ސަރުކާރުގެ އިސްފަރާތެއްގެ އެހީގައި ވަގަަށްނެގިކަމަށް ތުހުމަތުކުރެވޭ ސިނގިރޭޓް ކޮންޓެއިނަރުތައް އުފުލިކަމަށް ބެލެވޭ ދޯނީގެ ކައްޕި ހައްޔަރުކޮށްފި؛ ކޯޓުން ނިންމީ އޭނާ 7 ދުވަހަށް ބަންދުކުރަން
ހުޅުމާލޭ ވިޔަފާރި ބަނދަރުން ވަގަށްނެގި ސިނގިރޭޓް މައްސަލައިގައި މިހާތަނަށް 6 މީހަކު ވަނީ ހައްޔަރުކުރެވިފަ
ސިނގިރެޓް ކޮންޓެއިނަރުތައް ވަގަށް ގެންދިޔަ އިރު ދޯނީގެ ކެޕްޓަނަކަށް ހުރި ކަމަށް ތުހުމަތުކުރެވޭ އާދަމް ވަހީދު
އެމްޕީއެލް ހުޅުމާލު ވިޔަފާރި ބަނދަރުގައި ދައުލަތުގެ ބެލުމުގެ ދަށުގައި ހުއްޓާ ވަގަށްނެގި 2 ކޮންޓެއިނަރު ސިނގިރޭޓް އެެހެން ތަނަކަށް އުފުލި ކަމަށް ތުހުމަތު ކުރެވޭ ދޯނީގެ ކެޕްޓަން ހައްޔަރުކޮށްފިއެވެ.
މިތުހުމަތުގައި ބުރާސްފަތި ފުލުހުން ހައްޔަރުކުރީ ނ. މިލަދޫ، ކެނެރީގެ، އާދަމް ވަހީދު އެވެ. ހައްޔަރުކުރި ވަހީދު ދިރިއުޅެމުން ދިޔައީ އެމްޕީއެލްގެ މުވައްޒަފުންނަށް ހުޅުމާލެ ފޭސް 2 ގައި އަޅާފައިވާ ޓަވަރެއްގެ އެޕާޓްމަންޓެއްގައެވެ. ވަހީދު ބަންދުކުރަން ފުލުހުން ކްރިމިނަލް ކޯޓުގައި އެދުމުން، ކޯޓުން ވަނީ އޭނާ ހަތް ދުވަހުގެ މުއްދަތަށް ބަންދުކުރުމަށް އަމުރުކޮށްފައެވެ.
ކްރިމިނަލް ކޯޓުން ބުރާސްފަތި ދުވަހު ނެރުނު އަމުރުގައި ބަޔާންކޮށްފައިވާ ގޮތުން، އޭނާއަކީ ވަގަށްނެގި ކޮންޓެއިނަރުތައް އުފުލި ދޯނީގެ ކެޕްޓަންކަމަށް މައްސަލަ ތަހުގީގުކުރާ ފުލުހުންގެ އިންވެސްޓިގޭޝަން އޮފިސަރު ވަނީ ފާހަގަކޮށްފައެވެ. އަދި ވަހީދުގެ މައްޗަށް ކުރެވެނީ ޖިނާއީ ބޮޑު ކުށެއްގެ ތުހުމަތު ކަމަށްވެސް އަމުރުގައި ބުނެފައިވެ އެވެ.
މި މައްސަލައިގައި މީގެ ކުރިން ފަސް މީހަކު ވަނީ ހައްޔަރުކޮށްފައެވެ. އޭގެ ތެރޭގައި ލޮޓަސް ފިހާރައިގެ ވެރިޔާ އަހުމަދު އާރިފް (އާއްޓޭ)، އެޕޯލޯ ހޯލްޑިންގްސްގެ ވެރިޔާ މުހައްމަދު ވަހީދު (ދިގަލި)، ކަސްޓަމްސްގައި ކުރިން މަސައްކަތްކުރި، މިހާރު މިފްކޯގެ މެނޭޖަރެއްގެ މަގާމުގައި ހުރި މުއާޒް އަލީ އާއި ކަސްޓަމްސްގެ މުވައްޒަފެއް ކަމަށްވާ ޒިވާރު އިސްމާއިލް އަދި ހަސަން އަބްދުއްރަހްމާން ހިމެނެއެވެ. މީގެތެރެއިން ހަސަަން އަބްދުއްރަހްމާން އަކީ މި ވައްކަމުގައި އެންމެ އިސްކޮށް ޝާމިލްވާކަމަށް ތުހުމަތުކުރެވޭ ދިގަލި އާއި ގާތްގުޅުމެއް އޮންނަ ފަރާތެއްކަމަށް މައުލޫމާތު ލިބެއެވެ.
