12 ރަށެއްގައި 30 އެނދުގެ އައު ހޮސްޕިޓަލުގެ މަސައްކަތް މިއަހަރު ފެށޭނެ: ރައީސް

ރާއްޖޭގެ 12 ރަށެއްގައި 30 އެނދުގެ އައު ހޮސްޕިޓަލުގެ މަސައްކަތް މިއަހަރު ފެށޭނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ވިދާޅުވެއްޖެއެވެ.

ރައީސް ސޯލިޙު މިހެން ވިދާޅުވީ ރިޔާސީ ބަޔާން އިއްވަވަމުންނެވެ. އެގޮތުން ބޭސް ފަރުވާއަށް މާލެ އައުން މަޖުބޫރުވުމުގެ ބަދުބަސް ބުނާ ޒަމާނަށް ރައްދު ކުރުމުގެ މާނައެއް މިއަދަކު ނެތްކަން ފާހަގަކުރައްވައި ރައީސް ވިދާޅުވީ، ބޭސް ސިޓީއަށް ސަލާން ޖެހުމަކީ މާޒީކަމުގައިވެގެން ދިޔައީ، އެކަމަށް ކުރަންޖެހުނު ކަންކަން އޭގެ ވަގުތުގައި ކުރުމުން ކަމަށެވެ.

ރާއްޖޭގެ 5 ސަރަހައްދުގައި ތަރައްޤީ ކުރާ 5 ޓަރޝަރީ ހޮސްޕިޓަލުގައި މިހާރު ސީޓީ އަދި މޯބައިލް އަލްޓްރާ ސައުންޑްސްކޭނާއެކު ލެބޯރޓްރީ ނިޒާމް ފުރިހަމަ ކުރެވިއްޖެކަމަށް ރައީސް ވިދާޅުވިއެވެ. އަދި އެމް.އާރް.އައި ޚިދުމަތާއި، ހިތުގެ ބަލިތަށް ދެނެގަނެ ފަރުވާދެވޭނެ ނިޒާމް ޤާއިމް ކުރެވިއްޖެކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ، އޭގެ ތެރެއިން 4 ހޮސްޕިޓަލެއްގައި ފުރިހަމަ ޑެންޓަލް ޚިދުމަތް ލިބެމުންދާއިރު، ޑޮކްޓަރ އަބްދުއްޞަމަދު މެމޯރިއަލް ހޮސްޕިޓަލުން އެ ޚިދުމަތް މިކުއާޓަރުގައި ފުރިހަމަވާނެ ކަމަށެވެ. އަދި އޭގެ ތެރެއިން ކޮންމެ ހޮސްޕިޓަލަކުންވެސް އެތައް ސްޕެޝަލިޓީ ޚިދުމަތެއް މިހާރު ލިބެމުންދާކަން ރައީސް ފާހަގަކުރެއްވިއެވެ.

ރައީސް އިތުރަށް ވިދާޅުވީ، ކުޅުދުއްފުއްޓާއި ލ.ގަމާއި، ގދ.ތިނަދޫގައިވެސް 100 އެނދުގެ ހޮސްޕިޓަލުތަކުގެ އައު ޢިމާރާތުގެ ޢަމަލީ މަސައްކަތް މިއަހަރު ހިނގާނެ ކަމަށެވެ. އަދި މީގެއިތުރުން 7 އަތޮޅު ހޮސްޕިޓަލެއްގައި 50 އެނދު، އަދި 12 ރަށެއްގައި 30 އެނދުގެ އައު ހޮސްޕިޓަލުގެ މަސައްކަތް މިއަހަރު ފެށޭނެކަން ރައީސް ފާހަގަކުރެއްވިއެވެ.

މީގެއިތުރުން، ރާއްޖޭގައި ލާމަރުކަޒީ އުޞޫލުން ޕްރައިމަރީ ހެލްތް ކެއަރގެ ނިޒާމު އަލުން އަނބުރާ ޤާއިމުކުރުމުގެ ތައްޔާރީތައް ސަރުކާރުން ހިންގަމުން ގެންދަވާކަމަށް ރައީސް ވިދާޅުވިއެވެ. އެގޮތުން މީހުން ދިރިއުޅޭ 58 ރަށެއްގައި ޕަބްލިކް ހެލްތް ކެއަރ ޕޯޓަލް މިހާރު ތަޢާރަފް ކުރެވިއްޖެކަން ފާހަގަކުރެއްވިއެވެ.

ރައީސް ވަނީ ޕްރައިމަރީ ހެލްތް ކެއަރގެ ޚިދުމަތް ކަށަވަރުކުރުމަށް ބޭނުންވާ ޤާނޫނީ އޮނިގަނޑު މިއަހަރު މަޖިލީހަށް ފޮނުއްވާނެކަމަށްވެސް ވިދާޅުވެފައެވެ.

އަތޮޅު ތެރެއަށް ނަފްސާނީ ސިއްޙަތުގެ ޚިދުމަތް ފޯރުކޮށް ދިނުން ނުހަނު މުހިންމުކަން ފާހަގަކުރައްވައި ރައީސް ވިދާޅުވީ، އެކަން ދެނެގަނެވުނީ މިޚިދުމަތަށް އެދި ވެއިޓް ލިސްޓް ކުރެވިފައިވާ މީހުންގެ ޢަދަދުގެ މަތިކަމުންކަމަށެވެ.

މީގެއިތުރުން، އެމްބިއުލާންސްގެ ޚިދުމަތް ފުރިހަމައަށް ނުދެވޭ 96 ރަށަކަށް ޒަމާނީ އެމްބިއުލާންސް ފޯރުކޮށްދިނުމުގެ މަސައްކަތް ސަރުކާރުން ފެށިކަން ފާހަގަކުރައްވައި ރައީސް ވިދާޅުވީ، އޭގެތެރެއިން 41 އެމްބިއުލާންސް ރާއްޖެ ގެނެވި، ރަށްތަކަށް ފޮނުވާފައިވާކަމަށެވެ.