ހިޔާ ފްލެޓްތަކުގެ ސެކިއުރިޓީ ކަންތައްތައް ބެހެއްޓުމާއި ސާފުކުރުމަށް ބަޔަކާ ހަވާލުކޮށްފި
ހިޔާ ފްލެޓް ސަރަހައްދު ސާފުކުރުމަށް ތަފާތު ހަތަރު ކުންފުންޏަކާއި ވަނީ ހަވާލުކޮށްފައި
ހިޔާ ފްލެޓް ސަރަހައްދު ސާފުކުރަނީ
ހިޔާ ފްލެޓްތަކުގެ ސެކިއުރިޓީ ކަންތައްތައް ބެހެއްޓުމާއި ސާފުކުރުމަށް ބަޔަކާ ހަވާލުކޮށްފިއެވެ.
ހައުސިންގ ޑިވަލޮޕްމަންޓް ކޯޕަރޭޝަން (އެޗްޑީސީ) އިން ބުނީ ފެބްރުއަރީ 1 ވަނަ ދުވަހުން ފެށިގެން ހިޔާ ސަރަހައްދުގެ ސެކިއުރިޓީ ކަންތައްތައް ބެލެހެއްޓުމަށް ވަށި ޕްރައިވެޓް ލިމިޑަޓާއި ހަވާލުކޮށް، ޖެނުއަރީ 25 ވަނަ ދުވަހު އެއްބަސްވުމުގައި ސޮއިކޮށްފައިވާ ކަމަށެވެ. އަދި ހިޔާ ފްލެޓް ސަރަހައްދު ސާފުކުރުމަށް ތަފާތު ހަތަރު ކުންފުންޏަކާއި ހަވާލުކޮށްފައިވާ ކަމަށެވެ.
އެގޮތުން ޖެނުއަރީ މަހުގެ 31 ވަނަ ދުވަހު ހިޔާ ޓަވަރު އެކެއް، ދޭއް، ތިނެއް އަދި ހަތަރެއް ސާފުކުރުމަށް އެލްއެމް އެންޓަޕްރައިޒަޒް އާއެކު އެއްބަސްވުމުގައި ސޮއިކޮށްފައިވާ ކަމަށެވެ. އަދި ޓަވަރު ފަހެއް، ހަޔެއް، ހަތެއް އަދި އަށެއް ސާފުކުރުމަށް ޕާމް ގްލޯ ކުންފުންޏާއި ހަވާލުކޮށްފައިވާއިރު ޓަވަރު ނުވައެއް، ދިހައެއް، އެގާރަ އަދި ބާރަ ސާފުކުރުމަށް ކޭ.އެސް.އޭ މޯލްޑިވްސް އާއި ހަވާލުކޮށްފައިވާ ކަމަށެވެ. މީގެއިތުރުން ހިޔާ ޓަވަރު ތޭރަ، ސާދަ، ފަނަރަ އަދި ސޯޅަ ސާފުކުރުމަށް ލިރޯ އިންވެސްޓްމަންޓާއި ހަވާލުކޮށްފައިވާ ކަމަށެވެ.
މި ހަތަރު ކުންފުނިން ވެސް ހިޔާ ޓަވަރުތައް ބެލެހެއްޓުމާއި ސާފުކުރުމުގެ ކަންތައްތައް ކުރިއަށް ގެންދާނީ ކޮންމެ ދުވަހަކު ހެނދުނު 08:00 އިން މެންދަމު 12:00 އަށް ކަމަށް އެޗްޑީސީން ބުނެއެވެ. އަދި ހިޔާ ސަރަހައްދު ސާފުކޮށް ބެހެއްޓުމަށްޓަކައި ކޮންމެ ހަފްތާއެއްގެ އިތުރުން ކޮންމެ މަހަކު އެ ސަރަހައްދު ސާފުކުރުމުގެ ބޮޑު ހަރަކާތެއް ކުރިއަށް ގެންދާނެ ކަމަށްވެސް އެޗްޑީސީން ބުނެއެވެ.
އެޗްޑީސީން އިތުރަށް ބުނީ ސެކިއުރިޓީ ކަންތައްތައް ބެހެއްޓުމަށް ވަށި ޕްރައިވެޓް ލިމިޑަޓާއި ހަވާލުކޮށްވީ ނަމަވެސް ސެކިއުރިޓީ ސްޓާފުން ގްރައުންޑް ފްލޯ އާއި ޕާކިންގ ސަރަހައްދާއި ޖުމްލަކޮށް މުޅި ހިޔާ ސަރަހައްދު ބަލަހައްޓާ މޮނިޓަރ ކުރަމުންދާ ކަމަށެވެ. އަދި ސެކިއުރިޓީ ޚިދުމަތަކީ 24 ގަޑީއިރު ފޯރުކޮށްދޭ ޚިދުމަތަކަށްވާއިރު އެއްވެސް ކަހަލަ މައްސަލައެއް ދިމާވެ، ކަމެއް ރިޕޯޓުކޮށްފިނަމަ އެކަމެއް ސެކިއުރިޓީ މީހުން ބަލާނެ ކަމަށެވެ.
ހިޔާ ފްލެޓް ސަރަހައްދުގައި މަސްތުވާތަކެތި ބޭނުންކުރާ މީހުން ގިނަވެ، އެކަމުގެ ކަންބޮޑުވުން އާންމުން ވަނީ ފާޅުކޮށްފައެވެ. މިކަމާއި ގުޅޭގޮތުން މީގެ ކުރިން ފުލުހުން ބުނީ ހިޔާ ފްލެޓް ސަރަަހައްދަށް ޖަމާވަމުންދާ ގިނަ މީހުންނަކީ ކެފޭ އުސޫލުން މާލެ ސިޓީގައި މަސްތުވާތަކެތި ހިންގަމުންދިޔަ މީހުންނާއި އެތަންތަނުން ޚިދުމަތް ލިބިގަތް މީހުން ކަމަށެވެ. އަދި އެތަންތަން އުވާލުމުން އެމީހުން ހިޔާ ފްލެޓް ސަރަހައްދަށް ޖަމާވަމުންދާ ކަމަށެވެ.
ފުލުހުން ބުނީ މިހާތަނަށް ބެލި ބެލުމުން ހިޔާ ފްލެޓް ސަރަހައްދުގައި 45 މީހުން އުޅޭކަން ފާހަގަކުރެވިފައިވާ ކަމަށެވެ. އޭގެތެރެއިން 39 މީހުންނަކީ ކެފޭ އުސޫލުން މާލެ ސިޓީގައި މަސްތުވާތަކެތި ހިންގަމުންދިޔަ މީހުންނާއި އެތަންތަނުން ޚިދުމަތް ލިބިގަތް މީހުން ކަމަށެވެ. އަދި އެކަންތައްތައް ހުއްޓުވުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށް ވެސް ފުލުހުން ބުނެއެވެ.
