ރާބިތަތުލް އާލަމިލް އިސްލާމީގެ ސެކްރެޓަރީ ޖެނެރަލް، ރައީސްގެ އަރިހަށް ޒިޔާރަތެއް ކުރައްވައިފި
7 ފެބުރުއަރީ 2022 | ހޯމަ 12:18މި ބައްދަލުކުރެއްވުމުގައި ދެ ގައުމުން ގުޅިގެން މަސައްކަތްކުރުމަށް މަޝްވަރާކުރައްވާފައިވޭ
ރާބިތަތުލް އާލަމިލް އިސްލާމީގެ ސެކްރެޓަރީ ޖެނެރަލް ރައީސްއާ ބައްދަލުކުރެއްވުން
ރާބިތަތުލް އާލަމިލް އިސްލާމީގެ ސެކެޓްރީ ޖެނެރަލް، ޝައިޚް ޑޮކްޓަރ މުހައްމަދު ބިން އަބްދުލްކަރީމް އަލް އީސާ، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ އަރިހަށް އިހުތިރާމުގެ ޒިޔާރަތެއް ކުރައްވައިފިއެވެ.
މި ބައްދަލުކުރެއްވުން ކުރިއަށް ގެންގޮސްފައިވަނީ ހޯމަ ދުވަހުގެ ހެނދުނު ރައީސުލްޖުމްހޫރިއްޔާގެ އޮފީހުގައެވެ. މި ބައްދަލުކުރެއްވުމުގައި ދެ ބޭފުޅުންވެސް ވަނީ ރާއްޖެއާ ރާބިތާއާ ދެމެދު އުފެދިފައިވާ ގާތް ގުޅުން ފާހަގަކުރައްވައި، އިސްލާމް ދީން ކުރިއެރުވުމަށާއި އިސްލާމް ދީނާމެދު ޣައިރު މުސްލިމުންގެ މެދުގައި އުފެދިފައިވާ ކުށްހީތައް ނައްތާލައި އިސްލާމް ދީނުގެ ސައްހަ އަގީދާ ހާމަކޮށްދިނުމުގައި ގުޅިގެން މަސައްކަތްކުރުމާ ބެހޭގޮތުން މަޝްވަރާކުރައްވައިފައެވެ.
ރައީސުލްޖުމްހޫރިއްޔާގެ ވާހަކަފުޅުގައި، ޝައިޚް ޑޮކްޓަރ މުހައްމަދު ބިން އަބްދުލްކަރީމް އަލް އީސާގެ ހިންގުންތެރިކަމުގެ ދަށުން ރާބިތަތުލް އާލަމިލް އިސްލާމީގެ މަސައްކަތްތައް ބައިނަލްއަގުވާމީ މުޖްތަމައުން ބަލައިގެންފައިވާ ކަމަށާއި, އިސްލާމް ދީން ކުރިއެރުވުމަށް ރާބިތާއިން މުހިންމު މަސައްކަތްތަކެއް ކުރަމުން ގެންދާކަމުގައި އެ މަނިކުފާނު ވިދާޅުވިއެވެ. އެ މަނިކުފާނު ވަނީ ރާއްޖޭގައި ދީނީ ގޮތުން ހައްދުފަހަނައަޅައިދިއުން ހުއްޓުވުމަށް ތައުލީމީ މަންހަޖުގެ ތެރޭގައި އިސްލާމީ ސައްހަ އަގީދާ ހިމެނުމާއި, ދިވެހިންގެ މެދުގައި އިސްލާމީ އަގީދާ އަށަގެންނެވުމަށްޓަކައި ދީނުގެ ކަންކަމުގެ ހަގީގަތް އޮޅުންފިލުވަދިނުމުގައި ރާބިތާގެ އެހީތެރިކަމަށް އެދިވަޑައިގެންފައެވެ.
ރާއްޖެއަށް ދަތުރުފުޅެއް ކުރެއްވުމަށް ރައީސުލްޖުމްހޫރިއްޔާ ދެއްވި ދައުވަތަށްޓަކައި ޝުކުރު އަދާކުރައްވައި، ރާބިތާގެ ސެކެޓްރީ ޖެނެރަލް ދެއްކެވި ވާހަކަފުޅުގައި، ރައީސުލްޖުމްހޫރިއްޔާއަކީ އެ މަނިކުފާނުގެ ހިކުމަތު އަމަލީގެ ސަބަބުން ބައިނަލްއަގުވާމީ މުޖްތަމައުގައި ގަދަރު ލިބިވަޑައިގެންވާ ބޭފުޅެއް ކަމުގައި ވިދާޅުވިއެވެ. އެ މަނިކުފާނުގެ ވާހަކަފުޅުގައި، "ޗާޓަރ އޮފް މައްކާ"ގެ މައްޗަށް ފުޅާ ދާއިރާއެއްގައި ވާހަކަފުޅުދައްކަވާފައިވެއެވެ. އެގޮތުން މި ޗާޓަރަކީ އިސްލާމީ ދަންނަބޭކަލުންގެ ބޮޑު އާބާދީއެއް އެއަށް އެއްބަސްވެފައިވާ އެއްޗެއްކަމުގައި ވިދާޅުވިއެވެ. އަދި މިއީ އިސްލާމް ދީނުގެ ސައްހަ އަސާސްތައް ހިމެނޭހެން ދިރިއުޅުމަށް މަގުދައްކައިދޭ މުހިއްމު އެއްޗެއްކަމަށް ވިދާޅުވިއެވެ.
ދެ ބޭފުޅުންގެ ބައްދަލުވުން ނިންމަވާލައްވާފައިވަނީ ދިވެހިރާއްޖެއާއި ރާބިތާއާ ދެމެދު އޮތް ގުޅުން އިތުރަށް ވަރުގަދަކޮށް, އިސްލާމް ދީނުގެ ސައްހަ އަގީދާ ދެމެހެއްޓުމުގައި އެހީތެރިވުމުގެ ރޫހު އާލާކުރައްވަމުންނެވެ.
