މިއަހަރުގެ ފަހު ކުއާރޓާގައި ނުކުޅެދުންތެރިކަން ހުންނަ މީހުންނަށް ސަރުކާރުންދޭ ޢިނާޔަތް ބޮޑު ކުރާނަން: ރައީސް
ޚާއްޞަ އެހީއަށް ބޭނުންވާ މީހުންނަށް މިހާރު ދެމުން އަންނަނީ 2000 ރުފިޔާ
ރައީސުލްޖުމްހޫރިއްޔާ ރިޔާސީ ބަޔާން އިއްވަވަނީ
މިއަހަރުގެ ފަހު ކުއާރޓަރުގައި ނުކުޅެދުންތެރިކަން ހުންނަ މީހުންނަށް ސަރުކާރުން ދޭ ޢިނާޔަތް ބޮޑު ކުރުމަށް ނިންމަވާފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
މިއަހަރަށް ރިޔާސީ ބަޔާން އިއްވަވަމުން ރައީސް ޞާލިހު ވިދާޅުވީ މިހާތަނަށް އައިއިރު ނުކުޅެދުންތެރިކަން ހުންނަ މީހުންނާއި ބެހޭ ޖުމްލަ އަދަދާއި ތަފްޞީލް އެނގޭ ޤައުމީ ދަފްތަރެއް ނެތްކަމަށެވެ. މިފަދަ ދަފްތަރެއް އެކުލަވާލުމުގެ މަސައްކަތް ކުރިއަށްދާކަމަށް ރައީސް ވިދާޅުވިއެވެ. އަދި އެދަފްތަރަކީ އެމީހުންނަށް ބޭނުންވާ ފަރުވާ އާއި ރީހެބިލިޓޭޝަން އަދި ތެރަޕީއާއި އެހެނިހެން ޚިދުމަތްތަށް ފޯރުކޮށްދިނުމަށް އޮތް ވަޞީލަތް ކަމުގައިވާނެކަމަށް ރައީސް ޞާލިހު ވިދާޅުވިއެވެ.
ނުކުޅެދުންތެރިކަން ހުންނަ މީހުންގެ އިނާޔަތް ބޮޑުކުރުމަށް ރައީސް ނިންމަވާފައިވާއިރު ނުކުޅެދުންތެރިކަން ހުންނަ ކުދިންނަށް ދޭ އިނާޔަތްތައް ބޮޑުކުރުމަށް ގޮވާލައި، ރައީސް އޮފީހަށް ޕެޓިޝަނެއް ވަނީ ހުށަހަޅާފައެވެ. ޚާއްޞަ އެހީއަށް ބޭނުންވާ މީހުންނަށް ޤާނޫނުގެ 26 ވަނަ މާއްދާގައިވާ ގޮތުން ކޮންމެ މަހަކު ދެމުން އަންނަނީ 2،000 ރުފިޔާގެ އިނާޔަތެކެވެ. ޕެޓިޝަންގައި ހުށަހަޅާފައިވަނީ 5000 ރުފިޔާއަށް ބޮޑުކުރުމަށެވެ.
ޖިސްމާނީ އުނިކަމެއް ތަޙައްމަލު ކުރަން ޖެހުމަކީ އެއްވެސް އިންސާނެއްގައި ހުންނަ އުނިކަމަކުންވާކަމެއް ނޫންކަމަށް ރައީސް ވިދާޅުވިއެވެ. އެއީ ތަޤްދީރުގެ ނިޔާ ކަމަށާއި، ދުނިޔަވީ އާދަކަމަށް ރައީސް ވިދާޅުވިއެވެ. ނުކުޅެދުންތެރިކަމަކާއި ހުރެ އަނެކާއާއި މެދު ދެކޭގޮތް ބަދަލުވެ ދެރަވަރު ކުރުމަކީ މާބޮޑު ނުކުޅެދުންތެރި ކަމެއްކަމަށްވެސް ރައީސް ވިދާޅުވިއެވެ.
