"އޯޝަން 50|6" ހަރަކާތް ފަސްޓް ލޭޑީ އިފްތިތާހުކޮށްދެއްވައިފި

ޔުނިޒް ސްޕޯޓިންގއިން ރާއްޖޭގެ ފަތުރުވެރިކަމަށް 50 އަހަރު ފުރުމުގެ ގޮތުން ބާއްވާ 50 ގަޑިއިރުގެ ޑައިވް ކަމަށްވާ "އޯޝަން 50|6" ހަރަކާތް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު އިފުތިތާހުކޮށްދެއްވައިފިއެވެ.

މި ހަރަކާތުގައި ޑައިވް ކުރަނީ ކުރިން ދިފާއީ ބާރުގައި ޑައިވަރަކަށް މަސައްކަތްކުރި ޝަފްރާޒް ނައީމެވެ. އޭނާއަކީ ޑައިވް އިންސްޓަކްޓަރެއްގެ ގޮތުަގައި މި އިންޑަސްޓްރީގައި 27 އަހަރު މަސައްކަތްކޮށްފައިވާ ފުންނާބު އުސް ޑައިވަރެކެވެ.

މި ޑައިވް ކުރިޔަށްދާނީ ފެބްރުއަރީ މަހުގެ 25ން 27ށް އަނަންތަރާ ދިގު ރިސޯޓު ފަރުގައެވެ.

ޔުނިޒް ސްޕޯޓިންގއިން ބުނީ މި ހަރަކާތުގެ މަގުސަދަކީ ކަނޑުއަޑީގެ މާހައުލާމެދު އާންމުން ހޭލުންތެރިކުރުމާއި ތިމާވެއްޓާމެދު އާންމުން ހޭލުންތެރިކުރުމުގެ އިތުރުން މޫދަށް ޕްލާސްޓިކް ނޭޅުމުގެ މުހިންމުކަމާމެދު އާންމުން ހޭލުންތެރިކުރުވުން ކަމަށެވެ. އަދި މީގެ އިތުރުން ޑައިވިންގއަކީ ކޮބައިކަމާއި ޑައިވިންގ އިންޑަސްޓްރީއަކީ ކޮބައިކަމާއި މި ދާއިރާއިން ކުރިޔަށްދާން ބޭނުންވާ ކުދިންނަށް އޮތް ފުރުސަތުތައް ކިޔައިދިނުމަކީވެސް މި ހަރަކާތުގެ މަގުސަދެއް ކަމަށް ޔުނިޒް ސްޕޯޓިންގއިން ބުނެއެވެ.

މި ރަސްމިއްޔާތުގައި ވާހަކަަ ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ވިދާޅުވީ، މި ހަރަކާތުގައި ޑައިވްކުރާ ޝަފްރާޒްއަށް ކާމިޔާބީއަށް އެދޭ ކަމަށެވެ. އަދި މި ހަރަކާތުގައި ބައިވެރިވާ ފަރާތްތަކަށް މި ފުރުސަތުގެ ބޭނުން އެންމެ އެކަށޭނެ ގޮތުގައި ހިފުމަށް އިލްތިމާސްކުރާ ކަމަށެވެ.

ފަޒްނާ އިތުރަށް ވިދާޅުވީ ޑައިވިންގއަކީ އަގުހެޔޮ ކަމެއް ނޫން ކަމަށާއި، އެހެންކަމުން ޑައިވަރުންނަށް ބޭނުންވާ ޒުވާނުންނަށް މާލީ ގޮތުން ގިނަ ގޮންޖެހުންތަކެއް ހުރިކަމަށެވެ. އެހެންކަމުން ޑައިވިންގ ސެންޓަރުތަކުން މި ހަރަކާތުގައި ބައިވެރިވާ މީހުންގެ ތެރެއިން މީހަކަށް ސްޕޮންސާ ކޮށްދިނުމަކީ އެކަމަނާ އެދިވަޑައިގަންނަވާ ކަމެއް ކަމަށެވެ.

މި ހަރަކާތުގައި ބައިވެރިވުމަށް ރެޖިސްޓްރޭޝަންއަށް މިހާރުވެސް ހުޅުވާލެވިފައިވާއިރު، މި ހަރަކާތުގެ ޓިކެޓްގެ އަގަކީ 65 ޑޮލަރެވެ.