ހަޔަރ އެޑިޔުކޭޝަނުން ހަތަރު ސްކޮލާޝިޕަށް ކުރިމަތިލުމުގެ ފުރުސަތު ހުޅުވާލައިފި
ހަތަރު ސްކޮލަރޝިޕަށް ވެސް ފޯމް ހުށަހެޅުމުގެ ސުންގަޑި މިމަހުގެ ތެރޭގައި ހަމަވާނެ
ދިވެހިރާއްޖޭގެ ޤައުމީ ޔުނިވަރސިޓީގައި ތައުލީމް ހާސިލްކުރަމުންދާ ދަރިވަރުން
ހަޔަރ އެޑިޔުކޭޝަން މިނިސްޓްރީން މަތީ ތައުލީމަށް ފުރުސަތު ހޯދައިދިނުމަށް ކުރަމުންދާ މަސައްކަތުގެ ދަށުން ހަތަރު ސްކޮލާޝިޕަށް ކުރިމަތިލުމުގެ ފުރުސަތު ހުޅުވާލައިފިއެވެ.
ހަޔަރ އެޑިޔުކޭޝަނުން ފުރުސަތު ހުޅުވާލާފައިވަނީ އިންޓަރނޭޝަނަލް މެރިޓައިމް އޯގަނައިޒޭޝަން ސްކޮލަރޝިޕް 2022/2023، ގަވާމެންޓް އޮފް ބުރުނާއީ ދާރުއްސަލާމް ސްކޮލާޝިޕް 2022/2023، ޔުނިވަރސިޓީ އޮފް އެޑިންބަރގް ބިޒްނަސް ސްކޫލު ސްކޮލަރޝިޕް 2022 އަދި ޗައިނީޒް ގަވަރމަންޓް ސްކޮލަރޝިޕް 2022/2023 ށެވެ.
ހަޔަރ އެޑިޔުކޭޝަނުން ބުނީ އިންޓަރނޭޝަނަލް މެރިޓައިމް އޯގަނައިޒޭޝަން ސްކޮލަރޝިޕަށް ފުރުސަތު ހުޅުވާލާފައިވާ ކަމަށާއި، މިމަހުގެ 20 ވާ އާދިއްތަ ދުވަހުގެ މެންދުރުފަހު 1:30 ގެ ކުރިން ފޯމް ހުށަހަޅަންޖެހޭ ކަމަށެވެ. މި ސްކޮލަރޝިޕްގެ ދަށުން ދެ ކޯހަކަށް ކުރިމަތިލެވޭނެއެވެ. އެއީ މާސްޓަރސް އޮފް ލޯ އިން އިންޓަރނޭޝަނަލް މެރިޓައިމް ލޯ އަދި މާސްޓަރސް އޮފް ހިއުމަނިޓީސް އިން އިންޓަރނޭޝަލް މެރިޓައިމް ލެޖިސްލޭޝަން އެވެ. މޯލްޓާގައި ކޯސް ފުރިހަމަ ކުރަން ޖެހޭއިރު، މި ސްކޮލަރޝިޕް ފުރުސަތައް ހޮވޭ 2 ކެންޑިޑޭޓުންގެ ހުރިހާ ޚަރަދެއްވެސް ހަމަޖައްސާނީ ކޯސް އިންތިޒާމްކުރާ ފަރާތުންކަމަށް މިނިސްޓްރީން ބުނެއެވެ.
