ރައީސް ސާލިހް ވެވަޑައިގެންފައިވާ ވައުދުތައް ވިސްނުންތެރިކަމާއެކު ފުއްދަވަމުން ގެންދަވާ: ރައީސް ނަޝީދު
ރައީސް ސާލިހް ވެވަޑައިގެންނެވި ވައުދުތައް މާބޮޑަށް ވެސް ފުއްދަވަމުން ގެންދަވާ
ށ. މަރޮއްޓަށް ރައީސް ސާލިހް އަދި ރައީސް ނަޝީދު ވަޑައިގަތުން
ރައީސް ސާލިހް ވެވަޑައިގެންފައިވާ ވައުދުތައް ވިސްނުންތެރިކަމާއެކު ފުއްދަވަމުން ގެންދަވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކޮމަންޑޫ ދާއިރާގެ ބައި އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް މުހައްމަދު ރާޝިދަށް ތާއީދު ހޯއްދެވުމަށް ށ. މަރޮއްޓަށް ވަޑައިގެން ނަޝީދު ވިދާޅުވީ, ރައީސް ސާލިހް ވެވަޑައިގެންނެވި ވައުދުތައް މާބޮޑަށް ވެސް ފުއްދަވަމުން ގެންދަވާ ކަމަށެވެ. އަދި ރައްޔިތުންނަށް އެންމެ އަސާސީ ޚިދުމަތްތައް ފޯރުކޮށްދިނުމަށް އެމަނިކުފާނު މަސައްކަތް ކުރައްވަމުން ގެންދަވާ ކަމަށެވެ.
ގުޅިފައިވާ ޕާޓީތަކުން ނިކުމެ ތިބީ ދިގު މަސައްކަތްތަކަށް ކަމަށާއި ހަމައެކަނި މި އިންތިޚާބުގެ ކެމްޕޭނަަށް ނޫން ކަމަށް ނަޝީދު ވިދާޅުވިއެވެ.
ކުރީގެ ރައީސް ޔާމީންގެ މެގަރ ޕްރޮޖެކްޓަކީ ބަށި ކޯޓެއް ކަމަށާއި އެ ދާއިރާގެ ރަށަކަށް ވަޑައިނުގަންނަވާ ކަމަށް ނަޝީދު ވިދާޅުވިއެވެ. އެބަޔަކު ދެކޭ ގޮތުގައި ވެރިން ތިބޭނީ ހައިބައިތުގައި ފޮރުވިފައި ކަމަށާއި ވެރިންނަށް ރައްޔިތުން ސަނާ ކިޔައި، ބިރު ގަންނަން ޖެހޭ ކަމަށް ބަޔަކު މީހުން ގަބޫލު ކުރާ ކަމަށް ނަޝީދު ވިދާޅުވިއެވެ. އެމީހުންނާ އެމްޑީޕީއާ އޮތް ފިކުރީ ތަފާތަކީ އެއީކަމަށް ނަޝީދު ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ވިދާޅުވީ, ގުޅިފައިވާ ޕާޓީތައް އެކުގައި މަސައްކަތް ކުރަނީ ރައްޔިތުންގެ ތަރައްގީއަށްޓަކައި ކަމަށާއި, މި ސަރުކާރުން ދައްކައިދޭ އެންމެ ފުރިހަމަ ނަމޫނާއަކީ ޕާޓީތައް ގުޅިގެން އެކުގައި ރައްޔިތުންގެ ތަރައްގީއަށް މަސައްކަތްކުރުން ކަމަށެވެ.
އެންމެން އެކުގައި މަސައްކަތް ކުރެވިދާނެކަން ދައްކަމުންދާ ކަމަށާއި ކޮންމެ ދަތިކަމެއް ކަޑައްތުކުރަނީ އެންމެން އެކުގައި ކަމަށާއި, އަދި މި ދަތުރު ގުޅިފައިވާ ޕާޓީތަކުން ނިންމާނީ އެކުގައި ކަމަށް ވެސް އިމްރާން ވިދާޅުވިއެވެ.
މި އިންތިޚާބަށް ފޯރިގަދައިރު ބައެއް ފަރާތަކުން ފަހަތަށް ޖެހޭ މަންޒަރު ފެނަމުންދާ ކަމަށްވެސް އިމްރާން ވިދާޅުވިއެވެ.
