ފާރިސްގެ ބޮޑުދައިތާފުޅު ފަސްދާނު ލައްވައިފި

ބުދަ ދުވަހުގެ ރޭ އަވަހާރަވި ކުރީގެ ރައީސުލްޖުމްހޫރިއްޔާ މައުމޫން ޢަބްދުލްޤައްޔޫމްގެ އަނބިކަނބަލުން މެޑަމް ނަސްރީނާ އިބްރާހިމްގެ ކޮއްކޯފުޅު އަދި ކުރީގެ އިންފޯމޭޝަން މިނިސްޓަރ ސަމަރުބުލޫ އިބްރާހިމް މަނިކުގެ އަނބިކަނބަލުން ފަރީޝާ އިބްރާހިމް ފަސްދާނުލައްވައިއެވެ.

އެކަމަނާ ފަސްދާނުލައްވާފައިވަނީ، ސިންގަޕޫރުގައި ހުކުރު ދުވަހުއެވެ.

Advertisement

އެކަމަނަމާގެ މައްޗަށް އިމާމުވެ ކަށުނަމާދު ކުރައްވާފައިވަނީ، ފަރީސާގެ އެއްބަނޑު އެއްބަފާ ދައްތާފުޅުގެ ފިރިކަލުން ކުރީގެ ރައީސް މައުމޫނު އަބުދުލް ގައްޔޫމެވެ.

އެކަމަނާގެ ޖަނާޒާއަށްފަހު ރައީސް މައުމޫނު ކުރައްވާފައިވާ ޓްވީޓެއްގައި ވިދާޅުވީ، ފަރީސާ އަވަހާރަވުމަކީ ލިބުނު ފުން ހިތާމައެއްކަމަށާއި، އެކަމަނާއަށް ހެއު ރަހުމަތް ލެއްވުން އެދި ދުއާ ކުރާކަމަށެވެ.

ޖަނާޒާގައި ބައިވެރިވެދެއްވި ހުރިހާ ފަރާތްތަކަށް ރައީސް މައުމޫނު ވަނީޝުކުރު އަދާކުރައްވާފައެވެ.

ފަރީޝާ އަވަހާރަވެފައިވަނީ އެކަމަނާގެ ހާލު އިންތިހާއަށް ދެރަވެ، ސިންގަޕޫރުގައި ފަރުވާދެމުންދަނިކޮށް، ބުދަދުވަހުގެރޭ ރާއްޖެ ގަޑިން 20:30 ހާއިރުއެވެ. މައުލޫމާތު ލިބިފައިވާ ގޮތުގައި އަވަހާރަވިއިރު އެކަމަނާގެ އުމުރުފުޅަކީ 65 އަހަރުފުޅެވެ.

ސިއްހީ ހާލަތު ދެރަވުމާއި ގުޅިގެން ފަރީޝާއަށް ފުރަތަމަ ފަރުވާ ދީފައިވަނީ އިންޑިއާގެ ބެންގަލޫރޫގައެވެ. އެގޮތުން، މި އަހަރުގެ މާރިޗު މަހުން ފެށިގެން ބެންގަލޫރުގައި ފަރުވާ ދިނުމަށްފަހު، އެކަމަނާގެ ހާލަތު މާބޮޑަށް ގޯސްވުމުގެ ސަބަބުން، އިތުރު ފަރުވާ ދިނުމަށް ސިންގަޕޫރަށް ބަދަލުކޮށްފައިވަނީ މި މޭމަހުގެ 16 ވަނަ ދުވަހުގެރެއެވެ.

ފަރީޝާ އަވަހާރަވިއިރު، ރައީސް މައުމޫނާއި މެޑަމް ނަސްރީނާގެ އިތުރުން ފަރީޝާއަށް ބޮޑުދައިތަ ވިދާޅުވާ ޔުމްނާ މައުމޫނާއި، ޣައްސާން މައުމޫންވެސް މިވަގުތު ތިއްބެވީ ސިންގަޕޫރުގައެވެ. މީގެ ކުރިން ފަރީޝާ އާއި ބައްދަލުކުރެއްވުމަށް ދުންޔާ މައުމޫންވެސް ވަނީ ސިންގަޕޫރަށް ވަޑައިގެންފައެވެ.

ރައީސް މައޫމޫންގެ ބޭފުޅުންގެ ތެރެއިން، ފަރީޝާއާއި ބައްދަލުކުރެއްވިފައި ނުވަނީ ރައީސް މައުމޫންގެ ދޮށީ ފިރިހެން ދަރިކަލުން ފާރިސް މައުމޫނަށެވެ. ފާރިސްއަށް ފަރީޝާއާއި ބައްދަލުކުރެވިފައި ނުވަނީ، ސަރުކާރުން ފާރިސްގެ ޕާސްޕޯޓް ހިފަހައްޓައި، އެއްވެސް ގޮތަކަށް ރާއްޖެއިން ބޭރަށް ވަޑައިގަތުމުގެ ފުރުޞަތު ނުދިނުމުންނެވެ.