ކޮވިޑްގެ ހާލަތު ގޯސްވުމާގުޅިގެން ހުއްޓާލި ބައެއް ސަރޖަރީތައް އައިޖީއެމްއެޗުން ފަށަނީ
06 ފެބްރުއަރީން ފެށިގެން ބައެއް ރޫޓީން ސަރޖަރީތައް ކުރަން ފަށާނެ
ސަރުކާރުގެ މައި ހޮސްޕިޓަލް އިންދިރާ ގާނދީ މެމޯރިއަލް ހޮސްޕިޓަލް
ކޮވިޑް-19ގެ ހާލަތު ގޯސްވުމާގުޅިގެން ހުއްޓާލި ބައެއް ސަރޖަރީތައް ފަށަން ނިންމާފައިވާ ކަމަށް ސަރުކާރުގެ މައި ހޮސްޕިޓަލް, އިންދިރާ ގާނދީ މެމޯރިއަލް ހޮސްޕިޓަލުން ބުނެފިއެވެ.
ކޮވިޑް-19ގެ ބަލިމަޑުކަމާ ގުޅިގެން އައިޖީއެމްއެޗުން އެ ހޮސްޕިޓަލްގެ ބައެއް ޚިދުމަތްތައް ޑައުންގްރޭޑް ކުރިއެވެ. އަދި 22 ޖެނުއަރީ 2022ން ފެށިގެން 2 ހަފްތާއަށް ރޫޓިން (ދުރާލައި ތާވަލުކޮށްގެން ހަދާ) ސަރޖަރީތައް މެދުކަނޑާލިއެވެ. ނަމަވެސް އައިޖީއެމްއެޗުން ބުނީ 06 ފެބްރުއަރީ 2022ން ފެށިގެން ބައެއް ރޫޓީން ސަރޖަރީތައް ކުރަން ފެށުމަށް ނިންމާފައިވާ ކަމަށެވެ.
އައިޖީއެމްއެޗުން ބުނީ ހޮސްޕިޓަލުގެ އިމަރޖެންސީ (އީ.އާރް) ޚިދުމަތްތައް 24 ގަޑިއިރު މެދުކެނޑުމެއްނެތި ކުރިއަށްދާނެ ކަމަށެވެ.
ލެބޯޓްރީ, އޯޕީޑީގެ ޚިދުމަތާ ބެހޭގޮތުން އައިޖީއެމްއެޗުން ބުނީ ކޮވިޑް-19އާ ގުޅިގެން ލެބޯޓްރީ, އޯޕީޑީ ޚިދުމަތްތަކަށް ވެސް ބަދަލު ގެނެސްފައިވާ ކަމަށެވެ. 30 ޖެނުއަރީ 2022ން ފެށިގެން ފެބްރުއަރީ 5ގެ ނިޔަލަށް ލެބޯޓްރީން ލޭނެގުމުގެ ޚިދުމަތް ދެމުން ގޮސްފައިވަނީ ބަންދުނޫން ކޮންމެ ދުވަހެއްގެ ހެނދުނު 8:00ން މެންދުރު 12:00ށެވެ. ނަމަވެސް 6 ފެބްރުއަރީ 2022ން ފެށިގެން ލެބޯޓްރީން ލޭނެގުމުގެ ޚިދުމަތް ދޭ ވަގުތު އިތުރުކުރެވިފައި ވާކަމަށް އައިޖީއެމްއެޗުން ބުނެއެވެ.
މި ޚިދުމަތް ދެމުންގެންދާނީ ބަންދު ނޫން ކޮންމެ ދުވަހެއްގެ ހެނދުނު 8:00ން މެންދުރު 2:00ށް އާހަމައަށް ކަމަށާއި, އަދި ދުވާލަކަށް ނަންބަރު ދޫކުރެވޭނީ އޮންލައިންކޮށް 200 ނަންބަރު އަދި ހޮސްޕިޓަލަށް އައުމުން 200 ނަންބަރު ކަމަށް އެ ހޮސްޕިޓަލުން ބުނެއެވެ.
އައިޖީއެމްއެޗްގެ ޚިދުމަތްތައް ފުޅާކޮށް، ރައްޔިތުންނަށް ލުއި ފަސޭހަ ޚިދުމަތްތަކެއް ފޯރުކޮށްދިނުމަށް ދަނީ ގިނަ މަސައްކަތްތަކެއް ކުރަމުންނެވެ.