ދާރުއްސަލާމް ސްކޮލާޝިޕް 2022/2023 އާއި ބެހޭ ގޮތުން ހަޔަރ އެޑިޔުކޭޝަނުން ބުނީ ޔުނިވަރސިޓީ ބުރުނާއީ ދާރުއްސަލާމް (ޔޫ.ބީ.ޑީ)، ޔުނިވަރސިޓީ އިސްލާމް ސުލްތާން ޝަރީފް އަލީ (ޔޫ.އެން.އައި.އެސް.އެސް.އޭ)، ޔުނިވަރސިޓީ ޓެކްނޮލޮޖީ ބުރުނާއީ (ޔޫ.ޓީ.ބީ) އަދި ޕޮލިޓެކްނިކް ބުރުނާއީ (ޕީ.ބީ)ން ފުރުސަތު ހުޅުވާލާފައިވާ ކޯސްތަކަށް އެޕްލިކޭޝަން ހުށަހަޅޭނެ ކަމަށެވެ. އަދި 10 ފެބްރުއަރީވާ ބުރާސްފަތި ދުވަހުގެ މެންދުރުފަހު 1:30ގެ ކުރިން ފޯމް ހުށަހަޅަން ޖެހޭ ކަމަށް މިނިސްޓްރީން ބުނެއެވެ. މި ސްކޮލަރޝިޕްގެ ދަށުން ހުރިހާ ޚަރަދެއް ދިނުމަށް ހަމަޖެހިފައިވަނީ ސްކޮލަރޝިޕް ދޭ ފަރާތުން ކަމަށްވާއިރު، ކޯސް ފުރިހަމަ ކުރަން ޖެހެނީ ބުރުނާއީ ގައެވެ.
މީގެ އިތުރުން ހަޔަރ އެޑިޔުކޭޝަނުން ބުނީ ޔުނިވަރސިޓީ އޮފް އެޑިންބަރގް ބިޒްނަސް ސްކޫލު ސްކޮލާޝިޕް 2022ގެ ފުރުސަތު ދިވެހި ދަރިވަރުންނަށް ހުޅުވާލެވިފައިވާކަން އެ ޔުނިވާސިޓީން އަންގާފައިވާ ކަމަށެވެ. މި ސްކޮލަރޝިޕްގެ ދަށުން ހުރިހާ ޚަރަދެއް ދިނުމަށް ހަމަޖެހިފައިވަނީ ސްކޮލަރޝިޕް އިންތިޒާމް ކުރާ ފަރާތުން ކަމަށްވާއިރު، މިކޯސްތަކަށް ހޮވޭ ފަރާތްތަކުން، ކޯހަށް ފުރުމުގެ ކުރިން ކޯސް ހިންގާ އިންސްޓިޓިއުޓަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ގަބޫލުކުރާ އިންސްޓިޓިއުޓެއްތޯއާއި، ހޮވިފައިވާ ކޯހަކީ އެމްކިޔުއޭ އިން ގަބޫލުކުރާ ކޯހެއްތޯ ކަށަވަރު ކުރަންޖެހޭ ކަމަށެވެ. މި ސްކޮލަރޝިޕަށް އެޕްލިކޭޝަން ހުށަހެޅުމުގެ ސުންގަޑިއަކީ 28 ފެބްރުއަރީ 2022ވާ ހޯމަ ދުވަހުގެ މެންދުރުފަހު 1:30ށް ކަމަށެވެ.
ޗައިނީޒް ގަވަރމަންޓް ސްކޮލަރޝިޕަށް އިޝާރަތް ކުރައްވައި ހަޔަރ އެޑިޔުކޭޝަނުން ބުނީ މިއީ ޗައިނާގައި ހުންނަ ރާއްޖެ އެމްބަސީ މެދުވެރިކޮށް ލިބިފައިވާ ފުރުސަތެއް ކަމަށެވެ. އެއީ 2 ބެޗްލަރސް ޑިގްރީއާއި އެއް ޕީ.އެޗް.ޑީ ޕްރޮގްރާމެވެ. ޗައިނާގައި ކިޔެވުމަށް ހަމަޖެހިފައިވާއިރު، 14 ފެބްރުއަރީވާ ހޯމަ ދުވަހުގެ މެންދުރުފަހު 1:30ގެ ކުރިން ފޯމް ހުށަހަޅަން ޖެހޭ ކަމަށެވެ.
ހަޔާރ އެޑިޔުކޭޝަނުން ބުނީ އެޕްލިކޭޝަން ހުށަހަޅާނީhttps://myedu.egov.mv ޕޯޓަލް މެދުވެރިކޮށް ކަމަށާއި، އިތުރު މައުލޫމާތު މިނިސްޓްރީގެ ވެބްސައިޓުން ލިބޭނެ ކަމަށެވެ.
