ދިވެހިރާއްޖޭގެ ޑިމެކްރޮސީގެ ހަޔާތުގައި 2012ވަނަ އަހަރުގެ ފެބްރުއަރީ މަހުގެ 7ވަނަ ދުވަހަކީ ފާހަގަކޮށްލެވޭ ދުވަހެކެވެ. ފަހުގެ ތާރީޚެއްގައި ރާއްޖޭގައި ރައްޔިތުންގެ ވޯޓަކުން އިންތިޚާބު ކޮށްފައިވާ ވެރިކަމެއް, ވަކި ބައެއްގެ އަމިއްލަ އެެދުމެއްގައި، ސިޔާސީ ހަމަނުޖެހުންތައް ހިންގައި، ސަލާމަތީ ބާރުތަކުގެ މެދުގައި އުފެދުނު ހަމަނުޖެހުންތަކާއެކު ވައްޓާލި ދުވަހެވެ.

އޭރު ރާއްޖޭގެ ވެރިކަމުގައި ހުންނެވީ، ރާއްޖޭގައި ބޭއްވި ފުރަަތަމަ މަލްޓިޕާޓީ އިލެކްޝަން ކާމިޔާބު ކުރެއްވި މުހައްމަދު ނަޝީދެވެ. އެމަނިކުފާނު އަމިއްލަފުޅަށް އިސްތިއުފާދެއްވީ، ގައުމުގައި އުފެދުނު ހަމަނުޖެހުންތައް ތަޅާފޮޅުމަކަށް ބަދަލުވުމުންނެވެ. ޖުމްހޫރީ މައިދާނަށް ފުލުހުންނާއި ސިފައިން ނުކުމެ ހަމަނުޖެހުން ހިންގިއެވެ. ގައުމުގެ ސަލާމަތާއި ރައްކާތެރިކަން ކަށަވަރު ކުރުމަށް ހުވާކޮށްގެން ތިބި ސަލާމަތީ ބާރުތަކުގެ ސަފުތައް ރޫޅި އޭރުގެ ސަރުކާރާ ދެކޮޅަށް ނުކުތެވެ.

ފެބްރުއަރީ މަހުގެ 7ވަނަ ދުވަހާ ހަމައަށް ދިޔައީ އޭރު އިދިކޮޅުގައި ތިބި ސިޔާސީ ފަރާތްތައް އެކައްޗެއް ކިޔައި، ހިންގަން ފެށި ސިޔާސީ ހަރަކާތްތަކާއި މުޒާހަރާތަކަށް ފަހުއެވެ. މަޝްހޫރު 22 ދުވަހުގެ މުޒާހަރާގެ ފެށުމަކަށްވެގެން ދިޔައީ އޭރު ވެރިކަމުގައި އޮތް އެމްޑީޕީން ފަނޑިޔާރުގެ އިސްލާހު ކުރުމަށް ފެށި މަސައްކަތެވެ. ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރުކޮށް, އާރަށުގައި އެކަހެރިކޮށް ބެހެއްޓި ހިސާބުން މުޒާހަރާތައް ފެށުނެވެ.

ޖުމްހޫރީ ޕާޓީއާއި، އަދާލަތު ޕާޓީއާއި މަދަނީ ބައެއް ޖަމިއްޔާތަކުން ނިކުމެ, އެމްޑީޕީއަކީ ލާދީނީ ފިކުރުގެ ބަޔެއް ކަމަށާއި, އަދި ދީނަށާއި ރަސޫލާއަށް ނިސްބަތްވާގޮތައް ނޭދެވޭ ވާހަކަތައް އޭރުގެ ރައީސް ނަޝީދު ދައްކާކަމައް ބުނެ މުޒާހަރާތައް ބޭއްވިއެވެ.

