އެތައް މިލިއަން ސިނގިރޭޓު ހުރި މާސިންގާ ބޮޑު ސިނގިރޭޓް ކޮންޓޭނަރތަކެއް ވަގަށް ނަގައިގެން އެވާހަކަތައް ދައްކާތާ ދުވަސްކޮޅެއް ވެއްޖެއެވެ. ސަރުކާރަށް ރޭކާލީވެސް އެވާހަކަތައް ދައްކާތާވެސް ދުވަސްތަކެއް ވީފަހުންނެވެ.

މިމައްސަލައިގާ މިހާރު އެވަނީ ބަޔަކު ހައްޔަރުކޮށްފައެވެ. އޭގެ ތެރޭގައި މަޝްހޫރު ބޮޑު ދެ ވިޔަފާރިވެރިއަކު ވެސް ހިމެނޭ ގޮތުންނެވެ. ފަހަރެއްގައިވެސް އެމީހުން އެކަމުގައި ބައިވެރި ނުވެއެކޭ ބުނާކަށް ނެތީމެވެ. ނޫންނަމަ އެމީހުން ހައްޔަރުކޮށްގެން ކަންބޮޑުވެގެނެއް ވެސް ނޫޅެމެވެ. ތަހުގީގަށް ކުރާން ޖެހޭ ކަންކަމާއި ހައްޔަރު ކުރާން ޖެހޭ މީހުން ހައްޔަރުކުރާން ވާނެއެވެ. އެކަމަކު ވެގެން މިއުޅެނީ އެއަށްވުރެ މާ ބޮޑު ކަމެކެވެ. އާދައިގެ ކުޑަކުޑަކަމެއް ނޫނެވެ. އެކަމުގެ ސަބަބުން ނުވަތަ އެކަން ހިނގި ގޮތަށް ހިނގާފައި ހުރެދާނެ ލައްކަ ކަންކަން ހުރެދާނެތީ އެކަމުގެ ކަންބޮޑުވުންތައް ގިނަ ކަމެވެ. ސިނގިރޭޓްތައް ފަދައިން އެފަދަ ނުރައްކާތެރި އެތައް އެތައް އެއްޗެއް އެތަނުން ގެއްލި ރާއްޖެއަށް އެތެރެވެފައި ހުރުމުގެ ކަންބޮޑުވުންތައް އިންތިހާއެވެ.

ވަގަށް އެއްޗެހި އެތެރެކުރާ ވާހަކަ މީގެ ކުރިންވެސް ދައްކައެވެ. ކަސްޓަމްސް ތެރެއިން އެތަކެތި ބޭރުވާވާހަކަވެސް ދޫދޫމަތިން ދެކެވެއެވެ. މީހުން ބުނެ އުޅެއެވެ. ވަގަކަށް ހާސް ދުވަހެވެ. ވެރިއަކަށް ނުވަތަ ރައްޔިތުންނަށް އެއް ދުވަހެވެ.

ސިނގިރޭޓުގެ ޑިއުޓީ ބޮޑުކުރިފަހުން ރާއްޖެއަށް ގެންނަ ވަގު ސިނގިރޭޓް މިވަނީ އިތުރުވެފައެވެ. އެފަދަ ސިނގިރޭޓް ގެނެސްގެން ވިއްކާވެސް ނަގަނީއެވެ. އަސްލު ބާޒާރުގެ އަގުތަކަށްވުރެ ހެޔޮ އަގުގައި ލިބޭތީ އެބޯމީހުންވެސް ގަނެހަދަނީއެވެ.

ސިނގިރޭޓް އަގުބޮޑު ކުރުމާއެކު އެންމެފުރަތަމަ ފަޅާއެރީ ގެއެއްގައި ފުޅާ ދާއިރާއެއްގައި ފެކްޓްރީ ހަދައިގެން ސިނގިރޭޓް އުފައްދަނިކޮށެވެ. ފުލުހުން އަތުލައިގަތީ އެކަމަށް ބޭނުންކުރި ތަކެއްޗާވެސްއެކު ރެޑް ހޭންޑްކޮށެވެ. އެވަހާކަ ދައްކާލީ ދެތިން ދުވަހުއެވެ. އެވާހަކަ އޮބުނީއެވެ. ބުނެވޭގޮތުގައި އެކަމުގައި އިސްކޮށް އުޅުނީ ސަރުކާރު ޕާޓީގެ މަޖިލިސް މެންބަރެކެވެ. ކޯޓަށް ފޮނުވޭވަރުގެ ހެއްކެއް ނެތި އެކަން ނިމުނީއެވެ.

ވަގަށް ސިނގިރޭޓް އެތެރެކުރަނިކޮށް ފަޅާވެސް އެރިއެވެ. އެވާހަކަވެސް ދެކެވުނީ ދެތިން ދުވަހުއެވެ. އެއިން މީހަކަށް ވީގޮތެއް ނޭނގުނެވެ. އަމުދުން ކާކު އެއްޗެއް ކަމެއްވެސް ހާމައެއް ނުކުރެއެވެ.

ވަގު ސިނގިރޭޓް ތައް ބަހައްޓާފައި ހުރި ގުދަނެއްވެސް ހިފެހެއްޓިއެވެ. އޭގެ ދުވަސްކޮޅެއްފަހުން ސިނގިރޭޓްތައް ގެއްލުނީއެވެ. އެ ގުދަންވެސް އެތާނެތީއެވެ. މިފަހަރުވެސް މާބޮޑު ކަމެއް ވީކަމެއް ނޭނގެއެވެ. ބުނެވޭ ގޮތުގައި އެކަމުގެ އަޑީގައި ތިބީ ސަރުކާރަށް ވާގިވެރިވާ ވިޔަފާރި ވެރިންކޮޅެކެވެ.

