ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ބުދަ ދުވަހުގެރޭ ކުޅުނު މެޗުން ފަސޭހަކަމާއެކު ކުލަބު ގްރީން ސްޓްރީޓްސް ބަލިކޮށް ސެމީ ފައިނަލާ ގާތަށް ސުޕަ ޔުނައިޓެޑް ސްޕޯޓްސް (ސަސް) ޖެހިލައިފިއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗުން ސަސް މޮޅުވީ 4-0 ގެ ނަތީޖާއަކުންނެވެ.

މި މެޗު ފަށައިގެން ސަސްއިން ގްރީންގެ ހާފަށް ބާރުބޮޑުކުރިއިރު، މެޗުގެ 10 ވަނަ މިނެޓުގައި ސަސްގެ މިޑްފީލްޑަރު ވިޝާހު އަބްދުލް މަޖީދު އޭރިއާ ބޭރުން ފޮނުވާލި ހަމަލާ ގްރީންގެ ގޯލްކީޕަރު އަލީ ޔާނިއު އަޙްމަދު ވަނީ މަތަކޮށްފައެވެ. އެކަމަކު މެޗުގެ 13 ވަނަ މިނެޓުގައި ސަސްގެ ލަޔާން ހުސެއިން ވަނީ ލަނޑެއް ޖަހައި، އެ ޓީމަށް ލީޑު ނަގައިދީފައެވެ.

މި ލަނޑަށްފަހުވެސް ސަސްއިން ގްރީންގެ ހާފަށް ބާރުބޮޑުކުރިއިރު، މެޗުގެ 25 ވަނަ މިނެޓުގައި ސަސްގެ އަޙްމަދު ޖުމާން ފޮނުވާލި ހަމަލާގެ ހުރަހަކަށްވީ ގްރީންގެ ކީޕަރު ޔާނިއުއެވެ. އެކަމަކު ފުރަތަމަ ހާފު ނިމުމުގެ ކުރިން ސަސްއިން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ވިޝާހެވެ.

މި މެޗުގެ ދެވަނަ ހާފުގައިވެސް ސަސްއިން ގްރީންގެ ގޯލަށް ނުރައްކާކޮށް ގިނަ ހަމަލާތަކެއް އުފެއްދިއިރު، މެޗުގެ 57 ވަނަ މިނެޓުގައި އެ ޓީމުން ވަނީ އިތުރު ލަނޑެއް ޖަހައިފައެވެ. ގްރީން ގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ ސާލިފް ހުސެއިނެވެ. ދެން މި މެޗުގައި ސަސްއިން ކާމިޔާބުކުރި ފަހު ލަނޑު މެޗުގެ 75 ވަނަ މިނެޓުގައި އެ ޓީމަށް ކާމިޔާބުކޮށްދިނީ އިޝްއާފް މުޙައްމަދެވެ.

މި ނަތީޖާއާއެކު ފަސް ޓީމު ވާދަކުރާ ގްރޫޕް އޭގެ އެއްވަނައިގައި މި ވަގުތު އޮތީ މާޒިޔާ ސްޕޯޓްސް އެންޑް ރެކްރިއޭޝަނެވެ. މާޒިޔާއަށް ހަތަރު މެޗުން ހަތް ޕޮއިންޓް ވަނީ ލިބިފައިވާއިރު، ދެވަނައިގައި އޮތް ކުލަބު އީގަލްސްއަށް ހަތް ޕޮއިންޓް ލިބިފައިވަނީ ތިން މެޗުންނެވެ. ލަނޑުގެ ތަފާތުން މާޒިޔާއަށް ކުރި ލިބުނު ނަމަވެސް، އެ ޓީމަށް ވަނީ ގްރޫޕް ސްޓޭޖުގެ ހުރިހާ މެޗެއް ނިމިފައެވެ.

މީގެ އިތުރުން މި ގްރޫޕުގެ ތިންވަނައިގައި އޮތް ސަސްއަށް ތިން މެޗުން ހަ ޕޮއިންޓް ލިބިފައިވާއިރު، ހަތަރުވަނައިގައި ދަ ގްރާންޑޭ ސްޕޯޓްސް ކުލަބު އޮތީ ތިން މެޗުން ތިން ޕޮއިންޓްޓާއެކުއެވެ. އަދި ފުލުގައި އޮތް ގްރީންއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ. އެއާއެކު ގްރީން އާއި ދަ ގްރާންޑޭ މިހާރު ވަނީ ކަޓާފައެވެ.