ކޯޓުތަކަށް ބޭނުންވާ އެކަށީގެންވާ އިމާރާތްތަކާއި ވަސީލަތްތައް ފޯރުކޮށްދިނުމަކީވެސް އިންސާފު އަވަސްކުރުމަށް ކުރަން ޖެހޭ ކަމެއް ކަމަށް ކެންދޫ ދާއިރާގެ މެމްބަރު އަލީ ހުސެއިން ވިިދާޅުވެއްޖެއެވެ.

ފަނޑިޔާރުންގެ ގާނޫނަށް އިސްލާހު ގެނައުމުގެ ބިލަށް ވާހަކަދައްކަވަމުން އަލި ހުސެއިން ވިދާޅުވީ، މިއީ 2022 ވަނަ އަހަރު ކަމަށާއި، އަދިވެސް މާލޭގައި ކޯޓުގެ އެންމެ އިމާރާތެއްވެސް އިތުރަށް ނޭޅޭ ކަމަށެވެ. ކޯޓުތަކަށް ބޭނުންވާ އެކަށީގެންވާ އިމާރާތްތަކާއި ވަސީލަތްތައް ފޯރުކޮށްދިނުމަކީވެސް އިންސާފު އަވަސްކުރުމަށްޓަކައި އަދި ފަނޑުޔާރު ގެ ރަނގަޅުކުރުމަށްޓަކައި ކޮންމެހެން ކުރަންޖެހޭ ކަމެއް ކަމަށެވެ. އަދި 2008 ގެ ފަހުން މާލޭގައި އަލަށް ކޯޓުގެ އިމާރާތެއް އެޅިފައިނުވާކަމަަށެވެ. ތުހުމަތު ކުރެވޭ މީހާއާއި ހެކިންގެ ގޮތުގައި ގެންނަ މީހާއާއި ތިބޭނީ ގާތްގަނޑަކަށް އަތްދަމާލީމާ އަތްޖެހޭ ހިސާބު ކައިރީގައި ކަމުގައި އަލި ހުސެއިން ފާހަގަކުރެއްވިއެވެ.

އިމާރާތްކުރާނެ ބިމާއި ފައިސާ އަދި އިމާރާތް ކުރާނެ ކުންފުނިވެސް ދައުލަތުގެ ބެލުުމުގެ ދަށުގައި އޮތްއިރު، ޖުޑީޝިއަރީ އާއި ގުޅުންހުރި އިމާރާތްތަކާއި އޭ.ސީ.ސީ އާއި އަދި ދައުލަތުގެ ބޮޑެތި މިނިސްޓްރީތައް އަމިއްލަ މީސްމީހުންގެ ގޯތިގެދޮރުގައި ހިންގާ ހިސާބުގައިތޯ އަލީ ހުސެއިން ސުވާލު އުފެއްދެވިއެވެ.

ފަނޑިޔާރުންނަށް ދޭ ޙައްޤުތަކުގެ ވާހަކަ ދައްކާއިރު، ފަނޑިޔާރުންނަށް ބޭނުންވާ އަސާސީ މިނިވަންކަމާއި އަދި ބިރެއް ނެތި މަސައްކަތްކުރުމުގެ މިނިވަންކަން ވެސް ފަނޑިޔާރުންނަށް އޮންނަން އެބަ ޖެހޭ ކަމަށް އަލީ ހުސެއިން ވިދާޅުވިއެވެ. އޭނާ ވިދާޅުވީ، 2008 ވަނަ އަހަރު ގާނޫނޫ އަސާސީ ވުޖޫދުވުމާއެކު ދައްކަން ފެށި ވާހަކައަކީ ޖޭ.އެސް.ސީ އެކުލަވާލާފައި އޮތް ގޮތުން ފަނޑިޔާރުންނަށް ބޭނުންވާ މިނިވަންކަން ނުލިބޭ ކަމުގެ ވާހަކަ ކަމަށެވެ.

އަލީ ހުސެއިން ވިދާޅުވީ، މިއީ މިހާރު ޖޭ.އެސް.ސީގައި ތިއްބެވި ބޭފުޅުން ކަނޑައެޅިގެން ފަނޑިޔާރުންނަށް ނުފޫޒު ފޯރުވައިގެން ކަންކަން ކުރާ ވާހަކަ ނޫން ކަމަށާއި، ކޮންމެ މީހަކީ ވެސް އިންސާނަކަށް ވީތީ ތަބީޢީ ގޮތުންނާއި ގުދުރަތީ ގޮތުން އެ ފޯރުވޭ ނުފޫޒާއި ކުރެވޭ ކަންތަކާއި، ދެން އަދި ބަލަން ހުންނަ މީހާއަށް ފެންނަ ގޮތް އެއީ ބަދަލުވާނެ އެއްޗެއް ނޫން ކަމަށެވެ. އެހެންކަމުން ޖޭއެސްސީ އެކުލަވާލާފައި އޮތް ގޮތް ބަދަލުކޮށްގެންވާ ގޮތެއް ބަލަން ޖެހޭ ކަމަށް ވިދާޅުވިއެވެ. އަދި ވަގުތު އޮވެ އެކަން ކުރަން ޖެހޭ ކަމަށާއި، ގެންނަ ބަދަލުގެ ސަބަބުން ކަންކަން ރަނގަޅު ނުވާނަމަ އިސްލާހު ކުރުމުގެ ފުރުސަތު އޮންނާނެ ކަމަށެވެ. މިއަދު މެޖޯރިޓީގައި ތިބެ އެކަން ނުކުރެވި މެޖޯރިޓީ ގެއްލޭ ހިސާބުން ދެން އެވާހަކަދެއްކުމުގެ ބޭނުމެއް ނޯންނާނެކަމަށް އަލި ހުސެއިން ވިދާޅުވިއެވެ.

ފަނޑިޔާރުންގެ ގާނޫނަށް ހުށަހެޅިފައިވާ އިސްލާހާއި ގުޅޭގޮތުން އަލީ ހުސެއިން ވިދާޅުވިީ، ވަކިވަކި މުއައްސަސާތަކުގެ ގާނޫނަށް އިސްލާހު ހުށަހެޅުމުގެ ބަދަލުގައި ވަޒީފާއާ ބެހޭ ގާނޫނު ހިނގާ ހުރިހާ އެންމެންގެ ވާހަކަ އެއް ގާނޫނެއްގައި އޮތުން މުހިންމު ކަމަށެވެ. ފަނޑިޔާރުންނަށްވެސް ހައްގުވާ ޗުއްޓީ ލިބެންޖެހޭ ކަމަށް ގަބޫލްކުރައްވާ ކަމަށްވެސް ވިދާޅުވިއެވެ.