ހައްޔަރުކުރެވުނު ފަރާތްތަކުގެ ތެރެއިން އާއްޓޭ އާއި ދިގަލިގެ މައްޗަށް ވަނީ ވައްކަމަށް ފަންޑުކުރުމުގެ ތުހުމަތު ކުރެވިފައެވެ. އަދި މުއާޒު އާއި ޒިވާރުގެ މައްޗަށް ވަނީ އަމަލީގޮތުން ވައްކަން ރާވައި ހިންގުމުގެ ތުހުމަތު ކުރެވިފައެވެ. ހަސަން އަބްދުއްރަހްމާންގެ މައްޗަށް ކުރެވެނީ ވައްކަން "ކާމިޔާބުކުރަން" އެހީތެރިވުމުގެ ތުހުމަތެވެ.
ވަގަށްނެގި 40 ފޫޓުގެ ދެ ކޮންޓެއިނަރުގައި ހުރީ 1،360 ކޭސް ސިނގިރޭޓެވެ. މިއީ ޖުމްލަ 13.6 މިލިއަން ސިނގިރޭޓް ސްޓިކެވެ. ކަސްޓަމްސްއިން ހާމަކުރި ގޮތުގައި، މި ސިނގިރޭޓްތަކުގެ ޑިއުޓީގެ ގޮތުގައި ދައުލަތަށް ލިބެންޖެހޭ އަދަދަކީ 122 މިލިއަން ރުފިޔާއެވެ.
މި މައްސަލައިގައި ހައްޔަރުކުރެވުނު ބައެއް ފަރާތްތަކަކީ މީގެ ކުރިންވެސް މިލިއަން ރުފިޔާގެ ބޮޑެތި މައްސަލަތަކުގައި ދައުލަތުން ދައުވާ އުފުލާފައިވާ ފަރާތްތަކެކެވެ. އަދި މި މައްސަލައިގައި ހިމެނޭ ސަރުކާރަށް ނިސްބަތްވާ ބައެއް ފަރާތްތައް މައްސަލަ ފެންމަތިވުމުން މަގާމުތަކުން ވަގުތީގޮތުން ދުރުކޮށްފައި ވީނަމަވެސް، މި ވައްކަމުގައި ސަރުކާރުގެ އިސް ފަރާތްތަކެއްގެ ބައިވެރިވުން އޮތްކަމަށް ރައްޔިތުންގެ ތެރެއިން ގިނަ ބަޔަކު ތުހުމަތުކުރެއެވެ.
ރާއްޖޭގެ ވިޔަފާރި ބަނދަރުތަކަކީ ހަރުދަނާ އުސޫލުތަކެއްގެ ދަށުން ބަލަހައްޓަމުން އަންނަ ތަންތަން ކަމަށްވާއިރު، މިފަދަ ބޮޑު ވައްކަމެއް ސަރުކާރުގެ އިސް ފަރާތްތަކުގެ އެހީތެރިކަމެއް ނެތި ނުހިންގޭނެ ކަމަށް އިދިކޮޅު ފަރާތްތަކުން ވެސް ފާހަގަކުރެއެވެ.
މިކަމާ ގުޅިގެން އެމްޑީޕީގެ ފަރާތުން ރައްޔިތުންގެ މަޖިލީހަށް ހުށަހެޅި ކުއްލި މައްސަލަ މަޖިލީހަށް ބަލައިގަތުމަށް، ރަޢީސް މުއިއްޒަށް ވަފާތެރި މަޖިލީހުގެ މެމްބަރުން ވަނީ ދެކޮޅު ހައްދަވާފައެވެ. އަދި މި މައްސަލައާ ގުޅިގެން ކަމާގުޅުންހުރި އިދާރާތައް މަޖިލީހުގެ 241 ކޮމިޓީއަށް ހާޒިރުކުރަން ނިންމުމަށްފަހު، ތަހުގީގަށް ހުރަސް އެޅިދާނެކަމަށް ބުނެ ކުއްލި ގޮތަކަށް ކޮމިޓީ ކެންސަލް ކޮށްފައިވާކަންވެސް ފާހަގަކުރެވެއެވެ.
