ފަތުހު ގްރޫޕުގެ އެމްޑީގެ މައްޗަށް ކުރި ހިޔާނާތުގެ ދައުވާ އަލުން ބެލުމަށް ސުޕްރީމް ކޯޓުންވެސް ތާއީދު
2 ފެބުރުއަރީ 2022 | ބުދަ 07:55ލިބިފައިވާ ކޯޓާގެ އަދަދަށްވުރެ އިތުރަށް އެއަހަރު ހައްޖަށް ގެންގޮސް ދޭނެ ކަމަށް ބުނެ އިތުރު 72 މީހެއްގެ އަތުން ފައިސާ ނެގި
ސުޕްރީމް ކޯޓުގައި މިމައްސަލައިގައި ޙުކުމް ކުރުމަށް ބޭއްވި އަޑުއެހުން
ފަތުހު ގްރޫޕުގެ މެނޭޖިންގ ޑިރެކްޓަރުގެ މައްޗަށް ކުރި ހިޔާނާތްތެރިވުމުގެ ކުށުގެ ދައުވާ އަލުން ބެލުމަށް ހައިކޯޓުން ކުރި ޙުކުމަށް ސުޕްރީމް ކޯޓުންވެސް ތާއީދުކޮށްފިއެވެ.
އަލް ފަތުހު ހައްޖު އެންޑް އުމްރާ ގްރޫޕްގެ މެނޭޖިންގ ޑިރެކްޓަރު މުސްތަފާ މުހައްމަދު ދީދީގެ މައްޗަށް މަކަރާއި ހީލަތް ހެދުމުގެ ދައުވާ ދައުލަތުން އުފުލާފައި ވަނީ ހައްޖަށް ގެންގޮސް ދޭނެ ކަމަށް ބުނެ 2015 ވަނަ އަހަރު އަލް ފަތުހު ހައްޖު އަދި އުމްރާ ގްރޫޕަށް ދީފައިވާ ކޯޓާގެ އަދަދަށްވުރެ އިތުރަށް އެ އަހަރު ހައްޖަށް ގެންގޮސް ދޭނެ ކަމަށް ބުނެ އިތުރު 72 މީހެއްގެ އަތުން ފައިސާ ނަގައި، ހައްޖަށް ގެންގޮސް ދީފައި ނުވާތީއެވެ.
މުސްތަފާ މުހައްމަދު ދީދީގެ މައްޗަށް ދައުލަތުން އުފުލާފައިވާ މަކަރާއި ހީލަތް ހެދުމުގެ ދައުވާ ސާބިތު ނުވާކަމަށް ކްރިމިނަލް ކޯޓުން ހުކުމް ކުރީ 2018 ވަނަ އަހަރުއެވެ. އެއީ އެކުށުގެ އުންސުރުތައް ދައުލަތަށް ސާބިތު ކޮށްދެވިފައި ނުވާތީއާއި، މި ދައުވާއަކީ ފުރިހަމަ ނުވާ ތަހުގީގެއްގެ މައްޗަށް ކޮށްފައިވާ ދައުވާއެއް ކަމަށް ވާތީ ބުނެއެވެ.
އަދި އޭނާގެ މައްޗަށް އުފުލާފައިވާ ހިޔާނަތްތެރިވުމުގެ ކުށުގެ ދައުވާވެސް ބާތިލުކަމަށް ނިންމިއެވެ. އެއީ އެ ދައުވާވެސް ބިނާވެފައިވަނީ އެއް ތަހުގީގެއްގެ މައްޗަށްކަމަށްވާތީއެވެ.
މީގެ އިތުރުން ދިފާއީ ހެކިންގެ ހެކިބަހުން މުސްތަފާ އެދައުވާ އަށް އިންކާރުކޮށް ދައްކާފައިވާ ވާހަކަތަކަށް ބާރުލިބޭ ކަމަށާއި އެކަންކަން ނަފީ ކުރެވޭނެ ޤާނޫނީ ހެއްކެއް ނުވަތަ ޤަރީނާއެއް ދައުލަތުން ހުށައަޅާފައި ނުވާ ކަމަށް ވެސް ހުކުމުގައި ބަޔާންކޮށްފައި ވެއެވެ. އަދި ކުށް ސާބިތު ކުރުމުގެ އެއް އުންސުރު ކަމަށްވާ ކުށުގެ އަމަލުގެ ނިޔަތަށް ބަލާއިރު، މި މައްސަލާގައި ހެކިބަސް ދިން ފަރާތްތަކުގެ ހެކި ބަހަށް ބަލައި، ދައުވާ ލިބޭ ފަރާތުގެ ޖިނާއީ ކުށުގެ ނިޔަތެއް އޮތް ކަމަށް ޝަރީއަތަށް ފާހަގަކުރެވިފައި ނުވާ ކަމަށް ވެސް ހުކުމުގައި ފާހަގަކޮށްފައިވެއެވެ.
ކްރިމިނަލް ކޯޓުގެ މިޙުކުމް ހައިކޯޓުގައި އިސްތިއުނާފު ކުރުމުން މަކަރާ ހީލަތް ހެދުމުގެ ކުށުގެ ދައުވާ ސާބިތު ނުވާކަމަށް ކްރިމިނަލް ކޯޓުން ކުރި ޙުކުމަށް ހައިކޯޓުން ވަނީ ތާއީދު ކޮށްފައެވެ. ނަމަވެސް އެ މައްސަލައިގައި އުފުލާފައިވާ ހިޔާނަތްތެރިވުމުގެ ކުށުގެ ދައުވާ އަލުން ބެލުމަށް ކްރިމިނަލް ކޯޓަށް ހައިކޯޓުން ވަނީ އަންގާފައެވެ. ވުމާއެކު ހައިކޯޓުގެ އެ ޙުކުމް ބާތިލުކޮށްދިނުމަށް އެދި މުސްތަފާގެ ފަރާތުން ސުޕްރީމް ކޯޓަށް ހުށައެޅީއެވެ.
މި މައްސަލަ ސުޕްރީމް ކޯޓުގައި ބެއްލެވީ ފަނޑިޔާރު ޑރ އަޒްމިރަލްދާ ޒާހިރާއި، ފަނޑިޔާރު ހުސްނުއްސުއޫދާއި، ފަނޑިޔާރު އައިޝާ ޝުޖޫން މުޙައްމަދެވެ.
ސުޕްރީމް ކޯޓުގައި މި މައްސަލައިގައި ޙުކުމް ކުރުމަށް ބޭއްވި އަޑުއެހުމުގައި ފަނޑިޔާރު ޑރ އަޒްމިރަލްދާ ޒާހިރު ވަނީ ރައުޔު އިއްވަވާފައެވެ. އެގޮތުން ހައިކޯޓުގެ ޙުކުމް ބަދަލުކުރަންޖެހޭ ތަނެއް ނެތްކަމަށް ފަނޑިޔާރު ޑރ އަޒްމިރަލްދާ ޒާހިރުގެ ރައުޔުގައި ވިދާޅުވެއެވެ. އަދި އެ ރައުޔަށް ފަނޑިޔާރު ހުސްނުއްސުއޫދާއި، ފަނޑިޔާރު އައިޝާ ޝުޖޫން މުޙައްމަދުވެސް ވަނީ ތާއީދު ކުރައްވާފައެވެ.
