މަސްދަރު ނޭނގޭ ގޮތަށް، ކޯޓާގުޅޭގޮތުން ދައްކާ ވާހަކަތައް ނުފެތުރުމަށް ކްރިމިނަލް ކޯޓުގެ އިސްގާޒީ އެދިވަޑައިގެންފި
ގާޒީ ވިދާޅުވާ ގޮތުގައި ޝަރީއަތުން ދެފަރާތުގެ ވާހަކަވެސް އަޑުއައްސަވާނެ
ކްރިމިނަލް ކޯޓުގެ އިސްގާޒީ އަހުމަދު ޝަކީލް- ރައްޔިތުންގެ މެދުގައި ޝަރީއަތާމެދު ނަފްރަތު އުފެދޭ ގޮތަށް ވާހަކަތައް ނުފެތުރުމަށް އެދިވަޑައިގެންފައިވޭ
މަސްދަރު ނޭނގޭގޮތަށް ކޯޓާގުޅޭގޮތުން ދައްކާ ވާހަކަތައް ނުފެތުރުމަށް ކްރިމިނަލް ކޯޓުގެ އިސްގާޒީ އަހުމަދު ޝަކީލް އެދިވަޑައިގެންފިއެވެ.
ގާޒީ ޝަކީލް އެހެން އެދިވަޑައިގެންފައިވަނީ ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީނާއި، ވ. ފެލިދޫ ހަނދުވަރީގޭ ޔޫސުފް ނައީމްގެ މައްޗަށް އުފުލާފައިވާ ދައުވާތަކުގެ ޝަރީއަތުގެ އަޑުއެހުމުގައެވެ. މި އަޑުއެހުން ފައްޓަވަމުން ގާޒީ ވަނީ ބައެއް ކަންކަން ޝަރީއަތުން ފާހަގަ ކުރައްވާފައެވެ.
ގާޒީ ޝަކީލް ވަނީ ޝަރީއަތާ ގުޅޭގޮތުން ޚަބަރުތަކާއި މައުލޫމާތު ފަތުރާއިރު، ރައްޔިތުންގެ މެދުގައި ޝަރީއަތާމެދު ނަފްރަތު އުފެދޭ ގޮތަށް ވާހަކަތައް ނުފެތުރުމަށް އެދިވަޑައިގެންފައެވެ. އެގޮތުން ފަނޑިޔާރެއް ނަމަވެސް، ވަކީލެއް ނަމަވެސް، އެހެން ފަރާތެއް ނަމަވެސް އެ ބައެއްގެވެސް ޒިންމާތަކަކާއި މަސްއޫލިއްޔަތުތަކެއް ހުންނާނެކަން ގާޒީ ޝަކީލު ފާހަގަ ކުރެއްވިއެވެ. ފާއިތުވި އެކި ދުވަސްތަކުގައިވެސް ޝަރީއަތާއިމެދު ރައްޔިތުންގެ އިތުބާރު ގެއްލޭ ބީދައިން އެކި ފަރާތްތަކުން މައުލޫމާތު ފަތުރާފައިވާކަމަށް ގާޒީ ވިދާޅުވިއެވެ.
އޭގެ އިތުރުން، މަސްދަރު ނޭނގޭ ގޮތަށް, ކޯޓާއި ގުޅޭގޮތުން ދައްކާ ތަފާތު އެކި ވާހަކަތައް ހަގީގަތް ނުބަލައި ނުފެތުރުމަށްވެސް ގާޒީ ވަނީ އެދިވަޑައިގެންފައެވެ.
މި އަޑުއެހުމުގައި ގާޒީ ވަނީ އާރަށު ޚިޔާނާތުގެ ތާވަލާ ގުޅޭގޮތުން ދެކެވޭ ވާހަކަތަކާއި، ޝަރީއަތްތައް ލައިވް ކުރުމާ ގުޅޭގޮތުން ދެކެވޭ ވާހަކަތައްވެސްސާފުކޮށްދެއްވާފައެވެ.
މި މައްސަލާގައި 27 ޖެނުއަރީގައި ބޭއްވި އަޑުއެހުމުގައި ގާޒީ ޝަކީލު ވަނީ, އާރަށު ޚިޔާނާތުގެ ތާވަލެއް ހިއްސާ ކުރައްވާފައެވެ. އެ ތާވަލުގައިވާގޮތުން މި މައްސަލައިގެ ހުކުމްކުރުން އޮންނާނީ ނޮވެމްބަރު މަހުގެފަހުކޮޅުއެވެ. އެ ތާވަލަށް ބަދަލު އައުން އެކަށީގެންވާކަމަށް އެ ދުވަހުގެ އަޑުއެހުމުގައިވެސް ގާޒީ ވިދާޅުވެފައިވެއެވެ.
