އާތިފް ޝަކޫރަށް ކުރާ ދައުވާގެ ހުކުމް ޖޫން 26ގައި
1 ފެބުރުއަރީ 2022 | އަންގާރަ 12:41ހުކުމްކުރުން އޮންނާނީ ޖޫން މަހުގެ 26ވާ އާދިއްތަ ދުވަހުގެ މެންދުރު 13:00ގައި
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)ގެ ކުރީގެ ވެރިޔާ އިބްރާހިމް އާތިފް ޝަކޫރުގެ މައްޗަށް އުފުލާފައިވާ ދައުވާގެ އަޑުއެހުމުގެ ތެރެއިން
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)ގެ ކުރީގެ ވެރިޔާ އިބްރާހިމް އާތިފް ޝަކޫރުގެ މައްޗަށް އުފުލާފައިވާ ދައުވާގެ ހުކުމްކުރުން ޖޫން މަހަށް ތާވަލުކޮށްފިއެވެ.
އެފްއައިޔޫގެ ވެރިޔާގެ މަގާމުގައި ހުންނަވައި، އެމްއެމްޕީއާރުސީގެ ޚިޔާނާތާ ގުޅޭ ޝައްކު ކުރެވޭ މައުލޫމާތު ކަމާބެހޭ ފަރާތްތަކުގެ ސަމާލުކަމަށް ގެންނަވާފައިނުވާތީ، އާތިފްގެ މައްޗަށް ކޮށްފައިވަނީ މަނީ ލޯންޑްރިން އަދި ޓެރަރިޒަމަށް ފައިނޭންސްކުރުން ހުއްޓުވުުމުގެ ގާނޫނާ ޚިލާފުވުމުގެ ކުށުގެ ދައުވާއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި ކްރިމިނަލް ކޯޓުގައި މި މައްސަލަ ބައްލަވާ އިސްގާޒީ އަހުމަދު ޝަކީލް ވަނީ މައްސަލަ ކުރިއަށްދާނެ ގޮތުގެ ތާވަލެއް އެކުލަވާލައްވާފައެވެ. އެގޮތުން ދެން މި މައްސަލައިގެ އަޑުއެހުމެއް އޮންނާނީ 13 ފެބްރުއަރީވާ އާދިއްތަ ދުވަހުގެ ހެނދުނު 09:30 ގައެވެ. އެއީ މައްސަލާގައި ދެފަރާތުން ހެކި ހާމަކުރުމަށް ބާއްވާ އަޑުއެހުމެކެވެ. އެއަށްފަހު ޝަރީއަތުގެ ކުރިން ހުށައަޅަންޖެހޭ ހުށައެޅުންތައް 13 މާރޗުގެ މެންދުރު 13:00ގައި ކުރިއަށް ގެންދަވާގޮތަށް ވަނީ ތާވަލު ކުރައްވާފައެވެ. އެ ހުށައެޅުންތަކަށް ގޮތެއް ނިންމަވާނީ 3 އޭޕްރީލްގައި ބާއްވާ އަޑުއެހުމުގައެވެ.
ގާޒީގެ ތާވަލަށް ބަލާއިރު، މި މައްސަލައިގެ ހުކުމްކުރުން އޮންނާނީ ޖޫން މަހުގެ 26ވާ އާދިއްތަ ދުވަހުގެ މެންދުރު 13:00ގައެވެ.
މި މައްސަލަ މީގެ ކުރިންވެސް ތާވަލު ކުރުމަށްފަހު އެކި ފަހަރުމަތިން ކެންސަލްވެފައިވެއެވެ. މި މައްސަލާގައި އެންމެ ފަހުން އަޑުއެހުމެއް ބާއްވާފައިވަނީ 2021 ވަނަ އަހަރުގެ ސެޕްޓެމްބަރު މަހުގެ 28 ވަނަ ދުވަހުއެވެ. މި މައްސަލައިގައި 23 ޖެނުއަރީގައިވެސް އަޑުއެހުމެއް ތާވަލުކުރިއެވެ. އެހެންނަމަވެސް، ދިފާއުގެ އަޑު ލިބުމުގައި ހުރި ދަތިތަކެއްގެ ސަބަބުން އެކަންކަން ހައްލުކުރުމަށް އަޑުއެހުން މެދުކަނޑާލުމަށްފަހު، ފަހުން ވަނީ އަޑުއެހުން ކެންސަލް ކޮށްފައެވެ.
އާތިފްގެ މައްޗަށް ކޮށްފައިވާ ދައުވާ ސާބިތުވެއްޖެނަމަ، 10،000ރ. އާ 500،000ރ. އާ ދެމެދުގެ އަދަދުން ޖޫރިމަަނާ ކުރުން ނުވަތަ 1 އަހަރާ 10 އަހަރާ ދެމެދުގެ މުއްދަތަކަށް ޖަލަށްލުމުގެ ހުކުމެއް އަންނާނެއެވެ.
އެމްއެމްޕީއާރުސީން ދައުލަތަށް ވަންނަން ޖެހޭ ފައިސާ އެސްއޯއެފްގެ އެކައުންޓްތަކަށް ޖަމާކޮށް، އެ ފައިސާއިން މަނީ ލޯންޑްރިން ކަމަށް ތުހުމަތު ކުރެވޭ މުއާމަލާތްތައް ހިންގިއިރު އެކަން ފުލުހުންނަށް ނުފޮނުވަން ނިންމެވީ އާތިފް ޝަކޫރުކަން އެންޓި ކޮރަޕްޝަން ކޮމިޝަން (އޭސީސީ)ގެ ތަހުގީގުގަށްފަހު ނެރުނު ރިޕޯޓުގައި ބަޔާންކޮށްފައިވެއެވެ
