އީސީގެ އޮފިޝަލުން ތިބީ ހުރިހާ ފަރާތްތަކުން އެއްބަސްވި ތަނެއްގައި: ފުއާދު
4 ފެބުރުއަރީ 2022 | ހުކުރު 23:15ފޯކައިދޫގައި މިވަގުތު އީސީގެ 15 މެމްބަރުން އެބަތިބި
އިލެކްޝަންސް ކޮމިޝަންގެ ރައީސް ފުއާދު ތައުފީގް | ރާއްޖެއެމްވީ
ކޮމަންޑޫ ދާއިރާގެ ބައި-އިލްކެޝަނުގެ ކަންތައްތައް އިންތިޒާމުކުރުމަށް ށ.ފޯކައިދޫއަށް ފޮނުވާފައިވާ އިލެކްޝަންސް ކޮމިޝަން (އީސީ)ގެ އޮފިޝަލުން ތިބީ އިދިކޮޅު ޕީޕީއެމްވެސް ހިމެނޭގޮތަށް ހުރިހާ ފަރާތްތަކާ މަޝްވަރާކުރުމަށްފަހު، އެފަރާތްތަކުގެ އެއްވެސް މައްސަލައެއް ނެތުމުން ކަމަށް އީސީގެ ރައީސް ފުއާދު ތައުފީޤް ވިދާޅުވެއްޖެއެވެ.
އިންތިޚާބަށް ނުފޫޒުފޯރުވުމަށް އެމްޑީޕީގެ މެމްބަރުން މަސައްކަތްކުރާ ކަމަށްބުނެ އިދިކޮޅުން ހިންގި ހަމަނުޖެހުމާއި ގުޅިގެން ރާއްޖެޓީވީއަށް މައުލޫމާތުދެއްވަމުން ފުއާދު ވިދާޅުވީ އީސީގެ މެމްބަރުން ފޯކައިދޫގައި ތިބޭނެ ތަނެއް ހަމަޖެއްސީ އެރަށަށް ކަނޑައަޅާފައިވާ ފޯކަލް ޕޮއިންޓުން ކަމަށެވެ. އަދި އެތަން ކަނޑައެޅުމުގެ ކުރިން އިދިކޮޅު ޕީޕީއެމްވެސް ހިމެނޭގޮތަށް ހުރިހާ ފަރާތްތަކާ މަޝްވަރާކޮށްފައިވާ ކަމަށެވެ.
އަދި އެތަނަކީ އެމްޑީޕީއަށް ނިސްބަތްވާ ފަރާތެއްގެ މެނޭޖުމެންޓެއް އޮންނަތަން އެނގިފައި ނުވާކަން ފާހަގަކުރައްވާ ފުއާދު ވިދާޅުވީ އިދިކޮޅުން ކުރާ ތުހުއްމަތުތަކާއެކު އެއްވެސް ޕާޓީއެއްގެ މެމްބަރަކަށް ނިސްބަތްނުވާ ތަނަކަށް އީސީގެ މެމްބަރުން ބަދަލުކުރުމަށް މިހާރު އަންގާފައިވާ ކަމަށެވެ. ސަބަބަކީ މަސްލަހަތައް ފުށުއަރާގޮތަށް އެއްވެސް ކަމެއް ކުރުމަށް ބޭނުންވާތީ ކަމަށްވެސް ފުއާދު ވިދާޅުވިއެވެ.
މިކަމުގެ ތެރޭގައި އެއްވެސް ކަހަލަ ނުބައި ނިޔަތެއް ނެތްކަން ޔަގީންކުރައްވާ ފުއާދު ވިދާޅުވީ އީސީގެ މަޤްޞަދަކީ މިނިވަން އިންސާފުވެރި އިންތިޚާބެއް ކުރިއަށް ގެންދިއުން ކަމަށެވެ.
އީސީގެ 15 އޮފިޝަލުން މިވަގުތު ފޯކައިދޫގައި އެބަތިއްބެވެ. އޭގެ ތެރޭގައި ހިމެނެނީ އެއްފޮށްޓެއްގެ ހަތް މެމްބަރުންނާއި އަނެއް ފޮށީގެ އަށް މެމްބަރުންނެވެ. މި ފަރާތްތައް ފޯކައިދޫއަށް ގޮސްފައިވަނީ ހުކުރު ދުވަހުގެ މެންދުރެއް ހާއިރުއެވެ.