މި މައްސަލައިގައި ގާޒީ ހިއްސާ ކުރެއްވި ތާވަލާ ގުޅޭގޮތުން ދެފަރާތާ ވަނީ މަޝްވަރާވެސް ކޮށްފައެވެ. އެގޮތުން ޕީޖީ އޮފީހުން ވަނީ މި މައްސަލައިގެ ތާވަލަށް ބަލާއިރު، އެއް ދުވަހުން ކުރިއަށް ގެންދެވިދާނެ އަޑުއެހުންތައްވެސް ވަކި ދުވަސްތަކަކަށް ބަހާލާފައިވާތީ، ތާވަލާ ގުޅޭގޮތުން އެ އޮފީހުގެ ޚިޔާލުވެސް ހިއްސާކޮށްފައެވެ. އަދި އެކަމާ ގުޅޭގޮތުން ކްރިމިނަލް ކޯޓާ ވަނީ މަޝްވަރާވެސް ކޮށްފައެވެ. އެހެންނަމަވެސް، އެކަންކަން ލިއުމުން ކޯޓަށް ހުށައެޅުމުގެ ކުރިން ކޯޓުން ވަނީ ތާވަލަށް ބަދަލު ގެނެސް، ޖޫން މަހު ހުކުމް ކުުރުމަށް ތާވަލުކޮށް ދެފަރާތަށް ތާވަލު ހިއްސާކޮށްފައެވެ. އެގޮތުން ހުކުމް ކުރުން ޖޫން 30އަށް މިހާރު ވަނީ އަވަސްކޮށްފައެވެ.
އެކަން ވީގޮތް ސާފު ކޮށްދެއްވަމުން ގާޒީ ޝަކީލު ވިދާޅުވީ، ޔާމީނުގެ މައްޗަށް އެމްއެމްޕީއާރްސީއާ ގުޅުންހުރި އިތުރު މައްސަލައެއްގައި ދައުވާ އުފުލައި ޝަރީއަތް ކުރިއަށްދާކަމަށެވެ. އާންމު އުސޫލަކުން އެފަދަ ހާލަތްތަކުގައި ކޯޓުން ބަލަނީ އެ މައްސަލަތައް އެއްކޮށް ނިންމުންކަން ފާހަގަ ކުރައްވައި ގާޒީ ވިދާޅުވީ، އެއީ ދެ މައްސަލަ އޮތް ހިސާބަށް ބައްލަވައި، ދައުވާލިބޭ މީހާގެ މަސްލަހަތަށްވެސް ބައްލަވާފައި ނިންމެވި ނިންމެވުމެއް ކަމަށެވެ. އެގޮތުން ކޯޓުގައި އެ މައްސަލަވެސް ބައްލަވަނީ ގާޒީ ޝަކީލެވެ.
އެހެންނަމަވެސް، ޝަރީއަތް ކުރިއަށްދާ ގޮތަކުން ތާވަލަށް ގެންނަންޖެހޭ ބަދަލުތައް ގެންނަވާނެކަންވެސް ގާޒީ ފާހަގަ ކުރެއްވިއެވެ. ގާޒީ ވިދާޅުވިގޮތުގައި ޝަރީއަތުން ދެފަރާތުގެ ވާހަކަވެސް އަޑުއައްސަވާނެއެވެ.
މި ދެ މައްސަލާގައިވެސް ރައީސް ޔާމީނުގެ މައްޗަށް ކޮށްފައިވަނީ ރިޝްވަތު ގަބޫލު ކުރުމާއި މަނީ ލޯންޑަރިންގގެ ކުށުގެ ދައުވާއެވެ. ދެ މައްސަލައިގެ ހުކުމްކުރުންވެސް ވަނީ ޖޫން މަހުގެ 30 ވަނަ ދުވަހަށް ތާވަލު ކޮށްފައެވެ. ފުއްގިރި މައްސަލައިގެ ހުކުމް އެ ދުވަހުގެ 09:30ށް ތާވަލު ކޮށްފައިވާއިރު، އާރަށު މައްސަލައިގެ ހުކުމްކުރާނީ އެ ދުވަހުގެ 13:00ގައެވެ.
