އެއްވެސް ދާއިރާއެއް އެކަހެރިކޮށްފައި ބާއްވަން މި ސަރުކާރުން ބޭނުން ނުވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ވިދާޅުވެއްޖެއެވެ.
ކޮމަންޑޫ ދާއިރާގެ ބައި އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް މުހައްމަދު ރާޝިދަށް ތާއީދު ހޯދުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ށ. މަރޮއްޓަށް ވަޑައިގެން ވިދާޅުވީ, އެންމެ ދާއިރާއެއްގެ ތިންހާހެއްހާ ވޯޓު ހޯދުމަށް މަސައްކަތް ކުރަނީ ކީއްވެގެންތޯ ބައެއް ފަރާތްތަކުން ސުވާލު އުފައްދަމުންދާ ކަމަށެވެ. އަދި އެފަދަ މީހުންނަށް ދޭން އޮތް ޖަވާބަކީ އެއްވެސް ދާއިރާއެއް މި ސަރުކާރުން އެކަހެރި ނުކުރާނެކަން ކަމަށް ރައީސް ވިދާޅުވިއެވެ.
އެއްވެސް ދާއިރާއެއް އެކަހެރިކޮށްފައި ބާއްވަން މި ސަރުކާރުން ބޭނުންނުވާ ކަމަށާއި ހުރިހާ ރަށެއްގެ ރައްޔިތުންގެ ތަރައްގީއަށް މަސައްކަތް ކުރުމަކީ މި ސަރުކާރުގެ އަމާޒު ކަމަށް ރައީސް ވިދާޅުވިއެވެ.
ތަރައްގީގެ މަޝްރޫއުތައް ކޮމަންޑޫ ދާއިރާގައި ވެސް ކުރިއަށް ގެންދިޔުމަށްޓަކައި އެމްޑީޕީގެ ކެންޑިޑޭޓަށް ވޯޓުދެއްވުމަށް ރައީސް އެދިވަޑައިގެންނެވިއެވެ. ސަރުކާރުން މިއަހަރު ކުރުމަށް ހަމަޖެހިފައިވާ ބައެއް މަސައްކަތްތަަކަށް އަލިއަޅުއްވާ ލައްވާ ރައީސް ވަނީ, އިސްލާމް ކިޔަވައިދޭ ޓީޗަރުން ތަމްރީނުކޮށް އިމާމުން ތަމްރީނު ކުރުމަށް މި ސަރުކާރުން މަސައްކަތް ކުރަމުންދާ ކަމަށް ވިދާޅުވެފައެވެ.
މަރޮށީގައި ވެސް ތަރައްގީއަށް ބޭނުންވާ ކަންތައްތައް މި ސަރުކާރުން ކޮށްދޭނެ ކަމަށާއި, ގިރާ ސަރަހައްދުގެ މައްސަލަ ހައްލުކޮށް، އެ ރަށުގައި އޭޓީއެމްގެ ޚިދުމަތް މިއަހަރު ފަށާނެ ކަމަށް ރައީސް ވިދާޅުވިއެވެ. ހަމަހަމަކަމާއެކު ރައްޔިތުންނަށާއި އެ ދާއިރާއަށް ޚިދުމަތް ކޮށްދިނުމަށް ރައްޔިތުންގެ އެއްބާރުލުން ބޭނުންވާކަން ފާހަގަކުރައްވާ ރައީސް ވަނީ އެމްޑީޕީގެ ކެންޑިޑޭޓަށް ވޯޓު ދެއްވުމަށް އެދިވަޑައިގެންފައެވެ.
