އެމްޓީސީސީއަށް ދައްކަންޖެހޭ ފައިސާގެ މައްސަލައެއްގައި ދިވެހި ރައްޔިތުންގެ ޕާޓީ (ޑީއާރުޕީ)ގެ ލީޑަރު އަދި ކާށިދޫ ދާއިރާގެ މެންބަރު އަބްދުﷲ ޖާބިރު ހައްޔަރުކޮށްގެން ކޯޓަށް ހާޒިރުކުރުމުގެ އަމުރެއް ސިވިލް ކޯޓުން ނެރެފިއެވެ.
މި މައްސަލައަކީ ޑީއާރްޕީން 2007 އިން 2009 އާއި ދެމެދު އެމްޓީސީސީން ހޯދާފައިވާ ޚިދިމަތްތަކަށްވާ 1.1 މިލިއަން ރުފިޔާ ނުދައްކާ މައްސަލައެކެވެ. މި މައްސަލާގައި ސިވިލް ކޯޓާއި ހައިކޯޓުންވެސް ވަނީ އެ ފައިސާ ދެއްކުމަށް ޑީއާރުޕީގެ މައްޗަށް ހުކުމްކޮށްފައެވެ. އަދި މި މައްސަލަ އިސްތިއުނާފް ކުރުމުގެ ހުއްދަ ނުދޭން ސުޕްރީމް ކޯޓުން އޮތީ ނިންމާފައެވެ. އެހެންނަމަވެސް މިހާތަނަށް އެފައިސާ ޑީއާރްޕީން އެމްޓީސީސީއަށް ދައްކާފައި ނުވެއެވެ.
ސިވިލް ކޯޓުން ބުނެފައިވަނީ ކާށިދޫ ދާއިރާގެ މެންބަރު އަދި ޑީއާރުޕީގެ ލީޑަރު އަބްދުﷲ ޖާބިރު ހައްޔަރުކޮށްގެން ހޯމަ ދުވަހު އެ ކޯޓަށް ހާޒިރުކުރުމަށް ނިންމީ އެމްޓީސީސީން ޑީއާރްޕީގެ މައްޗަށް އުފުލާފައިވާ ދައުވާގެ މައްސަލައިގައި ކަމަށެވެ.
ޑީއާރުޕީގެ ލީޑަރުކަމަށް އަބްދުﷲ ޖާބިރު ވަޑައިގަތުމުގެކުރިން އެޕާޓިގެ ލީޑަރަކަށް ހުންނެވީ ނޮޅިވަރަމް ދާއިރާގެ ކުރީގެ މެންބަރު މުޙައްމަދު ނަޝީދު (ކާނަލް)އެވެ.
