އެމްޑީޕީގެ ރިޔާސީ ޕްރައިމަރީއެއް ބޭއްވުމަށް ބުރާސްފަތި ދުވަހު ގައުމީ މަޖިލީހަށް ހުށައެޅުމަށް ނިންމައިފިއެވެ.

އިތުބާރު ހުރި މަސްދަރަކުން ރާއްޖެއެމްވީއަށް ކަށަވަރު ކޮށްދީފައިވާ ގޮތުގައި, ބުރާސްފަތި ދުވަހުގެ ހަވީރު އެމްޑީޕީގެ ގައުމީ މަޖިލީހުގެ ބައްދަލުވުމެއް ބޭއްވުމަށް ވަނީ ނިންމާފައެވެ. މި ބައްދަލުވުމުގައި 3 ހުށައެޅުމެއް ހުށައެޅިގެންދާއިރު، އެއީ އެމްޑީޕީގެ އެތެރޭގެ 3 އިންތިޚާބެއްގެ ތާރީޚުތައް ކަނޑައެޅުންކަމަށް ރާއްޖެއެމްވީއަށް މައުލޫމާތުދެއްވި ފަރާތުން ވިދާޅުވިއެވެ.

ފުރަތަމަ އިންތިޚާބަކީ އެމްޑީޕީގެ ޗެއަރ ޕަރސަންގެ މަގާމުގެ އިންތިޚާބެވެ. އެގޮތުން މިހާރު ހުންނެވި ޗެއަރޕަރސަން ހަސަން ލަތީފުގެ މަގާމުގެ މުއްދަތު ހަމަވަނީ މިހިނގާ ފެބްރުއަރީ މަހުގެ ތެރޭގައެވެ.

ދެވަނަ އިންތިޚާބަކީ އެމްޑީޕީ ޕާލިމެންޓަރީ ގްރޫޕުގެ ލީޑަރުކަމުގެ މަގާމުގެ އިންތިޚާބެވެ. އެއީ ދެއަހަރާ ބައިގެ މުއްދަތަކަށް އިންތިޚާބު ކުރެވޭ މަގާމެކެވެ. އެމްޑީޕީގެ ޕާލިމެންޓްރީ ގްރޫޕުގެ ލީޑަރަކަށް މެދު ހެންވޭރު ދާއިރާގެ މެންބަރު އަލީ އާޒިމް ހޮވިވަޑައިގެންފައިވަނީ 2 ޖުލައި 2019 ގައެވެ.

އޭގެ އިތުރުން 3 ވަނަ ހުށައެޅުމަކީ އެމްޑީޕީގެ ރިޔާސީ ޕްރައިމަރީއެއް ބޭއްވުމަށް ތާރީޚެއް ކަނޑައެޅުމަށް ބޭއްވޭ ހުށައެޅުމެކެވެ.