އޭޕްރީލް މަހުގެ ބިލްތައް ބޮޑުވީ، ހޫނު ގަދަވުމުގެ ސަބަބުން: ސްޓެލްކޯ
ކަރަންޓް ބިލް ބޮޑުވުމަށް ދިމާވާނެ ފަދަ އިދާރީ އެއްވެސް ބަދަލެއް ނުގެންނަން
ސްޓެލްކޯ ބިލްޑިން
އޭޕްރީލް މަހުގެ ކަރަންޓް ބިލް ބޮޑުވީ އެދުވަސްވަރަކީ ރާއްޖެއަށް ހޫނު ދުވަސްވަރަކަށް ވުމުގެ ސަބަބުން ކަމަށް ސްޓެލްކޯ އިން ބުނެފި އެވެ.
ސްޓެލްކޯގެ މީޑިޔާ އޮފިޝަލް އިބްރާހިމް ރައޫފް ވިދާޅުވީ، އޭޕްރީލް މަހުގެ ބިލް ބޮޑުވާނެ ފަދަ އިދާރީ ގޮތުން ގެންނަން ޖެހޭ އެއްވެސް ބަދަލެއް ގެނެސްފައިނުވާނެ ކަމަށެވެ. އަދި ކަރަންޓް ބިލް ބޮޑުވެއްޖެ ނަމަ ބޮޑުވެފައި ވާނީ، މޫސޫމީ ބަދަލުތަކާ ގުޅިގެން ކަމަށް އޭނާ ވިދާޅުވި އެވެ.
އޭޕްރީލް މަހުގެ ކަރަންޓް ބިލް ބޮޑުވެފައިވާ އިރު ގާތްގަނޑަކަށް، 700ރ. އާއި 500ރ. ބައެއް ކަރަންޓް ބިލްތަކުން ވަނީ ބޮޑުވެފަ އެވެ.
ރާއްޖެ އެމްވީއާ ވާހަކަ ދެއްކި ބައެއް މީހުން ބުނީ އެ ގެތަކުގައި އަބަދު ވެސް ހުންނަނީ އެއާކޯން ޖައްސާފައި ކަމަށާއި އޭޕްރީލް މަހު ވެސް އެހެން މަސްތަކުގައި ބޭނުން ނުކުރާ އެއްޗެއް ބޭނުންކޮށްފައި ނުވާ ކަމަށެވެ. ނަމަވެސް ދޭތެރެ ދޭތެރެއިން ކަރަންޓް ކަނޑައިގެން ދިއުމުގެ ސަބަބުން އެއާކޯން ވެސް ނިއްވާފައި ޖައްސަންޖެހުމުން ބިލް ބޮޑުވުން އެކަށީގެންވާ ކަމަށް އެމީހުން ބުންޏެވެ.
ރައޫފް ވިދާޅުވީ، ކަރަންޓް ބިލަށް 700ރ. އާއި 500ރ އަށް ބޮޑުވެގެންދާ ވަރަށް، ފިއުލް ސަރޗާޖު ބޮޑު ނުވާ ކަމަށެވެ. ފިއުލް ސަރޗާޖަށް އެންމެ ފަހުން ބަދަލު އައިސްފާ ވަނީ މިދިޔަ އޭފްރީލް މަހުގެ 23 ވަނަ ދުވަހު އެވެ. އެގޮތުން ވިއްކާ ކަރަންޓަށް ފިއުލް ސަރޗާޖު ގޮތުގައި ނަގަމުންދާވަރު ކޮންމެ ޔުނިޓަކުން 8 ޕަސެންޓް ވަނީ ކުޑަކުރެވިފަ އެވެ.
މިގޮތަށް ފިއުލް ސަރޗާޖު އަގުހެޔޮވެފައި ވަނީ، ޑީސަލް ލިބެން ހުންނަ އަގު ހެޔޮވުމުގެ ސަބަބުންނެވެ. އެގޮތުން، ޑީސަލް ގަންނަން ލިބެން ހުރީ، 09.18ރ. އަށް ކުޑަކުރެވިފަ އެވެ. މިއީ ކުރިން ވިއްކަން ލިބޭ އަގަށްވުރެ 10 ލާރި ކުޑަ އަދަދެކެވެ.
ސްޓެެލްކޯ އިން މިހެން ބުނި ނަމަވެސް އޭޕްރީލް މަހުގެ ބިލް ބޮޑުވުމުގެ ސަބަބުން، ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. ބައެއް ފަރާތްތަކުން ވަނީ ކަރަންޓް ބިލްތައް ތަފާތު ފެންނަ ގޮތަށް ސޯޝަލް މީޑިއާގައި ވެސް ހިއްސާކޮށްފައެވެ. މިދިޔަ ދެ މަސް ދުވަހަކީ، މާލެއިން ކަަރަންޓް ގިނައިން ކެނޑުނު ދުވަސްވަރެކެވެ. މިކަމާ ގުޅިގެން ވެސް މާލޭގައި ދިރިއުޅޭ ރައްޔިތުން ކަންބޮޑުވުން ފާޅުކޮށްފައި ވެއެވެ.
