އަބުރާއި ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލާއެކު 36 ބިލެއް ސަރުކާރުން ހުށައަޅަނީ
ސަރުކާރުން 36 ބިލެއް ހުށައެޅުމަށް ނިންމައި އެކަން މަޖިލީހަށް އަންގާފައިވޭ
އޭޖީ އިބްރާހިމް ރިއްފަތު ރައްޔިތުންގެ މަޖިލީހުގެ ރައީސާއި ސަލާމްކުރައްވަނީ- އޭޖީ އޮފީހުން ވަނީ ބިލުތަކުގެ މައުލޫމާތު ސިޓީއަކުން މަޖިލީހަށް ފޮނުވާފައި
ސަރުކާރުގެ ފަރާތުން ރައްޔިތުންގެ މަޖިލީހުގެ 2022 ވަނަ އަހަރުގެ ފުރަތަމަ ދައުރަށް 36 ބިލެއް ހުށައެޅުމަށް ޤަސްތުކުރާކަމަށް ބަންޑާރަ ނާއިބު (އޭޖީ) އޮފީހުން ބުނެފިއެވެ.
މި ދައުރުގައި ސަރުކާރުން 36 ބިލެއް ހުށައެޅުމަށް ނިންމައި އެކަން މަޖިލީހަށް އަންގާފައިވާކަމަށް އަންގާރަ ދުވަހުގެ މަޖިލިސް ޖަލްސާގައި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެފައިވެއެވެ.
އެ ބިލުތަކުގެ ތަފްސީލުތައް އޭޖީ އޮފީހުން ވަނީ ހިއްސާކޮށްފައެވެ.
އޭޖީ އޮފީހުން މިހާރު ވަނީ މި ލިސްޓު މަޖިލީހަށްވެސް ފޮނުވާފައެވެ.
ޤާނޫނުތަކަށް ގެނެވޭ އިސްލާޙުތަކާއި ގުޅޭ ބިލުތަކުގެ އިތުރުން އަލަށް އެކުލަވާލާ ޤާނޫނުތަކާއި ގުޅޭ ބިލުތައްވެސް ހިމެނޭއިރު، އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލުވެސް އޭގެ ތެރޭގައި ހިމެނެއެވެ.
އޭޖީ އޮފީހުން އެކަމާއި ގުޅިގެން ބުނެފައިވަނީ، އާންމު ގަވާއިދުތަކާއި ބެހޭ ގާނޫނުގައި ހިމެނޭ، އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ގަވާއިދަކީ މިހާރުވެސް ތަންފީޒުކުރެވެމުންދާ ގަވާއިދެއްކަމަށެވެ. އަދި މި ބިލަކީ، އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ގަވާއިދަށް ބާރު ލިބިދިނުމަށް ބޭނުންވާ ގާނޫނީ އޮނިގަނޑު އެކުލަވާލުމަށް ހުށަހަޅާ ބިލެއްކަމަށް ސަރުކާރުން ވަނީ ބުނެފައެވެ.
އާންމު ގަވާއިދުތަކާއި ބެހޭ ގާނޫނަކީ މިހާރު އަމަލުކުރަމުން އަންނަ އައު ގާނޫނު އަސާސީ އައުމާއެކު، ކުރިން އަމަލުކުރަމުންދިޔަ ގަވާއިދުތަކަށް އަމަލުކުރުމުގެ ގާނޫނީ ބާރެއް ދިނުމަށްޓަކައި އެކުލަވާލާފައިވާ ޤާނޫނެކެވެ. މި ގާނޫނުގެ ދަށުން ހުރި ގަވާއިދުތަކަށް އަމަލުކުރަމުން އަންނާނީ އެގަވާއިދަކާއި ގުޅުންހުރި ގާނޫނެއް ވުޖޫދުވަންދެންނެވެ. އެގާނޫނެއް ވުޖޫދުވަންދެން އަމަލުކުރުމުގެ މުއްދަތު އަންނަނީ އިތުރުކުރަމުންނެވެ.
އަބުރު ރައްކާތެރި ކުރުމާއި ޚިޔާލު ފާޅުކުރުމުގެ ގާނޫނެއް ކުރީގެ ރައީސް ޢަބްދުﷲ ޔާމީނުގެ ސަރުކާރުގައި 2016 ވަނަ އަހަރުގެ އޯގަސްޓް މަހުގެ 11ވަނަ ދުވަހު ތަސްދީގުކޮށް އެއަށް އަމަލުކުރަމުންދިޔައެވެ. އަދި އެގާނޫނުގެ ބޭނުންކޮށްގެން ރާއްޖޭގައި އޭރު ހިންގަމުންދިޔަ ހުރިހާ ޕްރައިވެޓް ޓީވީ ސްޓޭޝަންތައް ބޮޑެތި އަދަދުތަކުން ޖޫރިމަނާކުރިއެވެ. އޭގެތެރެއިންވެސް ރާއްޖެޓީވީ ވަނީ 4 މިލިއަނާއި ގާތްކުރާ އަދަދަކުން ޖޫރިމަނާކޮށްފައެވެ. އެގާނޫނު އުވާލާފައިވަނީ މިހާރު ހިނގަމުންދާ ސަރުކާރުން 22 ނޮވެމްބަރު 2018 ގައެވެ.
އެގާނޫނު އުވާލުމަށްފަހު، އަބުރު ރައްކާތެރި ކުރުމާއި ޚިޔާލު ފާޅުކުރުމުގެ މިނިވަންކަމާއި ގުޅޭގޮތުން ހެދިފައިވާ ގަވާއިދަށް ގާނޫނީ ބާރުވެރިކަން ދިނުމަށް އައު ގާނޫނެއް ވުޖޫދަށް ގެނައުމުގެ މަސައްކަތް ކުރަމުންދާ ކަމަށް ސަރުކާރުން މީގެކުރިންވެސް ވަނީ ބުނެފައެވެ. އެގޮތުން އަލަށް ވުޖޫދުވާ އަބުރުގެ ގާނޫނުގައި މި ކުށް އޮންނާނީ މަދަނީ ކުށެއްގެ ގޮތުގައި ކަމަށާއި، މި ގާނޫނުގެ ދަށުން ނޫސްވެރިންނަށް އެއްވެސް ގޮންޖެހުމެއް ކުރިމަތިނުވާނެ ކަމުގެ ޔަގީންކަން އޭޖީ އޮފީހުން ވަނީ ދީފައެވެ.
އޭޖީ އޮފީހުން ބުނީ އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލްގައި މައިގަނޑު ގޮތެއްގައި އެކުލެވޭނީ، އަބުރާ ބެހުމަކީ ކޮބައިކަމާއި، އަބުރާ ބެހުން ކަމަށް ނުބެލެވޭނެ ހާލަތްތަކާއި، މީހެއްގެ އަބުރާ ބެހެފިނަމަ، އެކަމުގެ ސަބަބުން އަބުރާ ބެހެވޭ މީހާއަށް ލިބޭ ގެއްލުމަށް މަދަނީ ބަދަލު ނަގައި ދިނުމުގެ އުސޫލުތަކާއި، އަބުރާ ބެހުމުގެ މަދަނީ ދައުވާއެއް ލިބޭ ފަރާތްތަކަށް ލިބިދޭ ދިފާއުތަކާއި ގުޅޭ އުސޫލުތަކެވެ.
