އުތުރު ކޮރެއާއިން މިސައިލް ޓެސްޓްކުރާތީ އެމެރިކާ، ޖަޕާން އަދި ދެކުނު ކޮރެއާއިން އެކަމާ މަޝްވަރާކުރަނީ

އުތުރު ކޮރެއާއިން މިފަހަކުން ޓެސްޓް ކުރި ބެލެސްޓިކް މިސައިލްތަކުގެ ސަބަބުން އެމެރިކާއިން އުތުރު ކޮރެއާއަށް ކަނޑައަޅާފައި ހުންނަވާ ޚާއްސަ މަންދޫބު މިހަފްތާ ފަހުކޮޅު ޖަޕާނާއި ދެކުނު ކޮރެއާގެ އޮފިޝަލުންނާއި ބައްދަލުކުރައްވާނެކަމަށް އެމެރިކާއިން ބުނެފިއެވެ.

އެމެރިކާގެ ސްޓޭޓް ޑިޕާޓްމެންޓުން ނެރުނު ބަޔާނެއްގައި ބުނެފައިވަނީ އެމެރިކާގެ އެމްބަސެޑަރ ސަންގ ކިމް މިމަހުގެ 10 އިން 15 އަށް 3 ޤައުމުގެ މެދުގައި މަޝްވަރާ ބައްދަލުވުންތަކެއް ބާއްވަވާނެކަމަށެވެ. އެބައްދަލުކުރެއްވުމުގައި މިކަމާއި ގުޅިގެން ފުޅާ ދާއިރާއެއްގައި މަޝްވަރާކުރައްވާނެއެވެ.

އދ. ގެ ސެކިޔުރިޓީ ކައުންސިލުން އުތުރު ކޮރެއާއަށް ވަނީ ނިޔުކްލިއަރ ޓެސްޓްކުރުމާއި ބެލެސްޓިކް މިސައިލް ޓެސްޓްކުރުން މަނާކޮށްފައެވެ. ނަމަވެސް އެމެރިކާއިންނާއި އެމެރިކާ އާއި ގާތްގުޅުން އޮންނަ ފަރާތްތަކުން ބުނާގޮތުގައި ޖެނުއަރީ މަހު އެކަނިވެސް އުތުރު ކޮރެއާއިން ވަނީ 9 ބެލެސްޓިކް މިސައިލެއް ލޯންޗުކޮށްފައެވެ. މިއީ އެއްމަހުގެ ތެރޭގައި މިހާތަނަށް އެންމެ ގިނައިން މިސައިލް ޓެސްޓްކުރި މަސްކަމަށް ރިޕޯޓްކޮށްފައިވެއެވެ.

އދ. އިން ތައްޔާރުކޮށްފައިވާ ރިޕޯޓެއްގައި ބުނެފައިވާ ގޮތުގައި އުތުރު ކޮރެއާއިން ވަނީ އެޤައުމުގައި ކުރިޔަށްގެންދާ ނިޔުކްލިއަރ ހަތިޔާރު އުފެއްދުމުގެ ޕްރޮގްރާމާއި މިސައިލް ތަރައްޤީކުރުމުގެ ޕްރޮގްރާމް މިދިޔަ އަހަރުވެސް ކުރިޔަށް ގެންގޮސްފައެވެ.