ސިޓީ ކައުންސިލުގެ ހުއްދަނެތި އާންމު ތަންތަނުގައި ބިލްބޯޑު ނުޖެހޭނެކަމަށް ފުވައްމުލަކު ސިޓީގެ މޭޔަރ އިސްމާއިލް ރަފީޤް ވިދާޅުވެއްޖެއެވެ.

ރާއްޖެއެމްވީއާއި ވާހަކަދައްކަވަމުން ރަފީޤް ވިދާޅުވީ، އިންޑިއާ އައުޓް ނަމުގައި އިދިކޮޅުން ހިންގާ ޙަރަކާތްތަކުގެ ދަށުން އާންމު މީހުން ދިރިއުޅެމުންދާ ގޭގޭގައި ޕޯސްޓަރުތަކާއި ބިލްބޯޑުތައް ހަރުކުރަމުންދާ ކަމަށެވެ. އެހެންނަމަވެސް، އާންމު ތަނެއްގައި ބިލްބޯޑު ހަރުކުރާނަމަ ސިޓީ ކައުންސިލުން އެކަމުގެ ހުއްދަ ނަގަން ޖެހޭނެކަމަށް އޭނާ ވިދާޅުވިއެވެ.

ރަފީޤު ވިދާޅުވީ، އިންޑިއާ އައުޓް ކެމްޕޭން ހިންގުމަށް އާންމު ތަންތަނުގައި އެފަދައިން ބިލްބޯޑުތަކާއި ޕޯސްޓަރުތައް ހަރު ކުރުމުގެ ހުއްދަ މިހާތަނަށް ސިޓީ ކައުންސިލުން ދީފައި ނުވާނެ ކަމަށެވެ. އިދިކޮޅުގެ މި ކެމްޕޭނު، ރާއްޖޭގެ އެކި ހިސާބުތަކުގައި ފުޅާ ކުރުމުގެ މަސައްކަތް ފަށާފައިވާއިރު، އެންމެ ފުރަތަމަ އެ ކެމްޕޭނުގެ ހަރަކާތް ބޭއްވީ ފުވައްމުލަކު ސިޓީގައެވެ.

އިދިކޮޅު ޕީޕީއެމްއިން ރާއްޖޭގެ އެކި ކަންކޮޅުތަކުގައި ކުރިއަށްގެންދާ އިންޑިއާ އައުޓް ކެމްޕޭންގެ ދަށުން ރާއްޖޭގެ އެކި ރަށްރަށުގައި ގެންދަނީ އެކަމާ ގުޅޭ ޙަރަކާތްތައް ފުޅާކުރަމުންނެވެ. އެގޮތުން ފުވައްމުލަކު ސިޓީގެ ގޭގޭގައިވެސް ޕޯސްޓަރުތައް ހަރުކުރަމުން ގެންދާއިރު، އިދިކޮޅުން މިހާރު ބޭނުންކުރާ ޕޯސްޓަރުތަކާއި ބިލްބޯޑުތަކުގައި ޝަހީދު ހުސައިން އާދަމްގެ ފޮޓޯ ގެންދަނީ ބޭނުން ކުރަމުންނެވެ. އެކަމަށް ގިނަ ބައެއްގެ ފާޑުކިއުންވެސް އަމާޒުވެފައިވެއެވެ.

އިންޑިއާ އައުޓް ޙަރަކާތުގެ ސަބަބުން އިންޑިއާގައި ދިރިއުޅެމުންދާ ދިވެހިންނަށްވެސް އެކަމުގެ ނުސީދާ އުނދަގޫތައް ކުރިމަތިވަމުންދާއިރު، ޚާރިޖީ ގުޅުންތަކަށް ބުރޫއަރާފަދަ އަމަލު ހިންގާނަމަ 6 މަހުގެ ޖަލު ޙުކުމެއް އައިސްދާނެ ފަދަ ބިލެއް ރައްޔިތުންގެ މަޖިލީހަށް ހުށައެޅުމަށް ވެރިކަން ކުރާ މައި ޕާޓީ އެމްޑީޕީ އިން ވަނީ ތައްޔާރުވެފައެވެ.

ޚާރިޖީ ގުޅުންތަކަށް ބުރޫއަރާފަދަ އަމަލު ހިންގާނަމަ އެމީހަކު އެކުރަނީ ކުށެއްކަން ބަޔާންކޮށް އެ ބިލުގައި ވަނީ އެ އަމަލެއްގެ ކުޑަބޮޑު މިނަށް ބަލައި ގިނަވެގެން 20،000 ރުފިޔާއިން ޖޫރިމަނާ ކުރުން ނުވަތަ 1 އަހަރު ދުވަހަށް ގޭބަންދަށް ބަދަލު ކުރުން ނުވަތަ 6 މަސް ދުވަހަށްވުރެ ދިގު ނޫން މުއްދަތަކަށް ޖަލަށް ލެވިދާނެކަމަށް ބަޔާންކޮށް އަދަބު ކަނޑައަޅާފައެވެ.