ފަހުން މިފެނުނު 13 މިލިއަން ސިނގިރޭޓަކީވެސް ބޮޑު އަރަތެކެވެ. ގެއްލުނީ އެމްޕީއެލްގައި ހުއްޓައެވެ. އެތާކު އެއެއްޗެއް ނެތްކަން ވެސް އެނގުނީ ބަޔަކު މީހުން ލަވަން ފެށި ހަޅޭކަކުން ގޮސް ބެލިބެލުމުންނެވެ. އޭގެ ކުރީގައި ނުބީހޭތީ ކަނޑާ ހަމަވެފައެވެ. އޭރަކު ވަގު ސިނގިރޭޓް އެތެރެކުރީ ކޮންވިޔަފާރި ވެރިންނެއް ކަމެއް އަދި އެކަމުގައި ބޭނުންކުރީ ކޮން އުކުޅުތަކެއް ކަމެއް ހާމައެއް ނުކުރެއެވެ. އެތެރެވުމުގައި ހުރި އެބުނާ ލޫޕްހޯލްތަކެއްގެ ވާހަކައެއްވެސް އަމުދަކުން ނުދައްކައެވެ.

ސިނގިރޭތްތައް ގެއްލުނީމާ ބަޔަކު ހައްޔަރު ކުރީ ކުރިންވެސް ބުނިހެން މާފަހުންނެވެ. އޭގެ ތެރޭގައި ދެ ވިޔަފާރި ވެރިއަކުވެސް ހެމެނުނީއެވެ. އެކަމަކު ކަސްޓަމާއި އެމްޕީއެލްގެ ބެލުމުގެ ދަށުގައި ހުންނަ އެފަދަ ބޮޑު ކޮންޓޭނަރެއް އެތަނުން ނެރެ ދޯންޏަކަށް ލައިގެން ގެންދެވުނީ ކިހިނެއް ހެއްޔެވެ. އެއީ އެންމެ މީހަކު ދެމީހަކަށް ކުރެވޭނެވަރުގެ ކަމެއް ނޫނެވެ. ތިނޯހެއްވެސް ވަގަށް ނުނެރެވޭވަރުގެ ސެކިއުރިޓީއެއް އޮންނަންޖެހޭ އަދި އެފަދަ ސެކިއުރިޓީއެއް ދީފައި އޮންނަތަނެކެވެ. ހައްޔަރުކުރި މަދު ބައެއްގެ މުއްދަތު އިތުރުކުރިއިރު އެކަން ހިނގައިދިޔަ ގޮތެއް އެކަމުގައި ބައިވެރިވި އެމުއްސަސާތަކުގެ އެހެން މީހުންގެ ދައުރެއް އަދިވެސް އޮތީ ހާމަނުކޮށެވެ. ރައްޔިތުންގެ ހިތުގައި އޮތީ އެތައް ހާސް ސުވާލެކެވެ. 40 ފޫޓުގެ ސިނގިރޭޓް ކޮންޓޭނަރެއް އެތަނުން ފަސޭހަ ކަމާއެކު ނެރެ މީހުންނަށް ދޮންކަޅުވެސް އަންގާ ނުލައި ނިންމާލެވޭހާ އެތަން ދޯދިޔާނަމަ މިހާރު ބޭރުވެފައި އޮންނާނީ ކިތައް ބަނގުރާ ކޮންޓެއިނަރ ހެއްޔެވެ. ރާއްޖެއަށް އެތެރެކުރުން މަނާ ތަކެތީގެ ކިތައް ކޮންޓެއިނަރ ހެއްޔެވެ. މައި ވިޔަފާރި ދޮރާށި ފޫއަޅާ އެތަނުން ބޭނުން އެއްޗެއް ބޭނުން ގޮތަކަށް ނެރެވޭނަމަ މިއަދު ރައްޔިތުންނަށްއޮތް ރައްކާތެރިކަމަކީ ކޮބައި ހެއްޔެވެ. މާބޮޑު ތަހުގީގެއް ހިންގާ ކުރިއެރުންތަކެއް ހޯދުނުކަން ދައްކާން ދެ ވިޔަފާރިވެރިއަކު ހައްޔަރުކޮށްގެން މުޅި އެތީގެ ރާގު ބަދަލު ކޮށްލަން އުޅޭނަމަ އެއީ ހައްލެއް ނޫނެވެ. ސެކިއުރިޓީ ފޫއެޅި ގޮތާއި އެކަމުގައި ޒިންމާވާންޖެހޭ މީހުންނާ އެކަން ކުރުމުގައި ބައިވެރިވި ވެރިންގެ ލެވެލްގެ ގިނަ މީހުންގެ ވަނަވަރު ނޭނގޭނަމަ ތިޔައީ އަދި ތިޔަ ތަހުގީގު ފުރިހަމަވުމެއް ނޫނެވެ. އެއަށްވުރެ ބޮޑަށް ރައްޔިތުންނަށް ގަބޫލު ކުރެވޭނީ ގުޅިގެން ކުރެވުނު ވައްކަން ނުވަތަ ސަރުކާރުގެ ބޮޑު ފެއިލިއަރގެ މަތި އޮއްބަން ދުއްވާ ދެބޯގެރިއަކަށެވެ.