ރީޖަނަލް ޕޯޓުތައް ހިނގާނީ މިނިވަން ކުންފުންޏެއްގެ ގޮތުގައި: ޝަރީފް

ރާއްޖޭގައި ގާއިމުކުރެވޭ ރީޖަނަލް ޕޯޓުތައް ހިންގާނީ މިނިވަން ކުންފުޏެއްގެ ގޮތުގައި ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ޗެއަރމަން މުހައްމަދު ޝަރީފް (ސެންކޯ ޝަރީފް) ވިދާޅުވެއްޖެއެވެ.

އައްޑޫ ސިޓީ، ފުވައްމުލައް އަދި ކުޅުދުއްފުށި ސިޓީގައި ދަނީ ޕޯޓުތައް ގާއިމްކުރުމުގެ މަސައްކަތް ކުރަމުންނެވެ. މިޕޯޓުތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން ޝަރީފް ވިދާޅުވީ, އެމްޕީއެލްގެ ދަށުން ޕޯޓުތައް ހިންގި ނަމަވެސް އެޕޯޓުތައް ހިންގަމުންދާނީ އެ ރީޖަންއަށް ފައިދާވާގޮތަށް ކަމަށާއި، ވަކި ކުންފުންޏެއްގެ ދަށުން ކަމަށެވެ. އަދި ކުންފުނީގެ ބޯޑެއް އުފައްދައި، ޗެއަރމަނުންނާއި، ބޯޑު މެމްބަރުންނާއި، ކުންފުނީގެ ސީއީއޯ އަދި ޑެޕިއުޓީ ސީއީއޯއެއް އައްޔަންކުރާނެކަމަށެވެ.

ޝަރީފް ވިދާޅުވީ, ޕޯޓު ތަރައްގީކުރުމުގައި ބިޒްނަސް އެކުލަވާލައި، ހުރިހާ މަސައްކަތެއް ކުރާނީ ޕޯޓަށް ޚާއްސަކުރާ ކުންފުނިން ކަމަށެވެ. އެގޮތުން ބޯޑު އުފެއްދުމަށް އިއުލާންކުރާނެ ކަމަށް އޭނާ ވިދާޅުވިއެވެ.

ރައްޔިތުންނަށް ޚިދުމަތް ދިނުމުގައި ލުއި ގޮތްތައް ހަމަޖައްސާނެކަން ފާހަގަކުރައްވައި ޝަރީފް ވިދާޅުވީ, ރީޖަންތަކުގެ ޕޯޓުތައް މާލޭގެ ޕޯޓާ ވަރަށް ތަފާތުވާނެ ކަމަށާއި، ޖާގައިގެ ދަތިކަމެއް ކުރިމަތިވާނެކަމަށް ނުބެލެވޭ ކަމަށެވެ. އަދި މިހާރު ކައުންސިލްތަކަށް ލިބިދީފައިވާ ބާރުގެ ދަށުން, މިފަދަ ޕޯޓުތައް ހިންގުމުގައި ކައުންސިލްތަކުގެ އެއްބާރުލުން ލިބޭނެކަމަށް އުންމީދުކުރައްވާ ކަމަށް އޭނާ ވިދާޅުވިއެވެ.

ޝަރީފް ވިދާޅުވީ ޕޯޓުތައް ތަރައްގީ ކުރެވި އޮޕަރޭޓް ކުރެވެން ފެށުމާއެކު، ވިޔަފާރިވެރިންނާއި ރައްޔިތުންނަށް ބޮޑެތި ލުއިފަސޭހަތަކެއް ލިބޭނެ ކަމަށެވެ. އަދި މުދަލުގެ އަގު ހެޔޮވެ އިގުތިސާދަށް އޭގެ ހެޔޮ ބަދަލު އަންނާނެ ކަމަށް ޝަރީފް ވިދާޅުވިއެވެ.