މިދިޔަ އަހަރު ކްރިމިނަލް ކޯޓުގައި ތާވަލުކުރި 4852 މައްސަލައެއް ކެންސަލްވެފައިވޭ

މިދިޔަ އަހަރު ކްރިމިނަލް ކޯޓުގައި ތާވަލުކުރި 4852 މައްސަލައެއް ކެންސަލްވެފައިވާކަމަށް އެ ކޯޓުގެ ތަފާސްހިސާބުތަކުން ދައްކައިފިއެވެ.

ކްރިމިނަލް ކޯޓުން ވަނީ އެކޯޓުގެ 2021 ވަނަ އަހަރުގެ އަހަރީ ތަފާސްހިސާބުތައް އާންމުކޮށްފައެވެ. އެގޮތުން 2021 ވަނަ އަހަރު ފެށުނުއިރުވެސް ކޯޓުގައި ނުނިމި ހުރި މައްސަލަތަކުގެ ތެރޭގައި 1732 މައްސަލައެއް ހިމެނެއެވެ. އެ އަހަރު އަލަށް 773 މައްސަލައެއް ހުށައެޅިފައިވާއިރު، މުޅި އަހަރު ތެރޭގައި ނިންމިފައިވަނީ 701 މައްސަލައެވެ. އަދި އަހަރު ނިމުނުއިރު 1804 މައްސަލައެއް ނުނިމި ހުރިކަމަށް ކޯޓުގެ ތަފާސްހިސާބުތަކުން ދައްކައެވެ.

2021 ވަނަ އަހަރު 9973 މައްސަލަ ޝެޑިއުލްކޮށްފައިވެއެވެ. އޭގެ ތެރެއިން 4852 މައްސަލަ ކެންސަލްވެފައިވާއިރު، ކުރިއަށް ގެންދެވިފައިވަނީ 51 އިންސައްތަ އަޑުއެހުމެވެ. އެއީ 5121 މައްސަލައެވެ.

ކްރިމިނަލް ކޯޓުގައި އެ އަހަރު ކުރިއަށްދިޔަ މައްސަލަތަކަށް ބަލާއިރު، 2722 މީހުންގެ މުއްދަތު އިތުރު ކުރުމުގެ އަޑުއެހުންތައް ބޭއްވުނެވެ. އޭގެ ތެރެއިން 86 އިންސައްތަ މީހުން ބަންދު ކުރުމަށް ކޯޓުން އަމުރު ކޮށްފައިވާއިރު، ބަންދުން ދޫކޮށްލުމަށް އަމުރު ނެރެފައިވަނީ 14 އިންސައްތަ މީހުންނެވެ.

އޭގެ އިތުރުން، ކޯޓު އަމުރުތަކަށް ބަލާއިރު، 2021 ވަނަ އަހަރު 1529 ކޯޓު އަމުރެއްގެ މަސައްކަތް ކުރިއަށް ގެންގޮސްފައިވެއެވެ. އޭގެ ތެރެއިން 103 ރިކުއެސްޓަށް އަމުރު ދޫކޮށްފައެއް ނުވެއެވެ. ކޯޓުން މައުލޫމާތު ދޭ ގޮތުގައި އަމުރު ނެރުމުގެ މަސައްކަތަށް ނިމިދިޔަ އަހަރު 1835 ގަޑިއިރު ހޭދަކޮށްފައިވެއެވެ. އެއީ ދުވާލެއްގެ މައްޗަށް ބަލާނަމަ ގާތްގަނޑަކަށް 5 ގަޑިއިރެވެ.

2021 ވަނަ އަހަރު ކްރިމިނަލް ކޯޓުގެ ޝަރީއަތްތައް ކުރާ ސެކްޝަންތަކުން 2787 އަޑުއެހުން ރެކޯޑު ކޮށްފައިވެއެވެ. އެ އަޑުއެހުންތަކުގެ ދިގުމިން 1597 ގަޑިއިރަށް އަރައެވެ. އަދި 2036 ބަޔާން ލިޔެފައިވާއިރު، އޭގެ ދިގުމިން 1132 ގަޑިއިރަށް އަރައެވެ.

އޭގެ އިތުރުން، 2021 ވަނަ އަހަރު ވީޑިއޯ ކޮންފަރެންސްކޮށް 672 ބަޔާނެއް ނެގުމަށް މެޖިސްޓްރޭޓް ކޯޓުތަކުން އެދިފައިވާއިރު، އޭގެ ތެރެއިން 636 މައްސަލައެއްގައި ވީޑިއޯ ކޮންފަރެންސްކޮށް ބަޔާން ނަގައިދީފައިވެއެވެ.

ކްރިމިނަލް ކޯޓުގައި އާންމުކޮށް މައްސަަލަތައް ކެންސަލްވަނީ އިދާރީ އެކި ސަބަބުތަކާހެދިއެވެ.