ޔާމީން ރަޝީދުގެ މައްސަލައިގައި ކްރިމިނަލް ކޯޓުން ޝަރީއަތް ނިމުނު ގޮތުގެ ފައިނަލް ރިޕޯޓު މި ފެށޭ ހަފްތާގައި ޕީޖީ އޮފީހަށް ހިއްސާކުރާނެކަމަށް އެ ކޯޓުން ބުނެފިއެވެ.
ބްލޮގަރ ޔާމީން ރަޝީދުގެ މަރުގެ މައްސަލައިގައި ކްރިމިނަލް ކޯޓުން ކުށް ސާބިތުނުވާކަމަށް ނިންމި 4 މީހުންގެ މައްސަލަ ހައިކޯޓުގައި އިސްތިއުނާފު ކުރުމަށް ޕްރޮސެކިއުޓަރ ޖެނެރަލް އޮފީހުން ވިސްނަމުންދާކަމަށް ހާމަކޮށްފައިވަނީ 20 ޖެނުއަރީ 2022 ގައެވެ.
އެކަމާއި ގުޅޭގޮތުން ރާއްޖެއެމްވީން ސުވާލުކުރުމުން އެ އޮފީހުގެ މީޑިއާ އޮފިޝަލު ވިދާޅުވީ، ކްރިމިނަލް ކޯޓުން ޝަރީއަތް ނިމުނު ގޮތުގެ ފައިނަލް ރިޕޯޓު ލިބުމުން، އިސްތިއުނާފު ކުރުމާމެދު ގޮތެއް ނިންމުމުގެ ކަންކަން ޕީޖީ އޮފީހުން ކުރިއަށް ގެންދާނެ ކަމަށެވެ. ކްރިމިނަލް ކޯޓުގެ ޙުކުމް އިސްތިއުނާފު ކުރުމަށް ޤާނޫނުން ޕީޖީއަށް 60 ދުވަހުގެ މުއްދަތެއް ލިބެއެވެ.
ރާއްޖެއެމްވީއަށް މައުލޫމާތުދެއްވަމުން ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، ފައިނަލް ރިޕޯޓު މި ފެށޭ ހަފްތާގައި ޕީޖީ އޮފީހާއި ހިއްސާ ކުރުމަށް މަސައްކަތް ކުރަމުންދާ ކަމަށެވެ.
މި މައްސަލައިގައިޙުކުމްކޮށް ނިންމާފައިވަނީ ދައުވާ ލިބޭ އިސްމާއިލް ހައިޝަމާއި އަހުމަދު ޒިހާންގެ މައްޗަށް ކުށް ސާބިތުވާކަމަށާއި، ބާކީ ތިބި 4 މީހުންގެ މައްޗަށް ދައުލަތުން އުފުލާފައިވާ ދައުވާ ސާބިތުނުވާ ކަމަށެވެ. އެގޮތުން ކުށް ސާބިތުނުވާކަމަށް ނިންމާފައިވަނީ މ. ކޮޅުފުށީ އީސްޓް ހުސައިން ޒިޔާދާއި، މ. ތާއިފް އިސްމާއީލް ރަޝީދާއި، މ. ކުދެހިގެ ހަސަން ޝިފާޒާއި، ގދ. ގައްދޫ ސިންދުބާދުގޭ މުހައްމަދު ދިފްރާނުގެ މައްޗަށެވެ.
ބާކީ ތިބި 4 މީހުންނަކީ ޔާމީން ރަޝީދު މަރާލުމުގެ ޢަމަލު ރޭވުމުގައާއި، އެކަން ތަންފީޛް ކުރުމުގައި އެކި މިންވަރަށް ބައިވެރިވެފައިވާ ބައެއްކަން މައްސަލައިގެ ހެކި ޤަރީނާއިން އެނގޭކަމަށް ޕީޖީ އޮފީހުން ބުނެއެވެ. އަދި މި ހަތަރު މީހުންގެ މައްޗަށް ކުރި ދަޢުވާތައް ސާބިތުނުވާކަމަށް ކްރިމިނަލް ކޯޓުން ޙުކުމް ކޮށްފައިވާތީ އެ ޙުކުމް ދިވެހިރާއްޖޭގެ ހައިކޯޓުގައި އިސްތިއުނާފު ކުރުމަށް ވިސްނާ ކަމަށް ޕީޖީ އޮފީހުން ބުނެއެވެ. އަދި މި މައްސަލައިގައި ކްރިމިނަލް ކޯޓުގެ ނިންމެވުމުގެ މަޙްޟަރު ބަޔާންތަކާއެކު މައްސަލައިގެ ޝަރީޢަތް ނިމުނު ގޮތުގެ ރިޕޯޓް ލިބުމުން، އެ ރިޕޯޓް ދިރާސާކުރުމަށްފަހު، ޤާނޫނުގައި ކަނޑައެޅިފައިވާ މުއްދަތުގެ ތެރޭގައި މި ހަތަރު މީހުންގެ މައްސަލަ އިސްތިއުނާފު ކުރުމާމެދު ފަހު ނިންމުމެއް ނިންމާނެ ކަމަށް ޕީޖީ އޮފީހުން މީގެ ކުރިން ވަނީ ބުނެފައެވެ.
ޕީޖީ އޮފީހުން ބުނީ، އާންމު މަޞްލަޙަތު މަތީ މިންވަރަކަށް އެކުލެވޭ، މި ބާވަތުގެ އަނިޔާވެރި ކުށްތަކުގެ މައްސަލަތައް ވަރަށް ސީރިއަސް މައްސަލަތަކުގެ ގޮތުގައި އެ އޮފީހުން ދެކޭ ކަމަށެވެ. އަދި މިފަދަ މައްސަލަތަކުގައި އިންސާފު ހޯދައިދިނުމަށް ޖިނާއީ ޢަދުލުގެ ނިޒާމުގެ ތެރެއިން ދެވެން އޮތް އެންމެ ދުރަކަށް ދާނެ ކަމުގެ ޔަޤީންކަންވެސް ވަނީ ދީފައެވެ.
މި މައްސަލައިގައި ކުށް ސާބިތުވި މީހުންނަށް އުމުރު ދުވަހުގެ ޖަލު ޙުކުމެއް ވަނީ އިއްވާފައެވެ. ނަމަވެސް އެ މީހުން 4 އަހަރާއި 8 މަހާއި 11 ދުވަސް ޖަލުގައި ހޭދަކޮށްފައިވާތީ، އެ މުއްދަތު 25 އަހަރުން ކެނޑުމުން އެމީހުން ތަންފީޒު ކުރަންޖެހޭ ޖަލު ޙުކުމުގެ އަދަބަކީ 20 އަހަރާއި، 3 މަހާއި 19 ދުވަސްކަމަށް ވަނީ ޙުކުމް ކުރައްވާފައެވެ.