މުޒާހަރާތައް ނިމުމަކަށް އައީ، ރައީސް ނަޝީދު އިސްތިއުފާ ދެއްވުމުންނެވެ. އިސްތިއުފާ ދެއްވިކަން ހާމަކުރައްވަމުން ރައީސް ނަޝީދު ވިދާޅުވީ އިސްތިއުފާ ދެއްވީ އެމަނިކުފާނު އިތުރަށް ރައީސް ކަމުގެ މަގާމުގައި ދެމި ހުންނަވައިފި ނަމަ ރާއްޖޭގެ ރައްޔިތުންނަށާއި ގައުމަށް ބޮޑެތި ގެއްލުންތަކެއް ވާނެ ކަމަށް ގަބޫލުކުރެއްވިގެން ކަމަށެވެ. ވެރިކަން ދަމަހައްޓަވަން އުޅުއްވި ނަމަ ނުހަނު ބޮޑަށް ބާރުގެ ބޭނުން ކުރަން ޖެހި, ރައްޔިތުންނަށް ގެއްލުންވީސް ކަމަށް ރައީސް ނަޝީދު ވިދާޅުވެފައިވެއެވެ. ވެރިކަން އިތުރަށް ދަމަހައްޓަވަން މަސައްކަތް ކުރައްވައިފިނަމަ ބޭރުގެ ނުފޫޒުވެސް ރާއްޖެ އައުމަކީ ގާތް ކަމެއްގެ ގޮތުގައި ރައީސް ނަޝީދު އެދުވަހު ވިދާޅުވިއެވެ.

ޖެހިގެން އައި ފެބްރުއަރީ މަހުގެ 8ވަނަ ދުވަހު, އެއީ ބަޔަކު ރާވައިގެން ހިންގި ބަޣާވާތެއް ކަމަށް ރައީސް ނަޝީދު އިއުލާން ކުރެއްވުމާއެކު, ދެން ވެރިކަމުގެ ހުވާ ކުރެއްވި ޑރ. މުހައްމަދު ވަހީދު ހަސަން މަނިކަށް ތުހުމަތުތައް ކުރަން ފެށިއެވެ. މި ތުހުމަތުތައް އަދިވެސް ކުރެއެވެ. އެއާއެކު ރައީސް ވަހީދުގެ ގަރާރަކުން ހަމަ އެ އަހަރު ކޮމިޝަނެއް އުފައްދައި ތަހުގީގުކުރިއެވެ. އެ ކޮމިޝަނުން ނެރުނު ކޯނީ ރިޕޯޓުގައި ބުނެފައި ވަނީ ރައީސް ނަޝީދު އިސްތިއުފާ ދެއްވުމުގައި ގާނޫނާ ޚިލާފު މަޖުބޫރު ކުރުމެއް ނުވަތަ ބިރުދެއްކުމެއް ވެސް ނެތް ކަމަށެވެ. އޭރުގެ ނައިބު ރައީސް ވަހީދު ވެރިކަމާ ހަވާލުވެވަޑައިގަތީ ގާނޫނާ އެއްގޮތަށް ކަމަށްވެސް ރިޕޯޓުގައި ބުނެފައިވެއެވެ. އެ ހާދިސާއަށް 10 އަހަރު ވެގެންދިޔައިރު އަދިވެސް އެކަމަށް އިންސާފު ލިބިވަޑައި ނުގަންނަވާ ކަމަށް ރައީސް ނަޝީދު ވިދާޅުވެއެވެ.

ފެބްރުއަރީ 7 ތަހުގީގު ކުރުމަށް އެމްޑީޕީން ބޭނުންވެއެވެ. އަދި އެކަމަށް މިއަދުވެސް ދަނީ ގޮވާލަމުންނެވެ. ރައީސް ނަޝީދު ކުއްލިގޮތަކަށް އިސްތިއުފާ ދެއްވަން ޖެހުނު ސަބަބާއި، ފުލުހުންނާއި ސިފައިންގެ މެދުގައި ކުރިޔަށްދިޔަ ކުރިމަތިލުމާއި އެ މީހުން ރައްޔިތުންނަށް ކުރި އަނިޔާތަކެވެ. އެކަމަށް އޯޑަރުނެރުނު ކޮންމެވެސް މީހަކު ހުންނާނެ ކަމަށް އެމްޑީޕީން ގަބޫލު ކުރެއެވެ. އެމްޑީޕީން އެދުވަސް ފާހަގަކުރަނީ ކަޅު ދުވަހެއްގެ ގޮތުގައެވެ.