އާތިފް ޝަކޫރުގެ މައްޗަށް ކުރާ ދައުވާގައި މަދަނީ މިންގަނޑުން ގޮތެއް ކަނޑައެޅުން ދެން އޮންން އަޑުއެހުމެއްގައި

އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)ގެ ކުރީގެ ވެރިޔާ އިބްރާހިމް އާތިފް ޝަކޫރުއާ ދެކޮޅަށް އުފުލާފައިވާ މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ޤާނޫނާ ހިލާފުވި ކަމުގެ ދައުވާ މަދަނީ މިންގަނޑުން ކުރިއަށް ގެންދިއުމާމެދު ދެން އޮންނަ ޝަރީއަތުގެ މަޖިލީހެއްގައި ގޮތެއް ކަނޑައަޅުއްވާނެ ކަމަށް މައްސަލަ ބައްލަވާ ގާޒީ ވިދާޅުވެއްޖެއެވެ.

މި މައްސަލަ ކްރިމިނަލް ކޯޓުގައި ބައްލަވަނީ އިސްގާޒީ އަހުމަދު ޝަކީލެވެ.

ހޯމަ ދުވަހު މި މައްސަލައިގައި ކުރިއަށް ގޮސްފައިވަނީ ދިފާއީ ހެކި ހުށައެޅުމުގެ ބައެވެ. އެގޮތުން ދިފާއުން ވަނީ 4 ޝަފަހީ ހެކިން ހުށައަޅާފައެވެ. އޭގެ ތެރޭގައި ކުރީގެ އޮޑިޓަރ ޖެނެރަލް ނިޔާޒް އިބްރާހިމްގެ އިތުރުން، ޔާމީން އާދަމްއާއި، އަހުމަދު އަސްއަދުއާއި، އަބްދުﷲ އަޝްރަފް ހިމެނެއެވެ.

ޝަފަހީ ހެކިން ހުށައެޅުމަށްފަހު ދިފާއުން ވަނީ ކިތާބީ ހެކިންގެ ގޮތުގައި ދައުލަތުން ހުށައަޅާފައިވާ ބައެއް ލިއެކިއުންތައް ދިފާއަށް ބޭނުންވާކަން ފާހަގަ ކޮށްފައެވެ. ނަމަވެސް ދައުލަތުން ވަނީ އާންމު އުސޫލުގެ ތެރެއިން ދައުލަތުންނާއި ކޯޓުންވެސް އަމަލުކުރަމުންދާ ގޮތަށް، ޝަރީއަތުގެ ކުރިން ހުށައަޅާ ހުށައެޅުމެއްގެ ގޮތުން ދިފާއުން އެކަންކަން ހުށައެޅުމުން ދައުލަތުން ޖަވާބުދާރީވާނެ ކަމަށް ވިދާޅުވެފައެވެ.

މި އަޑުއެހުމުގައި އާތިފް ޝަކޫރުގެ ވަކީލު އާޒިމާ ޝަކޫރު ވަނީ މި މައްސަލައިގައި އާތިފް ކުރި ކުށް ޙަޤީޤަތުގައި ސާފު ކޮށްދެވިފައިނުވާކަމަށް ވިދާޅުވެފައެވެ. ނަމަވެސް އެހިސާބުން މައްސަލަ ބައްލަވާ ގާޒީ ޝަކީލް ވަނީ އެއީ ޝަރީއަތަށް ޤަބޫލު ކުރެވޭ ވާހަކައެއް ނޫންކަމަށް ވިދާޅުވެ، އަޑުއެހުންތައް ކުރިއަށް ދިޔަ ގޮތުގެ ތަފްސީލުތައް ހިއްސާ ކުރައްވާފައެވެ.

ގާޒީ ޝަކީލު ވިދާޅުވި ގޮތުގައި މި މައްސަލައިގެ ދައުވާ ސާފު ކޮށްދީ، ވަކީލަކު ހަމަޖައްސަން ފުރުސަތު ދެއްވީ 22 ސެޕްޓެމްބަރު 2020 ގައެވެ. އެއަށްފަހު 2 ނޮވެމްބަރު 2020 ގައި ބޭއްވި އަޑުއެހުމުގައިވެސް ދިފާއުން އިތުރު ވަގުތު ބޭނުންވާކަމަށް އެދިފައިވާތީ ދައުވާއަށް ޖަވާބުދާރީވުމަށް އިތުރު ވަގުތު ދެވިފައިވާނެކަމަށް ގާޒީ ވިދާޅުވިއެވެ. އަދި 25 ޖެނުއަރީ 2021 ގައި ބޭއްވި އަޑުއެހުމުގައި ދައުވާ ސާފު ކަމަށާއި، ދައުވާއަށް އިންކާރު ކަމަށް ވިދާޅުވެ ދިފާއުން ދައުވާއަށް އިންކާރު ކޮށްފައިވާކަމަށް ގާޒީ ވިދާޅުވިއެވެ. އެއާއެކު 23 ފެބްރުއަރީގެ އަޑުއެހުމުގައި ދައުލަތުން ވަނީ ހެކިވެސް ހުށައަޅާފައެވެ.

ނިމިފައިވާ މަރުޙަލާތައް އަލުން އިޔާދަކުރާނަމަ ޝަރީއަތަށް ދުވަހަކުވެސް ނިމުމެއް ނާންނާނެކަންވެސް ގާޒީ ފާހަގަ ކުރެއްވިއެވެ.

މި އަޑުއެހުމުގައި އާތިފްގެ ފަރާތުންވެސް ގިނަ ވާހަކަތަކެއް ދައްކާފައިވެއެވެ.

މައްސަލައިގެ ދެން އޮންނަ އަޑުއެހުމެއްގައި އޮންނާނީ މަދަނީ މިންގަނޑުން ކުރިއަށް ގެންދިއުމާއިމެދު ގޮތެއް ނިންމެވުމެވެ. އޭގެ ކުރިން ދެފަރާތަށްވެސް ޚުލާސާ ގޮތެއްގައި ފާހަގަ ކުރަން ބޭނުންވާ ކަންކަން ފާހަގަ ކުރެއްވުމަށް ގާޒީ ފުރުސަތު ދެއްވާނެއެވެ.