ވެލާނާ އިންޓަނޭޝަނަލް އެއާޕޯޓަށް ވަދެ, ބީއެމްއެލްގެ މުވައްޒަފުން އަތުން ގިނަ އަދަދެއްގެ ޑޮލަރު ތަކެއް ފޭރުނު މައްސަލާގައި، ޑޮލަރުތައް ފެނިފައިވޭތޯ ސުވާލުކުރުމުން ޖަވާބު ދެވެން ނެތް ކަމަށް ފުލުހުން ބުނެފި އެވެ.

ފޭރުނު ޑޮލަރު ރިކަވަރ ވެފައިވޭތޯ ރާއްޖެ އެމްވީ އިން ފުލުހުންގެ މީޑިއާ އާއި ސުވާލުކުރުމުން ފުލުހުން ބުނީ، މި މައްސަލާގައި ތަހުގީގު ކުރިއަށްދާ މިންވަރަކުން މައުލޫމާތު ހިއްސާ ކުރާނެ ކަމަށާއި ވަކިވަކި ސުވާލުތަކަށް މިވަގުތު ޖަވާބު ދެވެން ނެތް ކަމަށެވެ.

މާސްކް އެޅި ބަޔަކު ވެލާނާ އިންޓަނޭޝަނަލް އެއާޕޯޓަށް ވަދެ، ބީއެމްއެލްގެ މުވައްޒަފުން އަތުން ގިނަ އަދަދެއްގެ ފައިސާތަކެއް ފޭރުނު މައްސަލާގައި އެމީހުން ދަތުރުކޮށްފައި ދިޔަ ލޯންޗު އަދި އެ ހަތަރު މީހުން ފުލުހުންގެ ބެލުމުގެ ދަށުގައި ހުރި އިރު ފޭރިގަނެފައިވާ ގިނަ އަދަދެއްގެ ޑޮލަރަށް ވީ ގޮތް ފުލުހުން މިހާތަނަށް ހާމަކޮށްފައެއް ނުވެ އެވެ.

މި މައްސަލާގައި ހައްޔަރުކުރި ހަތަރު މީހުންގެ ވަނަވަރު ފުލުހުން މިހާރު ހާމަކޮށްފައިވާއިރު އެމީހުންގެ ބަންދަށް ކޯޓުން 5 ދުވަސް ވަނީ ޖަހާފަ އެވެ. ފުލުހުން ބުނީ އެ މައްސަލައިގައި ހައްޔަރުކުރީ ލ.މާވަށް، ރޭޝަމް، މާޒިން މޫސާ، 25، އާއި މ. ކޯރަސް، އަހްމަދު ރައިހާން ނައީމް، 20، އާއި ކ.ގުރައިދޫ، އަޅިވިލާގެ، އިބްރާހީމް އަނޫފް 24، އަދި ކ. ގުރައިދޫ، އަޅިވިލާގެ، ހުސައިން ޝަހުދު، 30 އެވެ.

ބޮޑެތި ވައްކަމާއި ފޭރުން މި ފަހަކަށް އައިސް އާންމުވެފައިވާ އިރު މި އޮކްޓޯބަރު 8، ވަނަ ދުވަހުގެ ރޭ އެމްޕީއެލްގެ ހުޅުމާލެ ބަނދަރުގައި ބަހައްޓާފައި ހުރި 13 މިލިއަން ސިނގިރޭޓުގެ ވަނީ ވަގަށް ނަގާފަ އެވެ. މައުލޫމާތު ލިބިފައިވާ ގޮތުގައި ސިނގިރޭޓު ދެ ކޮންޓެއިނަރު ވަގަށް ނެގީ މީގެ ދެ މަސް ދުވަސް ކުރިންނެވެ. އެއީ އޭޕްރީލް މަހު ވަގަށް އެތެރެ ކުރަނިކޮށް ކަސްޓަމްސް އިން ހިފެހެއްޓި ދެ ކޮންޓެއިނަރެވެ.