ކޮވިޑް ޖެހިގެން ޅ. އަތޮޅު ހޮސްޕިޓަލުގައި ފަރުވާދެމުންދިޔަ މީހަކު ނިޔާވެއްޖެއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނީ ޅ. އަތޮޅު ހޮސްޕިޓަލުގައި ފަރުވާދެމުން ދިޔަ މީހަކު ބުދަ ދުވަހުގެ މެންދުރު 1:37 ގައި ނިޔާވެފައިވާ ކަމަށެވެ. ނިޔާވެފައިވަނީ 83 އަހަރުގެ ދިވެހި ފިރިހެނެކެވެ. މިއާއެކު ރާއްޖެއިން މި ބަލީގައި ނިޔާވި މީހުންގެ އަދަދު ވަނީ 279ށް އަރާާފައެވެ.

މި މަހުގެ މިހާތަނަށް 3 މީހަކު ވަނީ ނިޔާވެގެން ރިޕޯޓްކޮށްފައެެވެ. އެއީ ބުދަ ދުވަހު ރިޕޯޓްކުރެވުނު މަރާއި، ހުޅުމާލެ މެޑިކަލް ފެސިލިޓީގައި ފަރުވާދެމުން ދިޔަ 2 މީހުންނެވެ. އެއީ 73 އަހަރުގެ ސްރީލަންކާއަށް ނިސްބަތްވާ ފިރިހެނަކާއި، 74 އަހަރުގެ ދިވެހި ފިރިހެނެކެވެ.

ނިމިގެންދިޔަ ޖެނުއަރީ މަހުގައި އެކަނި ވެސް 14 މީހަކު ނިޔާވެގެން ވަނީ ރިޕޯޓްކޮށްފައެވެ. މީގެ ތެރޭގައި ހިމެނެނީ ބިދޭސީއަކާއި 13 ދިވެހިންނެވެ. އެއީ އައްޑޫ ސިޓީން 2 މީހުންނާއި، އައިޖީއެމްއެޗްގެ އެމަރޖެންސީއަށް ގެންދެވުނު މީހަކާއި، ސ. ފޭދޫ ހެލްތު ސެންޓަރުގައި ނިޔާވި ބަންގުލަދޭޝް މީހެއްގެ އިތުރުން, ހުޅުމާލެ މެޑިކަލް ފެސިލިޓީގައި ފަރުވާ ދެމުންދިޔަ 4 މީހުންނެވެ. މީގެ އިތުރުން ލާމު އަތޮޅު ފެސިލިޓީގައި ފަރުވާދެމުންދިޔަ 2 މީހަކާއި، ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ މީހަކާއި ފުވައްމުލައް ސިޓީ ފެސިލިޓީގައި ފަރުވާ ދެމުންދިޔަ މީހެއްގެ އިތުރުން ދަނގެތި ސިއްހީ މަރުކަޒުގައި އަދި ޅ. އަތޮޅު ހޮސްޕިޓަލުގައި ފަރުވާދެމުންދިޔަ މީހަކު ހިމެނެއެވެ.