިބޭ މީހުންގެ ތެރެއިން ކަމަށެވެ. އަދި އެކަން ކުރެވެން އޮންނަ އެންމެ ރަނގަޅު ގޮތް ކަމަށް ފެނިފައި އޮތީ ވޯޓުނެގުން ކަމަށް ރައީސް ނަޝީދު ވިދާޅުވިއެވެ.