ވަޒީފާގެ މާހައުލުގެ ރައްކާތެރިކަމުގެ ބިލްގެ ފައިނަލް ޑްރާފްޓް ވަނީ ނިމިފައި، މިއަހަރު މަޖިލީހަށް ހުށަހެޅޭނެ: ފައްޔާޒު
އެންމެ ފުރަތަމަ މަޖިލީހަށް ހުށަހެޅޭ ބިލްތަކުގެ ތެރޭގައި އެބިލް ހިމެނޭ
މާލެ ކޮންސްޓްރަކްޝަން ސައިޓެއްގައި ބިދޭސީން މަސައްކަތްކުރަނީ
ވަޒީފާގެ މާހައުލުގެ ސަލާމަތާއި ރައްކާތެރިކަން ކަށަވަރުކުރުމާ ގުޅޭ ބިލްކަމުގައިވާ އޮކިޔުޕޭޝަނަލް ހެލްތު އެންޑް ސޭފްޓީ އެކްޓް އެޓަރނީ ޖެނެރަލް އޮފީހުން ރިވިއުކުރުމަށް ފަހު ގެންނަން ބުނި ބަދަލުތައް މިހާރު ވަނީ ގެނެސް ނިމިފައި ކަމަށް އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.
މިއަހަރަށް ރައްޔިތުންގެ މަޖިލީސް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ ދެއްވި ރިޔާސީ ބަޔާނާއި ގުޅޭގޮތުން ރާއްޖެޓީވީން ގެނެސްދިން ކަވަރޭޖްގައި ވާހަކަދައްކަވަމުން މިނިސްޓަރ ވިދާޅުވީ މިއަހަރު އެންމެ ފުރަތަމަ މަޖިލީހަށް ހުށަހެޅޭ ބިލްތަކުގެ ތެރޭގައި އެބިލް ހިމެނޭނެކަމަށެވެ.
މިދިޔަ މޭޑޭއާ ދިމާކޮށް މިނިސްޓަރ ކުރެއްވި ޓްވީޓެއްގައި ވަނީ ވަޒީފާގެ މާހައުލުގެ ސަލާމަތާއި ރައްކާތެރިކަމާ ގުޅޭ ބިލެއް މިދިޔަ އަހަރުތެރޭގައި މަޖިލީހަށް ހުށަހަޅުއްވާނެކަމަށް ވިދާޅުވެފައެވެ. މިނިސްޓަރ ވިދާޅުވީ ގިނަ ކަންތައްތަކެއް ކުރަން ހުރުމާއެކު ލަސްތަކެއް އައިނަމަވެސް ބިލްގެ މަސައްކަތްތައް މިނިސްޓްރީން ކުރަމުންދިޔަ ކަމަށެވެ. އެގޮތުން ބިލެއް ގާނޫނަކަށް ވެގެންދާއިރު އަންނަ ހުރިހާ ބަދަލުތަކަށް ވިސްނަންޖެހޭއިރު ބިލެއް އެކުލަވާލަންޖެހެނީ އެހުރިހާ ދިމާލަކުން ބެލުމަށްފަހު ކަމަށެވެ. އެހެންކަމުން އެކަމަށް ވަގުތުތަކެއް ނަގާނެކަމަށެވެ.
މީގެއިތުރުން އިންޑަސްޓްރިއަލް ރިލޭޝަން އެކްޓް ގެ ފުރަތަމަ ޑްރާފްޓް މިހާރު ނިމިފައިވާކަމަށް މިނިސްޓަރ ވިދާޅުވިއެވެ. މިބިލާއެކުވެސް މަސައްކަތްތެރިކަމަށް ބޮޑު ބަދަލެއް އަންނާނެކަމަށް މިނިސްޓަރ ވިދާޅުވިއެވެ. އެކަމުގެ އަސަރު ވިޔަފާރިތަކަށާއި މަސައްކަތްތެރިންނަށާއި މުޖުތަމައުއަށް ގެނުވާނެކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ މަސައްކަތްތެރިންގެ ހައްގު ހިމާޔަތްކުރަންޖެހޭ ކަމަށާއި މިދައުރު ނިމުމުގެކުރިން ގާނޫނީ އޮނިގަނޑަށް އެބަދަލުތައް ގެންނާނެކަމަށެވެ.
މަސައްކަތުގެ މާހައުލުގައި ހިތާމަވެރި ހާދިސާތައް ހިނގަމުންދާ މަންޒަރު ރާއްޖޭގައި އަންނަނީ ފެންނަމުންނެވެ. އެކަންކަން ހައްލުކުރުމަށް އަމަލުކުރާނެ ގާނޫނެއް ނެތްނަމަވެސް ކޮންމެވެސް ވަރެއްގެ ޕްރޮސީޖަރތަކެއް އެކުލަވާލާފައި އެބަހުއްޓެވެ. ނަމަވެސް އެންމެ އެކަށޭނެ ގޮތްތަކެއް އަދި މިހާތަނަށް ކަނޑައެޅިފައެއް ނުވެއެވެ. މިފަދަ ގާނޫނެއް ވުޖޫދުވުމުން މަސައްކަތްކުރާ ތަންތަނުގެ ރައްކާތެރިކަމުގެ މިންގަނޑުތަކެއް އެކުލަވާލެވި ނުރައްކާތެރި ހާދިސާތަކުން މުވައްޒަފުން ސަލާމަތްކޮށްދެވޭނެއެވެ.
