ފަނޑިޔާރުގެ އިސްލާހު ކުރުމުގެ ވާހަކަދައްކާއިރު ހަނދާނަށް އަންނަނީ އެމްޑީޕީގެ ފުރަތަމަ ވެރިކަން ނިމިގެންދިޔަ ގޮތް - އިންތި
7 ފެބުރުއަރީ 2022 | ހޯމަ 05:34ޖޭއެސްސީވެސް އޭގެ ގޮތުގައި މަސައްކަތް ކުރަން ފަށާފައި
ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
ފަނޑިޔާރުގެ އިސްލާހު ކުރުމުގެ ވާހަކަ ދައްކާއިރު ހަނދާނަށް އަންނަނީ އެމްޑީޕީގެ ފުރަތަމަ ވެރިކަން ނިމިގެންދިޔަ ގޮތް ކަމަށް ރައްޔިތުންގެ މަޖިލީހުގެ މާފަންނު އުތުރު ދައިރާގެ މެމްބަރު އިމްތިޔާޒު ފަހުމީ (އިންތި) ވިދާޅުވެއްޖެއެވެ.
އިންތި މިހެން ވިދާޅުވީ، ފަންޑިޔާރުންގެ ގާނޫނަށް އިސްލާހު ގެނައުމުގެ ބިލަށް ވާހަކަދައްކަވަމުންނެވެ. އިންތި ވިދާޅުވީ، އެމްޑީޕީގެ ވެރިކަން ބަޣާވާތަކުން ވައްޓާލީވެސް ފަނޑިޔާރުގެ އިސްލާހު ކުރުމަށް އެމްޑީޕީީން ފެށި މަސައްކަތުގެ ސަބަބުން ކަމަށެވެ. އެހެންކަމުން އެ ނުރައްކާ އެބައޮތް ކަން ގަބޫލްކުރައްވާ ކަމަށާއި، އެ ކަން އެހެން އޮތްނަމަވެސް ފަނޑިޔާރުގެ އިސްލާހު ކުރާނެކަމަށް އެމްޑީޕީން ވެފައިވާ ވައުދު ފުއްދުމަށް ކުރަމުން އަންނަ މަސައްކަތް ނިންމާ ނުލައްވާނެ ކަމަށް އިންތި ވިދާޅުވިއެވެ.
އިންތި ވިދާޅުވީ، ސުޕްރީމް ކޯޓަށް ގެނައި ބަދަލަކީ، ފާހަގަކުރެވޭ ކަމެއް ކަމަށާއި، ފަނޑިޔާރުން ބަދަލުކޮށް ވަކި ކުރުމަކީ ފަނޑިޔާރުގެ އިސްލާހުކުރުމަށް ކުރެވޭނެ ހަމައެކަނި މަސައްކަތް ނޫން ކަމަށެވެ. ގާނޫނުތަކަށް އިސްލާހު ގެނެސް ފަނޑިޔާރުގެ އިސްލާހު ކުރުމަކީ ކުރަމުން އަންނަ މަސައްކަތް ކަން ފާހަގަކުރައްވަމުން އިންތި ވިދާޅުވީ، މިހާރު މަދަނީ އިޖުރާއަތުގެ ގާނޫނު ފާސް ކުރެވި އެއަށް އަމަލު ކުރަން ފެށިގެންދާނެ ކަމަށެވެ. މީގެ ކުރިން މުޒާހަރާ ކުރާ މީހުން މަސް ދުވަސް ވަންދެން ހައްޔަރު ކޮށްފައިބަހައްޓާ ކަމަށާއި، މިހާރު އެކަން އެ ގޮތަށް ނުހިނގާ ކަމުގައި އިންތި ވިދާޅުވިއެވެ.
ޖޭއެސްސީވެސް އޭގެ ގޮތުގައި މަސައްކަތް ކުރަން ފަށާފައިވާ ކަމަށާއި، ފިޔަވަޅު އަޅަންޖެހޭ ފަނޑިޔާރުންނަށް އިންސާފުން ފިޔަވަޅު އަޅަމުން ގެންދާކަމަށް އިންތި ވިދާޅުވިއެވެ.
ފަނޑިޔާރުންގެ ގާނޫނަށް ހުށަހަޅާފައިވާ އިސްލާހާއި ގުޅިގެން އިންތި ވިދާޅުވީ، ވިހެއުމާ ގުޅިގެން ދެވޭ ހަމަހުގެ ޗުއްޓީއަކީ އެމްޑީޕީގެ އަދި ރައީސް ސާލިހުގެ ރިޔާސީ ވައުދުފުޅެއް ކަމަށާއި، ސިވިލް ސަރވިސް މީހުންނަށް ދެވޭ މި ޗުއްޓީ ފަނޑިޔާރުންނަށް ނުލިބެނީ އެއީ ސިވިލް ސަރވިސް މީހުންނަށް ނުވާތީ ކަމަށެވެ. އެހެންނަމަވެސް މި އިސްލާހުގެ ސަބަބުން ފަނޑިޔާރުންނަށް އެ ޗުއްޓީ ލިބޭނެ ގޮތް ހަމަޖެއްސުން އެއީ އިސްލާހުގެ މަގްސަދެއް ކަމުގައި ވިދާޅުވިއެވެ.
ފަނޑިޔާރުންގެ ގާނޫނެއް އެކުލަވާލާފައިވަނީ އެމްޑީޕީގެ ފުރަތަމަ ވެރިކަމުގައެވެ.
