ޗައިނާގެ އައު އަހަރުގެ ތަހުނިޔާ މިނިސްޓަރު ޝާހިދު ފޮނުއްވައިފި
ޗައިނާ ސަރުކާރުން ރާއްޖެއަށް ދެމުން ގެންދާ އެއްބާރުލުމާއި އެހީތެރިކަން ފާހަގަކުރެއްވި
ރާއްޖޭގެ ފޮރިން މިނިސްޓަރ އަބްދުالله ޝާހިދު
ޗައިނާގެ އައު އަހަރުގެ މުނާސަބަތުގައި، ޗައިނާގެ ސްޓޭޓް ކައުންސިލަރ އަދި މިނިސްޓަރ އޮފް ފޮރިން އެފެއާރޒް ހިޒް އެކްސެލެންސީ ވަންގ ޔީއަށް، ރާއްޖޭގެ ފޮރިން މިނިސްޓަރ އަބްދުالله ޝާހިދު އައު އަހަރުގެ ތަހުނިޔާ ފޮނުއްވައިފިއެވެ.
މިނިސްޓަރ ޝާހިދުގެ މެސެޖުގައި، ޗައިނީޒް ސްޕްރިންގ ފެސްޓިވަލްގެ މުނާސަބަތުގައި، އަދި އައު އަހަރުގެ މުނާސަބަތުގައި، ޗައިނާގެ ސަރުކާރަށާއި، އެގައުމުގެ ރައްޔިތުންނަށް ވަރަށް އިޚްލާސްތެރިކަމާއެކު ތަހުނިޔާ ވިދާޅުވެ، ހެޔޮއެދުންތައް ފޮނުއްވާފައިވެއެވެ.
ކޮވިޑް-19ގެ އެންމެ ދަތި އުނދަގޫ ދަނޑިވަޅުގައިވެސް، ޗައިނާ ސަރުކާރުން ރާއްޖެއަށް ދެމުން ގެންދާ އެއްބާރުލުމާއި އެހީތެރިކަން މިނިސްޓަރު ޝާހިދު ފާހަގަކުރެއްވިއެވެ. މިއީ ވަރަށް ޚާއްސަ މުނާސަބަތެއް ކަމުގައި ދެކިވަޑައިގަންނަވާ ކަމަށާއި، ރާއްޖެއާ ޗައިނާއާ ދެމެދުގައި އޮތް ގާތް ގުޅުން، މި އަހަރުގެ ތެރޭގައި އިތުރަށް ބަދަހިވާނެކަމަށް މިނިސްޓަރު ޝާހިދު ވިދާޅުވިއެވެ.
މީގެ އިތުރުން 2022 ވަނަ އަހަރު ބެއިޖިންގގައި ބޭއްވުމަށް ހަމަޖެހިފައިވާ ވިންޓަރ އޮލިމްޕިކްސް ހުޅުވުމުގެ ރަސްމިއްޔާތުގައި ބައިވެރިވުމަށް އިންތިޒާރު ކުރައްވާކަމުގައި ވެސް މެސެޖުގައި މިނިސްޓަރު ވިދާޅުވިއެވެ. އަދި ވިންޓަރ އޮލިމްޕިކްސް ކާމިޔާބު އޮލިމްޕިކްސް އަކަށްވާނެކަމުގެ އުއްމީދުކުރައްވައި ޗައިނާގެ ސަރުކާރަށާއި، ޗައިނާގެ ރައްޔިތުންނަށް މިނިސްޓަރ ޝާހިދުވަނީ ހެޔޮއެދުންތައް ފޮނުއްވާފައެވެ. އަދި މެސެޖުގައި ޗައިނާގެ ރައްޔިތުންނަށް ފާގަތި، އުފާވެރި މުސްތަގުބަލަކަށް މިނިސްޓަރުވަނީ އެދިވަޑައިގެންފައެވެ.
