އެމްޑީޕީގެ ޗެއަރޕަރސަން ކަމަށް ކުރިމަތިލުމަށް ނިންމައިފިން، ޕާޓީގެ މެމްބަރުންގެ ތާއީދަށް އެދެން: ފައްޔާޒް
އަމާޒަކީ ޕާޓީ އިތުރަށް ހަރުދަނާ ކުރެއްވުމާއި އެމްޑީޕީގެ ހެޔޮ ވެރިކަން ދެމެހެއްޓެވުން ކަމަށް ވިދާޅުވި
އިކޮނޮމިކް މިނިސްޓަރ ފައްޔާޒް އިސްމާއިލް
އެމްޑީޕީގެ ޗެއަރޕަރސަން ކަމަށް ކުރި،މަތިލެއްވުމަށް ނިންމަވާފައިވާކަން އިކޮނޮމިކް މިނިސްޓަރ ފައްޔާޒް އިސްމާއިލް ހާމަ ކުރައްވައިފިއެވެ.
އެކަން ހާމަ ކުރައްވައި ފައްޔާޒް ކުރެއްވި ޓްވީޓެއްގައި ވިދާޅުވީ، އަމާޒަކީ ޕާޓީ އިތުރަށް ހަރުދަނާ ކުރެއްވުމާއި އެމްޑީޕީގެ ހެޔޮ ވެރިކަން ދެމެހެއްޓެވުން ކަމަށެވެ.
ފައްޔާޒް ވަނީ ޕާޓީގެ މެމްބަރުންގެ ތާއީދަށް އެދިވަޑައިގެންފައެވެ. އަދި މި އިންތިޚާބުގެ ސަބަބުން ޕާޓީ އިތުރަށް ހަރުދަނާވެގެންދާނެ ކަމާމެދު ޝައްކެއް ނެތްކަމަށްވެސް ފައްޔާޒް ވިދާޅުވިއެވެ.
ފައްޔާޒް އެމްޑީޕީގެ ޗެއަރ ޕަރސަން ކަމަށް ވާދަ ކުރައްވާނެކަން އިއުލާނު ކުރައްވާފައިވާއިރު، މަގާމަށް ކުރިމަތިލައްވާނެ ކަމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީވެސް ވަނީ ހާމަ ކުރައްވާފައެވެ.
އެމްޑީޕީގެ އަސާސީ ގަވާއިދު ބުނާ ގޮތުން ޗެއާޕާސަންގެ މަގާމު ހުސްވާތާ 60 ދުވަހުގެ ތެރޭގައި އިންތިހާބު ބާއްވާ މަގާމަށް މީހަކު އައްޔަނު ކުރަންޖެހެއެވެ. އެ މަގާމުގައި ވޭތުވެދިޔަ ފަސް އަހަރު ހުންނެވީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފެވެ. މިއީ މި މަގާމުގައި ދައުރު ހަމަކުރެއްވި ފުރަތަމަ މެމްބަރެވެ.
