ސްރީލަންކާއަށް ދަތުރުކުރެވޭނީ 50،000 ޑޮލަރުގެ ޓްރެވަލް އިންޝުއަރެންސްއަކާއި އެކުކަމަށް ކަނޑައަޅާ ސްރީލަންކާއަށް ދަތުރުކުރުމަށް އަޅާފައިވާ ފިޔަވަޅުތަކަށް ލަންކާ ސަރުކާރުން ބަދަލުތަކެއް ގެނެސްފިއެވެ.

ލަންކާ ސަރުކާރުން އުސޫލަށް ގެނައި ބަދަލުތައް ހާމަކުރަމުން ރާއްޖޭގެ ފޮރިން މިނިސްޓްރީން ބުނީ 31 ޖެނުއަރީ 2021، ކޮވިޑް-19 އާއި ގުޅިގެން ސްރީލަންކާއަށް ދަތުރުކުރުމަށް އަޅާފައިވާ ފިޔަވަޅުތަކަށް 27 ޖެނުއަރީ 2022 ގައި ވަނީ ބަދަލުތަކެއް ގެނެސްފައިކަމަށެވެ. ގެނައި ބަދަލުތަކުގެ ތެރޭގައި ޓްރެވަލް އިންޝިއުރެންސް ހިމަނާފައިވާއިރު ޓްރެވަލް އިންޝުއަރެންސްގައި ކޮވިޑްއަށް ޕޮޒިޓިވްވެ ހޮސްޕިޓަލުގައި ފަރުވާ ކުރަން ޖެހިއްޖެ ކަމުގައިވާނަމަ އެކަންވެސް ކަވަރ ކުރަންވާނެކަމަށް ވަނީ ބަޔާންކޮށްފައެވެ. އަދި މިއިންޝުއަރެންސުން ސްރީލަންކާގައި މަޑުކުރާ މުއްދަތުގެ އިތުރުން 14 ދުވަސް އިތުރަށް ހިމަނަން ވާނެއެވެ. ޓްރެވެލް އިންޝުރެންސްhttps://portal.pionline.lk/covidinsurance/ވެބްސައިޓް އިން ހެދޭނެއެވެ.

މީގެއިތުރުން ސްރީލަންކާއަށް ދަތުރުކުރާ ހުރިހާ ފަރާތްތަކުންވެސް، ދަތުރުކުރުމުގެ ކުރިން 72 ގަޑިއިރުގެ ތެރޭ ހައްދާފައިވާ ކޮވިޑް-19 ނެގެޓިވް ޕީސީއާރު ނަތީޖާއެއް ގެންދަން ޖެހޭނެއެވެ. އަދި ކޮވިޑް-19 ވެކްސިން ޖަހާފައިވާ ފަރާތްތަކުން ވެކްސިނޭޝަން ކާޑުގެ އަޞްލު ގެންދަން ޖެހޭނެއެވެ.

ސްރީލަންކާ އަށް ދަތުރުކުރާ ހުރިހާ ފަރާތްތަކުންވެސް ފުރުމުގެ ކުރިން މިނިސްޓްރީ އޮފް ހެލްތް – ސްރީލަންކާގެ "ހެލްތް ޑިކްލަރޭޝަން ފޯމް" ފުރިހަމަކުރުމަށްފަހު ކިޔު.އާރު ކޯޑު ހޯދަންވާނެއެވެ. އަދި ކިޔު.އާރް ކޯޑު އެއާރޕޯޓުން ބޭނުންވެއްޖެ ހާލަތެއްގައި ދައްކަވަންވާނެއެވެ. ހެލްތު ޑިކްލަރޭޝަން ފޯމު ފުރައި ކިޔު.އާރު ކޯޑުhttps://airport.lk/health/indexމި ވެބްސައިޓުން ހޯދޭނެއެވެ.

ސައްޙަ ވިސާއެއް ނެތި އަދި ޓޫރިސްޓް ރޫޓުން ނޫންގޮތަކަށް ސްރީލަންކާއަށް ދަތުރު ކުރެވޭނީ އެޤައުމުގެ އިމިގްރޭޝަނުން ދަތުރުކުރުމުގެ ހުއްދައެއް (ލޭންޑިން ޕާރމިޓެއް) ނަގައިގެންނެވެ. ސްރީލަންކާއަށް ދަތުރުކުރުމުގައި ޓޫރިސްޓް ރޫޓު އިޚްތިޔާރުކުރާނަމަ،https://www.srilanka.travel/helloagainވެބްސައިޓުގައި ދީފައިވާ އިރުޝާދުތަކާއި އެއްގޮތަށް އީޓީއޭ (އިލެކްޓްރޯނިކް ޓްރެވަލް އޮތޮރައިޒޭޝަން) ހޯދައިގެން ދަތުރު ކުރެވޭނެއެވެ. ސްރީލަންކާއަށް ދަތުރުކުރަނީ ދިގު މުއްދަތަކަށް ރެސިޑެންސް ވިސާ ނަގައިގެން ތިބުމަށްކަމަށްވާ ނަމަ "އެންޓްރީ ވިސާ" އެއް ނަގައިގެން ދަތުރުކުރެވޭނެއެވެ.

ފޮރިން މިނިސްޓްރީން ބުނީ ފިޔަވަޅުތަކަށް ބަދަލު އައުން އެކަށީގެންވުމާއެކު، ދަތުރުކުރުމުގެ ކުރިން މަޢުލޫމާތު ސާފުކުރުމަށް އެދޭކަމަށެވެ. އިތުރު މަޢުލޫމާތު ހޯދުމަށް މިނިސްޓްރީގެ ހޮޓްލައިން 7983400 ނުވަތަ ސްރީލަންކާގައި ހުންނަ ދިވެހި ހައިކޮމިޝަނުގެ ހޮޓްލައިން +94768816666 ށް ގުޅުމަށް ފޮރިން މިނިސްޓްރީން ވަނީ އެދިފައެވެ.