މި މައްސަލަ ހައްލުކުރުމަށްޓަކައި މިހާރު މަސައްކަތް ކުރައްވަމުން އަންނަކަން ފާހަގަކުރައްވާ ފުއާދު ވިދާޅުވީ އެއްވެސް ޕާޓީއަކަށް ތާއިދު ނުކުރާ ގެއަކުން މިހާތަނަށް އީސީގެ މެމްބަރުން ތިބުމަށް ހަމަޖެހިފައި ނުވާކަމަށެވެ. އެހެންކަމުން ފުލުހުންގެ ފަރާތުން އީސީގެ މެމްބަރުންނަށް އެކޮމޮޑޭޝަން ހަމަޖެއްސުމުގެ މަސައްކަތް މިހާރު ކުރަމުން އަންނަ ކަމަށެވެ.
ހޮނިހިރު ދުވަހު އޮންނަ މި އިންތިޚާބަކީ 100 އިންސައްތަ އިންސާފުވެރި އިންތިޚާބެއްކަމަށް ގަބޫލުކުރައްވާ ކަމަށާއި، އިދިކޮޅުން ފާހަގަކުރާފަދަ އަމަލެއް އީސީގެ މެމްބަރުންގެ ފަރާތުން ނުފެންނާނެކަމުގެ އިތުބާރު އޮތްކަމަށް ފުއާދު ވިދާޅުވިއެވެ.
ފޯކައިދޫގައި ތިބި އީސީގެ މެމްބަރުންނާއި އެމްޑީޕީގެ މެމްބަރުން ބައްދަލުކޮށް އިންތިޚާބަށް ނުފޫޒުފޯރުވަން އުޅެކަމަށް އިދިކޮޅުން ވަނީ ބުރާސްފަތި ދުވަހުގެރޭ ތުހުއްމަތުކޮށްފައެވެ. އަދި މި ތުހުއްމަތުތަކާއެކު އިދިކޮޅުން ވަނީ އެސަރަހައްދުގައި ހަމަނުޖެހުން ހިންގާފައެވެ. އިދިކޮޅުން ތުހުއްމަތުކުރާ ގޮތުގައި ރ.އަލިފުށި ދާއިރާގެ މެމްބަރު މުހައްމަދު ރަޝީދު ހުސެއިން (ބިގޭ) ހިމެނޭހެން އެމްޑީޕީގެ ބައެއް މެމްބަރުން ވަނީ ފޯކައިދޫގެ ސަންސެޓް ރެސްޓޯރެންޓުގައި އީސީގެ މެމްބަރުންނާއި ބައްދަލުކޮށްފައެވެ.
މިކަމާއި ގުޅޭގޮތުން ރާއްޖެޓީވީއަށް މައުލޫމާތުދެއްވަމުން ފޯކައިދޫގައި ހުރި މީހަކު ބުނީ އެފަދަ އެއްވެސް އަމަލެއް ހިނގާފައިނުވާ ކަމަށެވެ. އަދި މި ތުހުއްމަތުތަކާއެކު އިދިކޮޅަށް ނިސްބަތްވާ ބައެއް ފަރާތްތަކުން އެރެސްޓޯރެންޓަށް ވަދެ އެތަން ބެލިއިރު އެތަނުގައި ބިގޭވެސް ނެތްކަމަށެވެ.
ފޯކައިދޫގައިތިބި އީސީގެ މެމްބަރުންގެ ކެއިންބުއިމުގެ ކަންތައްތައް ހަމަޖައްސާފައިވަނީ ސަންސެޓް ރެސްޓޯރެންޓުގައެއް ނޫނެވެ. އެމެމްބަރުންގެ ކެއިންބުއިމުގެ ކަންތައްތައް އެހެން ތަނެއްގައި ހަމަޖައްސާފައި ވާއިރު، އީސީގެ މެމްބަރުން އެރެސްޓޯރެންޓުގައިވެސް އެވަގުތު ނެތްކަމަށް ފޯކައިދޫން ރާއްޖެޓީވީއަށް މައުލޫމާތުދިން މީހަކު ބުންޏެވެ.
