ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ އެތެރޭގެ ތިން އިންތިޚާބަކަށް ކުރިމަތިލުމުގެ ފުރުސަތު ހުޅުވާލައިފިއެވެ.

އެމްޑީޕީން ބުނީ އެޕާޓީގެ ޗެއަރޕާސަން މަގާމާއި އަންހެނުންގެ ރޫހު، ޒުވާނުންގެ ހިއްވަރުގެ ރައީސް އަދި ނައިބް ރައީސް ކަމުގެ މަގާމުގެ އިންތިޚާބު 16 އޭޕްރީލް 2202 ވާ (ހޮނިހިރު) ދުވަހު ބޭއްވުމަށް ހަމަޖެހިފައިވާ ކަމަށެވެ.

އެހެންކަމުން ޗެއަރޕާސަންގެ މަގާމާއި އަންހެނުންގެ ރޫހު، ޒުވާނުންގެ ހިއްވަރުގެ ރައީސް އަދި ނައިބް ރައީސް ކަމުގެ މަގާމަށް ވާދަކުރަން ބޭނުންވާ ޕާޓީގެ މެންބަރުން ޕާޓީގެ އިންތިޚާބުތަކުގައި ވާދަކުލުމަށް އެދޭފޯމް ފުރިހަމަކޮށް ފޯމާއެކު ހުށައަޅަންޖެހޭ ހުރިހާ ލިޔެކިޔުންތަކާއެކު ޕާޓީގެ އިންތިޙާބާއި ބެހޭ ކޮމިޓީގެ އީމެއިލް [email protected] އަށް 19 ފެބްރުއަރީ 2022ވާ ހޮނިހިރު ދުވަހުގެ ހަވީރު 4:00ގެ ކުރިން ފޯމްހުށަހެޅުމަށް އެދޭ ކަމަށެވެ. ކެންޑިޑޭޓުންގެ ނަންތައް 22 ފެބްރުއަރީގައި ހަވީރު 4:00 ގައި އިއުލާން ކުރާނެއެވެ.

މި އިންތިޚާބަށް ކުރިމަތިލުމަށް އެދޭފޯމް އެޕާޓީގެ ވެބްސައިޓުން ވެސް ލިބެން ހުންނާނެއެވެ.

މިއިންތިޚާބުތަކާއި ގުޅޭގޮތުން މައުލޫމާތު ދިނުމަށް އެމްޑީޕީގެ އޮފީހުގައި ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި އިންތިޚާބާއި ބެހޭ ކޮމެޓީގެ މުޤައްރިރު މުހައްމަދު އިސްމާއިލް މަނިކު ވިދާޅުވީ އިންތިޚާބުތައް ބޭއްވުމަށް ވާންޖެހޭ ތައްޔާރީތައް ވަމުންދާ ކަމަށެވެ. އިންތިޚާބުތަކުގައި ވޯޓުލެވޭ މީހުންނަށް އިޝާރާތް ކުރައްވައި މަނިކު ވިދާޅުވީ އަސާސީ ގަވާއިދުގެ 95 ވަނަ މާއްދާގައި ވަރަށް ސާފުކޮށް ބަޔާންކޮށްފައިވާ ގޮތަށް، ވޯޓު ލެވޭނީ ޕާޓީގައި ރަޖިސްޓްރީ ކޮށްފައިވާ މީހުންނަށް ކަމަށެވެ. މަނިކު ވިދާޅުވީ އިންތިޚާބު ކުރިއަށްދާއިރު ކޮންމެ ކެންޑިޑޭޓަކަށް ވެސް ދެ މަންދޫބުން ދޭނެ ކަމަށާއި، ނަމަވެސް ވޯޓު ފޮށި ކައިރީގައި މަސައްކަތް ކުރެވޭނީ އެންމެ ކެންޑިޑޭޓަކަށް ކަމަށެވެ.

މީގެ އިތުރުން މަނިކު ވިދާޅުވީ ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު 28 ފެބްރުއަރީ އިން 10 މާޗު 2022 ގެ ހަވީރު 4:00 އަށް ހުޅުވާލާފައިވާ ކަމަށެވެ. އަދި ފައިނަލް ވޯޓާސް ލިސްޓް 16 މާޗް 2022 ގައި އިއުލާންކުރާނެ ކަމަށެވެ.