ކުޅުދުއްފުށި ސިޓީގައި އިމާރާތްކުރާ 400 ހައުސިން ޔުނިޓް 10 ފަންގިފިލާއަށް ނެގުމުގެ ހުއްދަ ލިބިފައިވާ ކަމަށާއި، އެމަސައްކަތް ކުރަމުންދަނީ ރައްޔިތުންނަށް ފަހި ދިރިއުޅުމެއް ލިބޭ ޕްލޭންއަކާއެކު ކަމަށް އެސިޓީގެ މޭޔަރު މުހައްމަދު އާތިފް ވިދާޅުވެއްޖެއެވެ.

ކުޅުދުއްފުށި ސިޓީގެ ތަރައްގީ އާއި ގުޅޭގޮތުން ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން މޭޔަރު އާތިފް ވިދާޅުވީ ފަސް އަހަރުގެ ތަރައްގީގެ ޕްލޭން އެކުލަވާލާފައިވަނީ ރައްޔިތުންގެ ވަރަށް ގިނަ ހިޔާލާ އެއްގޮތަށް ކަމަށެވެ. ޚާއްސަ ގޮތެއްގައި ބޯހިޔާވަހިކަމަށް ދިމާވާވެފައިވާ މައްސަލަ ހައްލު ކުރުމަށް ކުރަމުންދާ މަސައްކަތުގައި ރައްޔިތުންގެ މަޝްވަރާ ހޯދަމުންދާ ކަމަށް މޭޔަރު ވިދާޅުވިއެވެ.

މޭޔަރު ވިދާޅުވީ ކުޅުދުއްފުއްޓަކީ ބިމުގެ ދަތިކަން ކުރިމަތިވެފައިވާ ރަށަކަށްވާތީ ހިއްކާފައިވާ ބިން ވީހާ ވެސް ގިނަ ރައްޔިތުންނަށް ބޭނުންކުރެވޭ ގޮތަށް ޕްލޭން ކުރުމަށް ރައްޔިތުން ހިޔާލު ދީފައިވާ ކަމަށާއި، އެކަމަށް މެޖޯރިޓީ ރައްޔިތުން ތާއީދު ކުރާ ކަމަށެވެ. އެ މަޝްވަރާގެ ދަށުން މިހާރު އިމާރާތް ކުރުމަށް ނިންމާފައިވާ 400 ހައުސިން ޔުނިޓް 10 ފަންގިފިލާ އަށް ނަގަން ނިންމާފައިވާ ކަމަށާއި، އެޓަވަރުތަކާއެކު ގިނަ ބަޔަކަށް ބޯހިޔާވަހިކަން ލިބޭނެ ކަމަށް އޭނާ ވިދާޅުވިއެވެ. މޭޔަރު ވިދާޅުވީ އެޓަވަރުތަކުގެ ފްލެޓްތަކުގައި ތިން ކޮޓަރިއާއި، ބޮޑު ސިޓިން ރޫމެއް އަދި ބެލްކަންޏެއް ހުންނާނެ ކަމަށާއި، ކޮންމެ ކޮޓަރިއެއްގައި އެޓޭޗްޑް ފާހަނާ ހުންނާނެ ކަމަށެވެ. އަދި ވިދާޅުވީ ކޮންމެ އެޕާޓްމެންޓެއް ބޮޑުވާނެ ކަމަށާއި އެއީ ރައްޔިތުން އެދޭފަދަ ތަނަވަސް އެޕާޓްމެންޓެއް ކަމަށެވެ.

މީގެ އިތުރުން މޭޔަރު ވިދާޅުވީ 400 ހައުސިން ޔުނިޓް 4 ފަންގިފިލާ އަށް އިމާރާތް ކުރާނަމަ ލިފްޓެއް ނުހުންނާނެ ކަމަށާއި، އެކަމުގެ ސަބަބުން ގިނަ ބަޔަކަށް ދަތިތައް ކުރިތިވާނެ ކަމަށެވެ. އަދި ޚާއްސަ އެހީތެރިކަން ބޭނުންވާ މީހުންނަށް މާބޮޑަށް ދަތިވާނެ ކަމަށް މޭޔަރު ވިދާޅުވިއެވެ. ނަމަވެސް 10 ފަންގިފިލާ އަށް އިމާރާތް ކުރުމާއެކު ކޮންމެ ޓަވަރެއްގައި ވެސް ލިފްޓް ހުންނާނެ ކަމަށާއި، އެފަދަ މައްސަލަތައް ކުރިމަތިނުވާނެ ކަމަށް އޭނާ ވިދާޅުވިއެވެ.

މޭޔަރު ވިދާޅުވީ ހައުސިން ޔުނިޓް އިމާރާތް ކުރާ ސަރަހައްދު ތަރައްގީކުރާނެ ޕްލޭން އެކުލަވާލާފައިވާ ކަމަށާއި، ތޮއްޖެހުމާއި، އަދިވެސް ދިމާވެދާނެ އިޖްތިމާއީ މައްސަލަތަކަށް ހައްލު ހޯދޭނެ ގޮތަށް އިންތިޒާމްތައް ހަމަޖައްސާނެ ކަަމަށެވެ. 400 ހައުސިން ޔުނިޓްގެ މަޝްރޫއުގެ އިތުރުން 1000 ހައުސިން ޔުނިޓްގެ މަޝްރޫއުގެ މަޝްވަރާތައް ކުރިއަށްދާ ކަމަށް މޭޔަރު ވިދާޅުވިއެވެ. އަދި ވިދާޅުވީ ދާދި އަވަހަށް އެމަޝްރޫއުގެ މަސައްކަތްތައް ވެސް ހަމަޖެހޭނެ ކަމަށް އުންމީދުކުރާ ކަމަށެވެ.

400 ހައުސިން ޔުނިޓްގެ މަސައްކަތް ކުރިއަށްދާނީ އަލަށް ހިއްކާފައިވާ 28 ހެކްޓަރުގެ ބިމުގައެވެ.