ކްރިމިނަލް ކޯޓުގައި ތާވަލު ކުރެވުނު ނިސްބަތުން އެންމެ ގިނަ މައްސަލަ ކުރިއަށް ގެންދެވީ ގާޒީ ދީބާނާޒް، އެންމެ މަދުން ގާޒީ ޙަސަން ސައީދު

ޖެނުއަރީ މަހު ކްރިމިނަލް ކޯޓުގައި ޝެޑިއުލް ކުރެވުނު ނިސްބަތުން އެންމެ ގިނަ މައްސަލަ ކުރިއަށް ގެންދެވީ ގާޒީ ދީބާނާޒް، އެންމެ މަދުން ގާޒީ ޙަސަން ސައީދުއެވެ.

އެ މައުލޫމާތުތައް ހާމަ ކުރައްވާފައިވަނީ ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމްއެވެ. ޝަމީމް ވަނީ ނިމިގެން ދިޔަ ޖެނުއަރީ މަހު ޖިނާއީ މައްސަލަތައް ކުރިއަށް ގޮސްފައިވާ ގޮތުގެ ތަފްސީލީ ތަފާސްހިސާބުތައް އޭނާގެ ބްލޮގްގައި ހިއްސާ ކުރައްވާފައެވެ. އެގޮތުން ކްރިމިނަލް ކޯޓުގައި ޝެޑިއުލް ކުރެވުނު ނިސްބަތުން އެންމެ ގިނަ މައްސަލަ ކުރިއަށް ގެންދެވީ އެ ކޯޓުގެ ގާޒީ ދީބާނާޒް ފަހުމީކަމަށް ޝަމީމް ވިދާޅުވިއެވެ. ގާޒީ ދީބާނާޒް 22 މައްސަލައެއް ތާވަލު ކުރައްވާފައިވާއިރު، އޭގެ ތެރެއިން 19 މައްސަލައެއް ކުރިއަށް ގެންގޮސްފައިވެއެވެ. އެއީ ތާވަލު ކުރެއްވި މައްސަލަތަކުގެ 86.36 އިންސައްތައެވެ.

އޭގެ އިތުރުން، ޖެނުއަރީ މަހު ކްރިމިނަލް ކޯޓުގައި މައްސަލަތައް ތާވަލު ކޮށްފައިވާ ނިސްބަތަށް ބަލާއިރު އެންމެ މަދުން މައްސަލަތައް ކުރިއަށް ގެންދެވީ ގާޒީ ޙަސަން ސައީދުކަން އެ ތަފާސްހިސާބުތަކުން އެނގެއެވެ. އެގޮތުން ގާޒީ ޙަސަން ސައީދު 32 މައްސަލައެއް ތާވަލު ކުރައްވާފައިވީނަމަވެސް އޭގެ ތެރެއިން ކުރިއަށް ގެންދެވިފައިވަނީ 6 މައްސަލައެވެ. އެއީ ތާވަލު ކުރެއްވި މައްސަލަތަކުގެ 18.75 އިންސައްތައެވެ.

ގާޒީ ދީބާނާޒްގެ އިތުރުން ދެން އެންމެ ގިނަ މައްސަލަތައް ކުރިއަށް ގެންދެވި ފަނޑިޔާރުންނަކީ އެ ކޯޓުގެ އިސްގާޒީ އަހުމަދު ޝަކީލާއި، ގާޒީ ޙުސައިން ފާއިޒު ރަޝާދުއެވެ. އެބޭފުޅުން ވަނީ ތާވަލު ކުރެއްވި މައްސަލަތަކުގެ ތެރެއިން 50 އިންސައްތައަށްވުރެ ގިނަ މައްސަލަ ކުރިއަށް ގެންދަވާފައެވެ.

ކްރިމިނަލް ކޯޓަށް ދާދި ފަހުން ގުޅިވަޑައިގެންނެވި ގާޒީ އަލީ ނަދީމްވެސް ވަނީ 50 އިންސައްތަ މައްސަލަ ކުރިއަށް ގެންދަވާފައެވެ.

ގާޒީ ޙަސަން ސައީދުގެ އިތުރުން ދެން އެންމެ މަދުން މައްސަލަތައް ކުރިއަށް ގެންދެވި ފަނޑިޔާރުންގެ ތެރޭގައި ގާޒީ މުޙައްމަދު މިޞްބާޙުއާއި، ގާޒީ އިސްމާޢީލް ޝަފީޢު ހިމެނެއެވެ. އެބޭފުޅުން ކުރިއަށް ގެންދަވާފައިވަނީ ތާވަލު ކުރެއްވި މައްސަލަތަކުގެ ތެރެއިން 29 އިންސައްތަ މައްސަލައެވެ.

މައްސަލަ ކުރިއަށް ގެންދެވި ގޮތުގެ ތަފްސީލުތަކުގެ އިތުރުން، އެ މުއްދަތުގައި އެންމެ ގިނަ މައްސަލަ ނިންމެވި ފަނޑިޔާރުންގެ ތަފާސްހިސާބުތައްވެސް ޝަމީމް ވަނީ ހިއްސާ ކުރައްވާފައެވެ. އެގޮތުން ކްރިމިނަލް ކޯޓުން އެންމެ ގިނަ މައްސަލަ ނިންމެވީ ފަނޑިޔާރު އާދަމް މުޙައްމަދުއެވެ.

މި މުއްދަތުގެ ތެރޭގައި ޕީޖީ އޮފީހުން ކޯޓުތަކަށް ހުށައެޅި މައްސަލަތަކަށް ބަލާއިރު، އެންމެ ގިނަ މައްސަލަ ކެންސަލްވެފައިވަނީވެސް ކްރިމިނަލް ކޯޓުގައެވެ. އެގޮތުން 272 އަޑުއެހުން ކެންސަލްވެފައިވެއެވެ.

ޝަމީމް ވިދާޅުވި ގޮތުގައި މި ހިސާބުތައް ނަންގަވައި، އެއްކުރައްވައި ޢާންމުކުރެއްވުމުގެ މަސައްކަތަކީ، އަދި މުޅިން އަލަށް ކުރަން ފައްޓަވާ މަސައްކަތެކެވެ. އަންނަ މަހުގެ ހިސާބުތަކުގައި، މަތީ މަރްޙަލާގެ ކޯޓުތަކުގެ ހިސާބުތައްވެސް ހިމެނުއްވުމަށް މަސައްކަތް ކުރައްވަމުން ގެންދަވާކަން ޝަމީމް ފާޙަގަ ކުރެއްވިއެވެ.