ކޮޅުވެއްޓި ބަންޑުން ޖަހާލި ހާދިސާ އާއި ގުޅިގެން އެމްޕީއެލްގެ އެތެރޭގެ ތަހުގީގެއް ފަށައިފި
އާދީއްތަ ދުވަހު އެމްޕީއެލް ބަނދަރު ކައިރިން ކޮޅުވެއްޓިއެއް ބަންޑުން ޖަހާލި ހާދިސާގައި ހަ މީހަކަށް އަނިޔާވެ އެމްޕީއެލްގެ ދެ މުވައްޒަފުން މަރުވެފައިވޭ
ބަންޑުން ޖަހާލި ކޮޅުވެއްޓި ކައިރީގައި ޓަގު ބޯޓެއް ހަރަކާތްތެރިވަނީ
އާދީއްތަ ދުވަހު އެމްޕީއެލް ބަނދަރު ކައިރިން ކޮޅުވެއްޓިއެއް ބަންޑުން ޖަހާލި ހާދިސާ އާއި ގުޅިގެން އެމްޕީއެލްގެ އެތެރޭގެ ތަހުގީގެއް ފަށާފައިވާ ކަމަށް އެ ކުންފުނިން ބުނެފި އެވެ.
އެމްޕީއެލް ބަނދަރު ސަރަހައްދު ކައިރިން ކޮޅު ވެއްޓި ބަންޑުން ޖަހާލާފައި ވަނީ އާދީއްތަ ދުވަހުގެ ހަވީރުގެ ވަގުތެއްގަ އެވެ. އެ ހާދިސާގައި ހަ މީހަކަށް އަނިޔާވެގެން ފަރުވާ ދިނުމަށް ހޮސްޕިޓަލަށް ގެންދިޔައިރު، ސީރިއަސް އަނިޔާ ތަކެއް ލިބުނު ބިދޭސީ އަކު ވަނީ މަރުވެފަ އެވެ. އެއީ ބަންގްލަދޭޝް އަށް ނިސްބަތްވާ އުމުރުން 32 އަހަރުގެ މައްސޫދު ހޮސައިން އެވެ. އަދި ހާލު ސީރިއަސްވި 25 އަހަރުގެ އަލީ އަފްލާޙު ޢަބްދުﷲ ވަނީ ދަންވަރުގެ ވަގުތެއްގައި ނިޔާވެފައެވެ. މި ދެމީހުންނަކީ ވެސް އެމްޕީއެލްގެ މުވައްޒަފުންނެވެ.
ކޮޅު ވެއްޓި ބަންޑުން ޖަހާލި ވަގުތު އޭގައި 14 މީހުން ތިބިއިރު، އެ އެންމެން ވެސް ހޯދިފައިވާ ކަމަށް ފުލުހުން ވަނީ ބުނެފަ އެވެ.
މި ހާސިދާ ހިނގި އިރު ކޮޅުވެއްޓީގައި ތިބި އެއްވެސް މީހަކު ލައިފްޖެކެޓް އަޅާފައި ނެތެވެ. އަދި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅާފައި ނުވާ އިރު، ސޭފްޓީ ޗެކް ނަހަދާ ކަމަށް ވަނީ މައުލޫމާތު ލިބިފަ އެވެ.
މި ހާދިސާއާއި ގުޅޭގޮތުން އެމްޕީއެލް އިން ނެރުނު ބަޔާނެއްގައި ބުނެފައިވަނީ ކޮޅުވެއްޓި ބަންޑުން ޖަހާލި ހާދިސާއާ ގުޅިގެން، އެ ކުންފުނީގެ ކަމާ ބެހޭ ޑިޕާޓްމަންޓްތަކުން އެތެރޭގެ ތަހުގީގެއް ފަށާފައިވާ ކަމަށެވެ. އަދި ތަހުގީގުން އެނގޭ މައުލޫމާތަށް ރިއާޔަތްކޮށް، އިތުރު މައުލޫމާތު އާންމުކުރާނެ ކަމަށެވެ.
